لا توجد ترجمة عربية
(ⲁ︦) ⲟⲩⲟϩ ⲁⲥϣⲱⲡⲓ ϧⲉⲛ ϯⲙⲁϩⲋ̅ ⲛ̀ⲣⲟⲙⲡⲓ ϧⲉⲛ ⲡⲓⲙⲁϩⲉ̅ ⲛ̀ⲁⲃⲟⲧ. ϧⲉⲛ ⲡⲓⲉϩⲟⲟⲩ ⲙ̀ⲙⲁϩⲉ̅ ⲙ̀ⲡⲓⲁⲃⲟⲧ. ⲛⲁⲓϩⲉⲙⲥⲓ ⲁ̀ⲛⲟⲕ ϧⲉⲛ ⲡⲓⲏⲓ. ⲟⲩⲟϩ ⲛⲓⲡⲣⲉⲥⲃⲩⲧⲉⲣⲟⲥ ⲛ̀ⲧⲉ ⲓⲟⲩⲇⲁ ⲛⲁⲩϩⲉⲙⲥⲓ ⲙ̀ⲡⲁⲙ̀ⲑⲟ ⲉ̀ⲃⲟⲗ ⲁⲥⲓ̀ ⲉ̀ϩⲣⲏⲓ ⲉ̀ϫⲱⲓ ⲛ̀ϫⲉ ⲧϫⲓϫ ⲙ̀ⲡϭ̅ⲥ̅.
لا توجد ترجمة عربية
(ⲃ︦) ⲁⲓⲛⲁⲩ ϩⲏⲡⲡⲉ ⲓⲥ ⲟⲩⲓⲛⲓ ⲛ̀ⲣⲱⲙⲓ ⲓⲥϫⲉⲛ ⲧⲉϥϯⲡⲓ ⲥⲁⲡⲉⲥⲏⲧ ⲟⲩⲭⲣⲱⲙ ⲡⲉ. ⲟⲩⲟϩ ⲓⲥϫⲉⲛ ⲧⲉϥϯⲡⲓ ⲥⲁⲡϣⲱⲓ. ⲟⲩⲱⲛⲓ ⲛ̀ⲉⲗⲉⲕⲧⲣⲓⲛⲟⲛ ⲡⲉ.
لا توجد ترجمة عربية
(ⲅ︦) ⲟⲩⲟϩ ⲁϥⲥⲱⲟⲩⲧⲉⲛ ⲉ̀ⲣⲟⲓ ⲛ̀ⲟⲩⲓⲛⲓ ⲛ̀ϫⲓϫ ⲛ̀ⲣⲱⲙⲓ ⲁϥⲟⲗⲧ ϧⲉⲛ ⲡⲓϥⲱⲓ ⲛ̀ⲧⲉ ⲧⲁⲁⲫⲉ. ⲟⲩⲟϩ ⲟⲩⲡⲛ̅ⲁ̅ ⲁϥϭⲓⲧⲧ. ⲟⲩⲧⲉ ⲧⲫⲉ ⲛⲉⲙ ⲡⲓⲕⲁϩⲓ ⲁϥⲟⲗⲧ ⲉ̀ⲡϣⲱⲓ ⲉ̀ⲓⲗ̅ⲏ̅ⲙ̅. ϧⲉⲛ ϯϩⲟⲣⲁⲥⲓⲥ ⲛ̀ⲧⲉ ⲫϯ. ϧⲁⲧⲉⲛ ⲛⲓⲥⲃⲉ ⲛ̀ⲧⲉ ϯⲡⲩⲗⲏ ⲑⲏ ⲉⲧⲟⲩⲏⲛ ⲉ̀ⲡⲓⲥⲁ ⲛ̀ⲧⲉ ⲡⲉⲙϩⲓⲧ. ⲡⲓⲙⲁ ⲉ̀ⲛⲁϥ ⲛ̀ϧⲏⲧϥ ⲛ̀ϫⲉ ϯⲥⲧⲩⲗⲏ ⲙ̀ⲫⲏ ⲉⲧϣⲱϯ. ⲛⲉⲙ ⲫⲏ ⲉⲧϣⲱⲡ.
لا توجد ترجمة عربية
(ⲇ︦) ⲟⲩⲟϩ ⲁϥϧⲉⲛ ⲡⲓⲙⲁ ⲉⲧⲉⲙ̀ⲙⲁⲩ ⲛ̀ϫⲉ ⲡⲱⲟⲩ ⲙ̀ⲫϯ ⲙ̀ⲡⲓⲥ̅ⲗ̅. ⲕⲁⲧⲁ ϯϩⲟⲣⲁⲥⲓⲥ ⲉⲧⲁⲓⲛⲁⲩ ⲉ̀ⲣⲟⲥ ϧⲉⲛ ⲧⲕⲟⲓ.
لا توجد ترجمة عربية
(ⲉ︦) ⲟⲩⲟϩ ⲁϥϫⲟⲥ ⲛⲏⲓ ϫⲉ ⲡϣⲏⲣⲓ ⲙ̀ⲫⲣⲱⲙⲓ ϥⲁⲓ ⲛ̀ⲛⲉⲕⲃⲁⲗ ⲉ̀ⲡϣⲱⲓ ⲉ̀ⲡⲥⲁ ⲛ̀ⲧⲉ ⲡⲉⲙϩⲓⲧ. ⲟⲩⲟϩ ⲁⲓϥⲁⲓ ⲛ̀ⲛⲁⲃⲁⲗ ⲉ̀ⲡϣⲱⲓ ⲉⲡⲥⲁ ⲛ̀ⲧⲉ ⲡⲉⲙϩⲓⲧ. ⲟⲩⲟϩ ϩⲏⲡⲡⲉ ⲓⲥϫⲉⲛ ⲡⲥⲁ ⲛ̀ⲧⲉ ⲡⲉⲙϩⲓⲧ ⲁⲓⲛⲁⲩ. ⲟⲩⲟϩ ⲟⲛ ⲓⲥϫⲉⲛ ⲡⲉⲙϩⲓⲧ. ϣⲁ ϯⲡⲩⲗⲏ ⲉⲧⲥⲁⲡⲉⲓⲉⲃⲧ ⲛ̀ⲧⲉ ⲡⲓⲗⲁⲕϩ ϩⲏⲡⲡⲉ ⲓⲥ ⲟⲩⲓⲇⲱⲗⲟⲛ ϫⲉ ⲥⲁⲙⲉⲗ ⲭⲏ ϧⲁⲧⲉⲛ ⲛⲉⲥⲙⲁⲛ̀ⲙⲟϣⲓ ⲉ̀ϧⲟⲩⲛ.
لا توجد ترجمة عربية
(ⲋ︦) ⲟⲩⲟϩ ⲁϥϫⲟⲥ ⲛⲏⲓ ϫⲉ ⲡϣⲏⲣⲓ ⲙ̀ⲫⲣⲱⲙⲓ. ϫⲉ ⲉⲩⲉ̀ⲓⲣⲓ ⲛ̀ⲟⲩ ⲛ̀ϫⲉ ⲛⲁⲓ. ⲥⲉⲓⲣⲓ ⲛ̀ϩⲁⲛⲛⲓϣϯ ⲛ̀ⲁⲛⲟⲙⲓⲁ ⲙ̀ⲡⲁⲓⲙⲁ ⲛ̀ϫⲉ ⲛⲉⲛϣⲏⲣⲓ ⲙ̀ⲡⲓⲥ̅ⲗ̅. ⲉ̀ⲑⲣⲟⲩⲣⲓⲕⲓ ⲥⲁⲃⲟⲗ ⲛ̀ⲛⲁⲡⲉ︦ⲑ︦ⲩ︦. ⲟⲩⲟϩ ⲉⲧⲓ ⲟⲛ ⲭⲛⲁⲛⲁⲩ ⲉ̀ϩⲁⲛⲁⲛⲟⲙⲓⲁ ⲉ̀ϩⲁⲛⲛⲓϣϯ ⲉ̀ⲛⲁⲓ
لا توجد ترجمة عربية
(ⲍ︦) ⲟⲩⲟϩ ⲁϥⲟⲗⲧ ⲉ̀ϧⲟⲩⲛ ϧⲁⲧⲉⲛ ⲛⲓⲥⲃⲉ ⲛ̀ⲧⲉ ϯⲡⲩⲗⲏ. ⲟⲩⲟϩ ⲁⲓⲛⲁⲩ. ⲟⲩⲟϩ ⲓⲥ ⲟⲩϣⲟⲩϣⲧ ⲛ̀ⲟⲩⲱⲧ ϩⲓ ⲡⲓϫⲱⲓ.
لا توجد ترجمة عربية
(ⲏ︦) ⲟⲩⲟϩ ⲁϥϫⲟⲥ ⲛⲏⲓ. ϫⲉ ⲡϣⲏⲣⲓ ⲙ̀ⲫⲣⲱⲙⲓ ϣⲟⲕⲓ ϧⲉⲛ ϯϫⲟⲓ ⲁⲓϣⲟⲕⲓ ⲟⲩⲟϩ ϩⲏⲡⲡⲉ ⲓⲥ ⲟⲩⲥⲃⲉ ⲛ̀ⲟⲩⲱⲧ.
لا توجد ترجمة عربية
(ⲑ︦) ⲁϥϫⲟⲥ ⲛⲏⲓ ϫⲉ ϣⲉ ⲉ̀ϧⲟⲩⲛ ⲁⲛⲁⲩ ⲉ̀ⲛⲓⲁⲛⲟⲙⲓⲁ ⲛⲏ ⲉⲧⲓⲣⲓ ⲙ̀ⲙⲱⲟⲩ ⲛ̀ϫⲉ ⲛⲁⲓ ⲙ̀ⲡⲁⲓⲣⲏϯ.
لا توجد ترجمة عربية
(ⲓ︦) ⲁⲓϣⲉ ⲉ̀ϧⲟⲩⲛ ⲁⲓⲛⲁⲩ ⲟⲩⲟϩ ϩⲏⲡⲡⲉ ⲓⲥ ϩⲁⲛⲃⲟϯ. ⲟⲩⲟϩ ⲛⲓⲓⲇⲱⲗⲟⲛ ⲧⲏⲣⲟⲩ ⲛ̀ⲧⲉ ⲡⲏⲓ ⲙ̀ⲡⲓⲥ̅ⲗ̅ ⲉⲩⲥϧⲏⲟⲩⲧ ϧⲉⲛ ⲡⲕⲱϯ ⲛ̀ϯϫⲟⲓ.
لا توجد ترجمة عربية
(ⲓ︦ⲁ︦) ⲟⲩⲟϩ ⲟ ⲉ̀ⲃⲟⲗ ϧⲉⲛ ⲛⲓⲡⲣⲉⲥⲃⲩⲧⲉ̀ⲣⲟⲥ ⲛ̀ⲧⲉ ⲡⲏⲓ ⲙ̀ⲡⲓⲥ̅ⲗ̅. ⲓⲉⲭⲟⲛⲓⲁⲥ ⲡϣⲏⲣⲓ ⲛ̀ⲉⲥⲁⲫⲁⲛ. ⲟϩⲓ ⲉ̀ⲣⲁⲧϥ ϧⲉⲛ ⲧⲟⲩⲙⲏϯ ⲙ̀ⲡⲟⲩⲙ̀ⲑⲟ ⲉ̀ⲃⲟⲗ. ⲟⲩⲟϩ ⲡⲓⲟⲩⲁⲓ ⲡⲓⲟⲩⲁⲓ ⲉ̀ⲟⲩⲟⲛ ⲟⲩϣⲟⲩⲣⲏ ϧⲉⲛ ⲧⲉϥϫⲓϫ. ⲟⲩⲟϩ ⲡⲓⲭⲣⲉⲙⲧⲥ ⲛ̀ⲧⲉ ⲡⲓⲥⲑⲟⲓⲛⲟⲩϥⲓ. ⲛⲁϥϣⲉ ⲉ̀ⲡϣⲱⲓ ⲉ̀ⲧⲫⲉ.
لا توجد ترجمة عربية
(ⲓ︦ⲃ︦) ⲡⲉϫⲁϥ ⲛⲏⲓ ϫⲉ ⲡϣⲏⲣⲓ ⲙ̀ⲫⲣⲱⲙⲓ. ⲁⲕⲛⲁⲩ ⲉ̀ⲛⲏ ⲉⲧⲟⲩⲓⲣⲓ ⲙ̀ⲙⲱⲟⲩ ⲛ̀ϫⲉ ⲛⲓⲡⲣⲉⲥⲃⲩⲧⲉ̀ⲣⲟⲥ ⲙ̀ⲡⲓⲥ̅ⲗ̅. ⲡⲓⲟⲩⲁⲓ ⲡⲓⲟⲩⲁⲓ ϧⲉⲛ ⲡⲉϥⲕⲟⲓⲧⲟⲛ ⲉⲧⲭⲏⲡ. ⲉⲑⲃⲉ ϫⲉ ⲁⲩϫⲟⲥ ϫⲉ ⲁ ⲡϭ̅ⲥ̅ ⲭⲁⲛ ⲛ̀ⲥⲱϥ. ⲟⲩⲟϩ ⲙ̀ⲡⲉ ⲡϭ̅ⲥ̅ ⲥⲟⲙⲥ ⲉ̀ϫⲉⲛ ⲡⲓⲕⲁϩⲓ.
لا توجد ترجمة عربية
(ⲓ︦ⲅ︦) ⲟⲩⲟϩ ⲡⲉϫⲁϥ ⲛⲏⲓ. ϫⲉ ⲉⲧⲓ ⲭⲛⲁⲛⲁⲩ ⲉ̀ϩⲁⲛⲛⲓϣϯ ⲛ̀ⲁⲛⲟⲙⲓⲁ. ⲛⲏ ⲉⲣⲉ ⲛⲁⲓ ⲓⲣⲓ ⲙ̀ⲙⲱⲟⲩ.
لا توجد ترجمة عربية
(ⲓ︦ⲇ︦) ⲟⲩⲟϩ ⲁϥⲟⲗⲧ ⲉ̀ϧⲟⲩⲛ ϧⲉⲛ ⲛⲓⲥⲃⲉ ⲛ̀ⲧⲉ ϯⲡⲩⲗⲏ ⲛ̀ⲧⲉ ⲡⲏⲓ ⲙ̀ⲡϭ̅ⲥ̅. ⲑⲏ ⲉⲧⲟⲩⲏⲛ ⲉ̀ⲡⲥⲁ ⲛ̀ⲧⲉ ⲡⲉⲙϩⲓⲧ. ⲟⲩⲟϩ ϩⲏⲡⲡⲉ ⲓⲥ ϩⲁⲛϩⲓⲟⲙⲓ ϧⲉⲛ ⲡⲓⲙⲁ ⲉⲧⲉⲙ̀ⲙⲁⲩ ⲉⲩϩⲉⲙⲥⲓ ⲉⲩⲛⲉϩⲡⲓ ⲉ̀ⲑⲁⲙⲟⲩⲍ.
لا توجد ترجمة عربية
(ⲓ︦ⲉ︦) ⲡⲉϫⲁϥ ⲛⲏⲓ ϫⲉ ⲡϣⲏⲣⲓ ⲙ̀ⲫⲣⲱⲙⲓ ⲁⲕⲛⲁⲩ. ⲉⲧⲓ ⲟⲛ ⲉⲕⲉ̀ⲛⲁⲩ ⲉ̀ϩⲁⲛϩⲃⲏⲟⲩⲓ ⲉⲩⲟⲓ ⲛ̀ⲛⲓϣϯ ⲉ̀ϩⲟⲧⲉ ⲛⲁⲓ.
لا توجد ترجمة عربية
(ⲓ︦ⲋ︦) ⲟⲩⲟϩ ⲁϥⲟⲗⲧ ⲉ̀ϧⲟⲩⲛ ⲉ̀ϯⲁⲩⲗⲏ ⲛ̀ⲧⲉ ⲡⲏⲓ ⲙ̀ⲡϭ̅ⲥ̅ ⲑⲏ ⲉⲧⲥⲁϧⲟⲩⲛ ⲁⲓⲛⲁⲩ ϧⲉⲛ ⲡⲓⲥⲃⲉ ⲙ̀ⲡⲓⲉⲣⲫⲉⲓ ⲛ̀ⲧⲉ ⲡⲏⲓ ⲙ̀ⲡϭ̅ⲥ̅. ϧⲉⲛ ⲑⲙⲏϯ ⲛ̀ⲉⲗⲁⲙ. ⲛⲉⲙ ⲑⲙⲏϯ ⲙ̀ⲡⲓⲙⲁⲛ̀ⲉⲣϣⲟⲩϣⲓ. ⲛⲕⲉ ⲛ̀ⲣⲱⲙⲓ. ⲉⲣⲉ ⲛ̀ⲟⲩⲥⲟⲓ ⲧⲁⲥⲑⲏⲟⲩⲧ ⲉ̀ⲡⲓⲙⲁⲛ̀ⲉⲣϣⲱⲟⲩϣⲓ ⲛ̀ⲧⲉ ⲫϯ. ⲟⲩⲟϩ ⲛⲟⲩϩⲟ ⲥⲟⲙⲥ ⲉ̀ⲡⲓⲙⲁⲛϣⲁⲓ. ⲉⲩⲟⲩⲱϣⲧ ⲙ̀ⲫⲣⲏ.
لا توجد ترجمة عربية
(ⲓ︦ⲍ︦) ⲡⲉϫⲁϥ ⲛⲏⲓ ϫⲉ ⲡϣⲏⲣⲓ ⲙ̀ⲫⲣⲱⲙⲓ ⲁⲕⲛⲁⲩ. ⲙⲏ ϩⲁⲛⲕⲟⲩϫⲓ ⲛⲉ ⲛⲁⲓ ⲙ̀ⲡⲏⲓ ⲛ̀ⲓⲟⲩⲇⲁ ⲉ̀ⲑⲣⲟⲩⲓⲣⲓ ⲛ̀ⲛⲓⲁⲛⲟⲙⲓⲁ. ⲉⲧⲁⲩⲁⲓⲧⲟⲩ ϧⲉⲛ ⲡⲁⲓⲙⲁ. ⲉⲑⲃⲉ ϫⲉ ⲁⲩⲙⲟϩ ⲙ̀ⲡⲓⲕⲁϩⲓ ⲛ̀ⲁⲛⲟⲙⲓⲁ. ⲟⲩⲟϩ ϩⲏⲡⲡⲉ ⲛ̀ⲑⲱⲟⲩ ⲉⲩⲉⲗⲕϣⲁⲓ.
لا توجد ترجمة عربية
(ⲓ︦ⲏ︦) ⲁ̀ⲛⲟⲕ ϩⲱ ϯⲛⲁⲓⲛⲓ ⲙ̀ⲡⲁⲙⲃⲟⲛ ⲉ̀ϩⲣⲏⲓ ⲉ̀ϫⲱⲟⲩ. ⲡⲁⲃⲁⲗ ⲛⲁϯⲁⲥⲟ ⲁⲛ. ⲟⲩⲇⲉ ⲛ̀ϯⲛⲁⲛⲁⲓ ⲛⲱⲟⲩ ⲁⲛ. ⲟⲩⲟϩ ⲉⲩⲉ̀ⲱϣ ⲉ̀ⲃⲟⲗ ϧⲉⲛ ⲛⲁⲙⲁϣϫ. ⲟⲩⲟϩ ⲛ̀ϯⲛⲁⲥⲱⲧⲉⲙ ⲉ̀ⲣⲱⲟⲩ ⲁⲛ.