لا توجد ترجمة عربية
(ⲁ︦) ⲟⲩⲟϩ ⲁⲥϣⲱⲡⲓ ϧⲉⲛ ⲡⲓⲁⲃⲟⲧ ⲙ̀ⲙⲁϩⲍ̅. ⲁϥⲓ̀ ⲛ̀ϫⲉ ⲓⲥⲙⲁⲏⲗ ⲡϣⲏⲣⲓ ⲛ̀ⲁⲑⲁⲛⲓⲁ ⲡϣⲏⲣⲓ ⲛ̀ⲉⲗⲁⲥⲁ ⲟⲩⲉ̀ⲃⲟⲗ ϧⲉⲛ ⲡⲅⲉⲛⲟⲥ ⲙ̀ⲡⲟⲩⲣⲟ ⲡⲉ ⲛⲉⲙ ⲓ̅ ⲛ̀ⲣⲱⲙⲓ ⲛⲉⲙⲁϥ ϩⲁ ⲅⲟⲇⲁⲗⲓⲁⲥ. ⲉ̀ϩⲣⲏⲓ ⲉ̀ⲙⲁⲥⲥⲏⲫⲁ ⲟⲩⲟϩ ⲁⲩⲟⲩⲱⲙ ⲛ̀ⲟⲩⲱⲓⲕ ⲙ̀ⲙⲁⲩ ϩⲓⲟⲩⲥⲟⲡ.
لا توجد ترجمة عربية
(ⲃ︦) ⲟⲩⲟϩ ⲁϥⲧⲱⲛϥ ⲛ̀ϫⲉ ⲓⲥⲙⲁⲏⲗ ⲛⲉⲙ ⲡⲓⲓ̅ ⲛ̀ⲣⲱⲙⲓ ⲉⲑⲛⲉⲙⲁϥ. ⲁⲩϣⲁⲣⲓ ⲉ̀ⲅⲟⲇⲟⲗⲓⲁⲥ. ⲫⲏ ⲉⲧⲁ ⲡⲟⲩⲣⲟ ⲙ̀ⲃⲁⲃⲩⲗⲱⲛ ⲭⲁϥ ⲉ̀ϩⲣⲏⲓ ⲉ̀ϫⲉⲛ ⲡⲓⲕⲁϩⲓ
لا توجد ترجمة عربية
(ⲅ︦) ⲛⲉⲙ ⲛⲓⲓⲟⲩⲇⲁⲓ ⲧⲏⲣⲟⲩ ⲉⲧⲭⲏ ⲛⲉⲙⲁϥ ϧⲉⲛ ⲙⲁⲥⲥⲏⲫⲁ. ⲛⲉⲙ ⲛⲓⲭⲁⲗⲇⲉⲟⲥ ⲧⲏⲣⲟⲩ ⲉⲧⲁⲩϫⲉⲙⲟⲩ ⲙ̀ⲙⲁⲩ
لا توجد ترجمة عربية
(ⲇ︦) ⲟⲩⲟϩ ⲁⲥϣⲱⲡⲓ ϧⲉⲛ ⲡⲓⲉϩⲟⲟⲩ ⲙ̀ⲙⲁϩⲃ̅. ⲉⲧⲁϥϣⲁⲣⲓ ⲉ̀ⲅⲟⲇⲟⲗⲓⲁⲥ. ⲟⲩⲟϩ ⲙ̀ⲡⲉ ⲣⲱⲙⲓ ⲉⲙⲓ.
لا توجد ترجمة عربية
(ⲉ︦) ⲁⲩⲓ ⲛ̀ϫⲉ ϩⲁⲛⲣⲱⲙⲓ ⲉ̀ⲃⲟⲗ ϧⲉⲛ ⲥⲩⲭⲉⲙ. ⲛⲉⲙ ⲉ̀ⲃⲟⲗ ϧⲉⲛ ⲥⲁⲗ̅ⲏ̅ⲙ̅ ⲛⲉⲙ ⲉ̀ⲃⲟⲗ ϧⲉⲛ ⲧⲥⲁⲙⲁⲣⲓⲁ ⲁⲩⲉⲣ ⲡ̅ ⲛ̀ⲣⲱⲙⲓ. ⲉⲣⲉ ⲛⲟⲩⲙⲟⲣⲧ ϧⲟⲕϩ ⲟⲩⲟϩ ⲉⲣⲉ ⲛⲟⲩϩⲃⲱⲥ ⲫⲏϧ ⲛ̀ϧⲏⲧⲟⲩ ⲉⲩⲛⲉϩⲡⲓ. ⲉ̀ⲟⲩⲟⲛ ⲟⲩⲙⲁⲛⲛⲁ. ⲛⲉⲙ ⲟⲩⲗⲓⲃⲁⲛⲟⲥ ϧⲉⲛ ⲛⲟⲩϫⲓϫ. ϩⲓⲛⲁ ⲛ̀ⲧⲟⲩⲉⲛⲟⲩ ⲉ̀ϧⲟⲩⲛ ⲉ̀ⲡⲏⲓ ⲙ̀ⲡϭ̅ⲥ̅.
لا توجد ترجمة عربية
(ⲋ︦) ⲟⲩⲟϩ ⲁϥⲓ̀ ⲉ̀ⲃⲟⲗ ⲉ̀ϩⲣⲁⲩ. ⲛ̀ⲑⲱⲟⲩ ⲇⲉ ⲛⲁⲩⲙⲟϣⲓ ⲉⲩⲣⲓⲙⲓ ⲡⲉ. ⲟⲩⲟϩ ⲡⲉϫⲁϥ ⲛⲱⲟⲩ ϫⲉ ⲙⲁϣⲉ ⲛⲱⲧⲉⲛ ⲉ̀ϧⲟⲩⲛ ϩⲁ ⲅⲟⲇⲟⲗⲓⲁⲥ
لا توجد ترجمة عربية
(ⲍ︦) ⲁⲥϣⲱⲡⲓ ⲇⲉ ⲉⲧⲁⲩϣⲉ ⲛⲱⲟⲩ ⲉ̀ϧⲟⲩⲛ ⲉⲑⲙⲏϯ ⲛ̀ϯⲃⲁⲕⲓ. ⲁϥϧⲉⲗϧⲱⲗⲟⲩ. ⲟⲩⲟϩ ⲁϥϩⲓⲧⲟⲩ ⲉ̀ϧⲣⲏⲓ ⲉ̀ϯϣⲱϯ.
لا توجد ترجمة عربية
(ⲏ︦) ⲟⲩⲟϩ ⲁϥϫⲉⲙ ⲓ̅ ⲛ̀ⲣⲱⲙⲓ ⲙ̀ⲙⲁⲩ. ⲟⲩⲟϩ ⲡⲉϫⲱⲟⲩ ⲛ̀ⲓⲥⲙⲁⲏⲗ. ϫⲉ ⲙ̀ⲡⲉⲣϧⲟⲑⲃⲉⲛ ϫⲉ ⲟⲩⲟⲛ ⲛ̀ⲧⲁⲛ ⲙ̀ⲙⲁⲩ ϧⲉⲛ ⲧⲕⲟⲓ ⲛ̀ϩⲁⲛⲁϩⲱⲣ ⲛ̀ⲥⲟⲩⲟ ⲛⲉⲙ ⲓⲱⲧ. ⲛⲉⲙ ⲏⲣⲡ. ⲛⲉⲙ ⲉⲃⲓⲱ ⲛⲉⲙ ⲛⲉϩ ⲟⲩⲟϩ ⲁϥⲥⲓⲛⲓ ⲙ̀ⲡⲉϥϧⲟⲑⲃⲟⲩ ϧⲉⲛ ⲑⲙⲏϯ ⲛ̀ⲛⲟⲩⲥⲛⲏⲟⲩ.
لا توجد ترجمة عربية
(ⲑ︦) ⲟⲩⲟϩ ϯϣⲱϯ ⲉⲧⲁ ⲓⲥⲙⲁⲏⲗ ϩⲓⲟⲩⲓ ⲉ̀ϧⲣⲏⲓ ⲉ̀ⲣⲟⲥ ⲛ̀ⲛⲏ ⲉⲧⲁϥϧⲟⲑⲃⲟⲩ ⲟⲩⲛⲓϣϯ ⲛ̀ϣⲱϯ ⲧⲉ. ⲑⲁⲓ ⲉⲧⲁϥⲑⲁⲙⲓⲟⲥ ⲛ̀ϫⲉ ⲡⲟⲩⲣⲟ ⲁⲥⲁ. ⲉ̀ⲃⲟⲗ ϩⲁ ⲡϩⲟ ⲙ̀ⲡⲟⲩⲣⲟ ⲙ̀ⲡⲓⲥ̅ⲗ̅. ⲑⲁⲓ ⲁ ⲓⲥⲙⲁⲏⲗ ⲙⲁϩⲥ ⲛ̀ϧⲱⲧⲉⲃ.
لا توجد ترجمة عربية
(ⲓ︦) ⲟⲩⲟϩ ⲁ ⲓⲥⲙⲁⲏⲗ ⲧⲁⲥⲑⲟ ⲙ̀ⲡⲓⲗⲁⲟⲥ ⲧⲏⲣϥ ⲫⲏ ⲉⲧⲁϥⲥⲱϫⲡ ϧⲉⲛ ⲙⲁⲥⲥⲏⲫⲁ. ⲛⲉⲙ ⲛⲓϣⲉⲣⲓ ⲛ̀ⲧⲉ ⲡⲟⲩⲣⲟ. ⲛ{ⲓ}<ⲏ> ⲉⲧⲁ ⲡⲓⲁⲣⲭⲏⲙⲁⲅⲓⲣⲟⲥ. ϫⲁⲗⲱⲟⲩ ⲉ̀ⲅⲟⲇⲟⲗⲓⲁⲥ ⲡϣⲏⲣⲓ ⲛ̀ⲁⲭⲓⲕⲁⲙ. ⲟⲩⲟϩ ⲁϥϣⲉ ⲛⲁϥ ⲉⲙⲏⲣ ϩⲁ ⲛⲉⲛϣⲏⲣⲓ ⲛ̀ⲁⲙⲙⲱⲛ.
لا توجد ترجمة عربية
(ⲓ︦ⲁ︦) ⲟⲩⲟϩ ⲁϥⲥⲱⲧⲉⲙ ⲛ̀ϫⲉ ⲓⲱⲁⲛⲁⲛ ⲡϣⲏⲣⲓ ⲛ̀ⲕⲁⲣⲏⲥ. ⲛⲉⲙ ⲛⲓϩⲅⲉⲙⲱⲛ ⲧⲏⲣⲟⲩ ⲛ̀ⲧⲉ ϯϫⲟⲙ. ⲛⲏ ⲉⲑⲛⲉⲙⲁϥ ⲉⲑⲃⲉ ⲛⲓⲡⲉⲧϩⲱⲟⲩ ⲧⲏⲣⲟⲩ ⲉⲧⲁϥⲁⲓⲧⲟⲩ ⲛ̀ϫⲉ ⲓⲥⲙⲁⲏⲗ
لا توجد ترجمة عربية
(ⲓ︦ⲃ︦) ⲁⲩⲓⲛⲓ ⲙ̀ⲡⲟⲩⲙⲏϣ ⲧⲏⲣϥ ⲙ̀ⲙⲁⲧⲟⲓ. ⲟⲩⲟϩ ⲁⲩϣⲉ ⲛⲱⲟⲩ ⲉ̀ⲃⲱⲧⲥ ⲉ̀ⲣⲟϥ ⲁⲩϫⲉⲙϥ ϩⲓϫⲉⲛ ⲟⲩⲛⲓϣϯ ⲙ̀ⲙⲱⲟⲩ ϧⲉⲛ ⲅⲁⲃⲁⲱⲛ.
لا توجد ترجمة عربية
(ⲓ︦ⲅ︦) ⲁⲥϣⲱⲡⲓ ⲇⲉ ⲉⲧⲁⲩⲛⲁⲩ ⲛ̀ϫⲉ ⲡⲓⲗⲁⲟⲥ ⲧⲏⲣϥ. ⲫⲏ ⲉ̀ⲛⲁϥⲭⲏ ⲛⲉⲙ ⲓⲥⲙⲁⲏⲗ ⲉ̀ⲓⲱⲁⲛⲁⲛ. ⲛⲉⲙ ⲛⲓϩⲏⲅⲉⲙⲱⲛ ⲛ̀ⲧⲉ ϯϫⲟⲙ ⲧⲏⲣⲟⲩ ⲉⲑⲛⲉⲙⲁϥ
لا توجد ترجمة عربية
(ⲓ︦ⲇ︦) ⲁⲩⲕⲱⲧⲟⲩ ϩⲁ ⲓⲱⲁⲛⲁⲛ.
لا توجد ترجمة عربية
(ⲓ︦ⲉ︦) ⲟⲩⲟϩ ⲁ ⲓⲥⲙⲁⲏⲗ ⲟⲩϫⲁⲓ ϧⲉⲛ ⲏ̅ ⲛ̀ⲣⲱⲙⲓ. ⲟⲩⲟϩ ⲁϥϣⲉ ⲛⲁϥ ϩⲁ ⲛⲉⲛϣⲏⲣⲓ ⲛ̀ⲁⲙⲙⲱⲛ
لا توجد ترجمة عربية
(ⲓ︦ⲋ︦) ⲁϥϭⲓ ⲇⲉ ⲛ̀ϫⲉ ⲓⲱⲁⲛⲁⲛ ⲛⲉⲙ ⲛⲓϩⲏⲅⲉⲙⲱⲛ ⲧⲏⲣⲟⲩ ⲛ̀ⲧⲉ ϯϫⲟⲙ. ⲛ̀ⲛⲓⲥⲱϫⲡ ⲧⲏⲣⲟⲩ ⲛ̀ⲧⲉ ⲡⲓⲗⲁⲟⲥ. ⲛⲏ ⲉⲧⲁⲩⲧⲁⲥⲑⲱⲟⲩ ⲉ̀ⲃⲟⲗ ϩⲁ ⲓⲥⲙⲁⲏⲗ ϧⲁ ⲛⲓⲣⲱⲙⲓ. ⲁⲩϫⲟⲣ ϧⲉⲛ ⲡⲓⲡⲟⲗⲉⲙⲟⲥ. ⲛⲉⲙ ⲛⲓϩⲓⲟⲙⲓ. ⲛⲉⲙ ⲛⲓⲥⲱϫⲡ ⲛⲉⲙ ⲛⲓⲥⲓⲟⲩⲣ. ⲛⲏ ⲉⲧⲁϥⲧⲁⲥⲑⲱⲟⲩ ⲉ̀ⲃⲟⲗ ϧⲉⲛ ⲅⲁⲃⲁⲱⲛ.
لا توجد ترجمة عربية
(ⲓ︦ⲍ︦) ⲟⲩⲟϩ ⲁⲩϩⲉⲙⲥⲓ ϧⲉⲛ ⲅⲁⲃⲏⲣⲱⲑ ⲭⲁⲛⲁⲁⲛ. ⲑⲏ ⲉⲧⲭⲏ ϧⲉⲛ ⲃⲏⲑⲗⲉⲉⲙ. ϩⲓⲛⲁ ⲛ̀ⲧⲟⲩⲓ̀ ⲉ̀ϧⲣⲏⲓ ⲉ̀ⲭⲏⲙⲓ ⲉⲩⲫⲏⲧ ⲉ̀ⲃⲟⲗ ϩⲁ ⲡϩⲟ ⲛ̀ⲛⲓⲭⲁⲗⲇⲉⲟⲥ.
لا توجد ترجمة عربية
(ⲓ︦ⲏ︦) ϫⲉ ⲁⲩⲉⲣϩⲟϯ ⲉ̀ⲃⲟⲗ ϩⲁ ⲡⲟⲩϩⲟ ϫⲉ ⲟⲩⲏⲓ ⲁ ⲓⲥⲙⲁⲏⲗ ϣⲁⲣⲓ ⲉ̀ⲅⲟⲇⲟⲗⲓⲁⲥ ⲫⲏ ⲉⲧⲁϥⲭⲁϥ ϩⲓϫⲱⲟⲩ ⲛ̀ϫⲉ ⲡⲟⲩⲣⲟ ⲙ̀ⲃⲁⲃⲩⲗⲱⲛ.