لا توجد ترجمة عربية
(ⲁ︦) ⲟⲩⲟϩ ⲁ ⲡⲥⲁϫⲓ ⲙⲡϭ̅ⲥ̅ ϣⲱⲡⲓ ϩⲁⲣⲟⲓ ⲉϥϫⲱ ⲙ̀ⲙⲟⲥ.
لا توجد ترجمة عربية
(ⲃ︦) ϫⲉ ⲡϣⲏⲣⲓ ⲙⲫⲣⲱⲙⲓ ⲉⲑⲃⲉ ⲫⲁⲓ ⲁⲣⲓⲡⲣⲟⲫⲏⲧⲉⲩⲓⲛ. ⲟⲩⲟϩ ⲙⲁⲧⲁϫⲣⲉ ⲡⲉⲕϩⲟ ⲉ̀ϫⲉⲛ ⲓⲗ̅ⲏ̅ⲙ̅. ⲟⲩⲟϩ ⲥⲟⲙⲥ ⲉ̀ϧⲟⲩⲛ ⲉ̀ϫⲉⲛ ⲛ̀ⲟⲩⲙⲁ ⲉ︦ⲑ︦ⲩ︦ ⲟⲩⲟϩ ⲁϫⲉ ⲑⲣⲓⲡⲣⲟⲫⲏⲧⲉⲩⲓⲛ ⲉ̀ϫⲉⲛ ⲡⲕⲁϩⲓ ⲙ̀ⲡⲓⲥ̅ⲗ̅.
لا توجد ترجمة عربية
(ⲅ︦) ⲟⲩⲟϩ ⲁϫⲟⲥ ⲙ̀ⲡⲕⲁϩⲓ ⲙ̀ⲡⲓⲥ̅ⲗ̅. ϫⲉ ⲛⲁⲓ ⲛⲉ ⲛⲏ ⲉⲧⲉϥϫⲱ ⲙ̀ⲙⲱⲟⲩ ⲛ̀ϫⲉ ⲁⲇⲱⲛⲁⲓ ⲡϭ̅ⲥ̅. ⲡϭ̅ⲥ̅. ϫⲉ ϩⲏⲡⲡⲉ ⲁ̀ⲛⲟⲕ ϯⲛⲁⲓⲛⲓ ⲉ̀ϩⲣⲏⲓ ⲉ̀ϫⲱⲕ. ⲟⲩⲟϩ ⲉⲓⲉ̀ⲑⲱⲕⲉⲙ ⲛ̀ⲧⲁⲥⲏϥⲓ ϧⲉⲛ ⲧⲉⲥⲑⲏⲕⲓ. ⲧⲁϥⲟϯ ⲉ̀ⲃⲟⲗ ⲛ̀ϧⲣⲏⲓ ⲛ̀ϧⲏⲧⲕ. ⲛ̀ⲟⲩⲣⲉϥϭⲓⲛ̀ϫⲟⲛⲥ. ⲛⲉⲙ ⲟⲩⲁⲛⲟⲙⲟⲥ.
لا توجد ترجمة عربية
(ⲇ︦) ⲙ̀ⲫⲣⲏϯ ⲉ̀ϯⲛⲁϥⲟϯ ⲉ̀ⲃⲟⲗ ⲛ̀ϧⲏⲧⲕ. ⲛ̀ⲟⲩⲣⲉϥϭⲓⲛ̀ϫⲟⲛⲥ ⲛⲉⲙ ⲟⲩⲁⲛⲟⲙⲟⲥ. ⲡⲁⲓⲣⲏϯ ⲉⲣⲉ ⲧⲁⲥⲏϥⲓ ⲛⲏⲟⲩ ⲉ̀ϧⲣⲏⲓ ϧⲉⲛ ⲧⲉⲥⲑⲏⲕⲓ. ⲉ̀ϩⲣⲏⲓ ⲉ̀ϫⲉⲛ ⲥⲁⲣⲝ ⲛⲓⲃⲉⲛ ⲓⲥϫⲉⲛ ⲡⲉⲓⲉⲃⲧ ϣⲁ ⲡⲉⲙⲉⲛⲧ.
لا توجد ترجمة عربية
(ⲉ︦) ⲉⲣⲉ ⲥⲁⲣⲝ ⲛⲓⲃⲉⲛ ⲉⲙⲓ ϫⲉ ⲁ̀ⲛⲟⲕ ⲡⲉ ⲡϭ̅ⲥ̅ ⲁⲓⲑⲱⲕⲉⲙ ⲛ̀ⲧⲁⲥⲏϥⲓ ⲉ̀ⲃⲟⲗ ϧⲉⲛ ⲧⲉⲥⲑⲏⲕⲓ. ⲛ̀ⲛⲉⲥⲕⲟⲧⲥ ⲉ̀ⲃⲟⲗ ⲁⲛ ⲓⲥϫⲉⲛ ϯⲛⲟⲩ.
لا توجد ترجمة عربية
(ⲋ︦) ⲛ̀ⲑⲟⲕ ϩⲱⲕ ⲡϣⲏⲣⲓ ⲙ̀ⲫⲣⲱⲙⲓ. ϥⲓⲁϩⲟⲙ ϧⲉⲛ ⲡϧⲟⲙϧⲉⲙ ⲙ̀ⲡⲉⲕϩⲏⲧ. ⲟⲩⲟϩ ϥⲓⲁϩⲟⲙ ϧⲉⲛ ϩⲁⲛⲙⲕⲁϩ ⲛ̀ϩⲏⲧ ⲙ̀ⲡⲟⲩⲙ̀ⲑⲟ ⲉ̀ⲃⲟⲗ.
لا توجد ترجمة عربية
(ⲍ︦) ⲉ̀ϣⲱⲡ ⲁⲓϣⲁⲛϣⲉⲛⲕ ϫⲉ ⲉⲑⲃⲉ ⲟⲩ ⲕϥⲓⲁϩⲟⲙ. ⲛ̀ⲑⲟⲕ ϩⲱⲕ ⲁϫⲟⲥ ⲛⲱⲟⲩ. ϫⲉ ⲉⲑⲃⲉ ⲧⲥⲙⲏ ⲉⲧⲁⲓⲥⲟⲑⲙⲉⲥ ϫⲉ ⲥⲛⲏⲟⲩ. ⲟⲩⲟϩ ϩⲏⲧ ⲛⲓⲃⲉⲛ ⲉϥⲉ̀ϧⲟⲙϧⲉⲙ. ⲉⲣⲉ ϫⲓϫ ⲛⲓⲃⲉⲛ ⲃⲱⲗ ⲉ̀ⲃⲟⲗ ⲥⲁⲣⲝ ⲛⲓⲃⲉⲛ ⲛⲁⲗⲱⲙ. ⲛⲉⲙ ⲡⲛ̅ⲁ̅ ⲛⲓⲃⲉⲛ ⲛ̀ⲧⲉ ⲁⲗⲟϫ ⲛⲓⲃⲉⲛ ⲑⲱⲗⲉⲃ ϧⲉⲛ ⲟⲩⲑⲱⲗⲉⲃ. ϩⲏⲡⲡⲉ ϥⲛⲏⲟⲩ ⲟⲩⲟϩ ⲉϥⲉ̀ϣⲱⲡⲓ ⲡⲉϫⲉ ⲁⲇⲱⲛⲁⲓ ⲡϭ̅ⲥ̅ ⲫϯ.
لا توجد ترجمة عربية
(ⲏ︦) ⲡⲥⲁϫⲓ ⲙ̀ⲡϭ̅ⲥ̅ ⲁϥϣⲱⲡⲓ ϩⲁⲣⲟⲓ ⲉϥϫⲱ ⲙ̀ⲙⲟⲥ.
لا توجد ترجمة عربية
(ⲑ︦) ϫⲉ ⲡϣⲏⲣⲓ ⲙ̀ⲫⲣⲱⲙⲓ ⲁⲣⲓⲡⲣⲟⲫⲏⲧⲉⲩⲓⲛ ⲟⲩⲟϩ ⲁϫⲟⲥ. ϫⲉ ⲛⲁⲓ ⲛⲉ ⲛⲏ ⲉⲧⲉϥϫⲱ ⲙ̀ⲙⲱⲟⲩ ⲛ̀ϫⲉ ⲡϭ̅ⲥ̅. ϫⲉ ⲧⲥⲏϥⲓ ⲧⲥⲏϥⲓ ⲥⲉⲃϣⲱⲃ ⲟⲩⲟϩ ϫⲱⲛⲧ
لا توجد ترجمة عربية
(ⲓ︦) ϩⲓⲛⲁ ⲉⲣⲉϧⲟⲗϧⲉⲗ ⲛ̀ⲟⲩϧⲟⲗϧⲉⲗ. ⲥⲟⲃϯ ⲙ̀ⲙⲟ ⲉ̀ⲃⲟⲗ ϧⲟⲗϧⲉⲗ ϣⲱϣϥ. ϩⲓⲟⲩⲓ ⲉ̀ⲃⲟⲗ ⲛ̀ϣϣⲏⲛ ⲛⲓⲃⲉⲛ.
لا توجد ترجمة عربية
(ⲓ︦ⲁ︦) ⲟⲩⲟϩ ⲁϥⲧⲏⲓⲥ ⲉⲥⲥⲉⲃⲧⲱⲧ. ⲉⲑⲣⲉ ⲧⲉϥϫⲓϫ ⲁⲙⲁϩⲓ. ⲧⲥⲏϥⲓ ⲥⲉⲃⲧⲱⲧ ⲉⲥϣⲉⲃϣⲱⲃ. ⲁⲩⲧⲏⲓⲥ ⲉ̀ⲧϫⲓϫ ⲙ̀ⲫⲏ ⲉⲧⲥⲉⲃⲧⲱⲧ ⲉ̀ϧⲱⲧⲉⲃ.
لا توجد ترجمة عربية
(ⲓ︦ⲃ︦) ⲱϣ ⲉ̀ⲃⲟⲗ ⲟⲩⲟϩ ϣⲗⲏⲗⲟⲩⲓ ⲡϣⲏⲣⲓ ⲙ̀ⲫⲣⲱⲙⲓ. ϫⲉ ⲑⲁⲓ ⲁⲥϣⲱⲡⲓ ϧⲉⲛ ⲡⲁⲗⲁⲟⲥ. ⲁⲥϣⲱⲡⲓ ϧⲉⲛ ⲛⲓϩⲩⲅⲟⲩⲙⲉⲛⲟⲥ ⲧⲏⲣⲟⲩ ⲙ̀ⲡⲓⲥ̅ⲗ̅ ⲟⲩⲟϩ ⲉ̀ⲃⲟⲗ ϫⲉ ϯⲥⲏϥⲓ ⲁⲥϣⲱⲡⲓ ϧⲉⲛ ⲡⲁⲗⲁⲟⲥ. ⲉⲑⲃⲉ ⲫⲁⲓ ⲕⲱⲗϩ ϧⲉⲛ ⲛⲉⲕϫⲓϫ ⲉ̀ⲃⲟⲗ. ϫⲉ ⲁⲥⲑⲙⲁⲓⲟ.
لا توجد ترجمة عربية
(ⲓ︦ⲅ︦) ⲟⲩⲟϩ ⲟⲩ ⲡⲉ ⲡⲓϩⲱⲃ ⲓⲥϫⲉ ⲁⲩϩⲓⲟⲩⲓ ⲉ̀ⲃⲟⲗ ⲛ̀ⲟⲩⲫⲩⲗⲏ ⲉ̀ϣ̀ⲧⲉⲙϣⲱⲡⲓ ⲁⲛ ϫⲉ ⲡⲉϫⲉ ⲡϭ̅ⲥ̅.
لا توجد ترجمة عربية
(ⲓ︦ⲇ︦) ⲛ̀ⲑⲟⲕ ϩⲱⲕ ⲡϣⲏⲣⲓ ⲙ̀ⲫⲣⲱⲙⲓ. ⲕⲱⲗϩ ⲛ̀ⲛⲉⲕϫⲓϫ. ⲟⲩⲟϩ ⲟⲩⲱϩⲉⲙ ⲕⲉⲥⲏϥⲓ. ⲉⲧⲉ ϯⲙⲁϩⲅ̅ ⲛ̀ⲥⲏϥⲓ ⲧⲉ ⲑⲁ ⲛⲓϧⲱⲧⲉⲃ. ϯⲛⲓϣϯ ⲛ̀ⲥⲏϥⲓ ⲛ̀ϧⲱⲧⲉⲃ. ⲟⲩⲟϩ ⲉⲕⲉ̀ϣ̀ⲧⲉⲣⲑⲟⲣⲟⲩ. ϩⲓⲛⲁ ⲉⲣⲉ ⲡⲟⲩϩⲏⲧ ϧⲟⲙϧⲉⲙ.
لا توجد ترجمة عربية
(ⲓ︦ⲉ︦) ⲉⲩⲉ̀ⲁϣⲁⲓ ⲛ̀ϫⲉ ⲛⲏ ⲉⲧϣⲱⲛⲓ. ⲁⲩⲧⲏⲓⲧⲟⲩ ⲉ̀ϧⲣⲏⲓ ⲉ̀ⲧϫⲓϫ ⲛ̀ⲧⲥⲏϥⲓ ⲉ̀ϧⲉⲗϧⲟⲗⲟⲩ ϧⲁⲧⲉⲛ ⲡⲩⲗⲏ ⲛⲓⲃⲉⲛ. ⲁⲥⲥⲟⲃϯ ⲕⲁⲗⲱⲥ ⲉ̀ⲑⲣⲉⲥϧⲟⲗϧⲉⲗ. ⲁⲥϣⲱⲡⲓ ⲕⲁⲗⲱⲥ ⲉ̀ⲑⲣⲉⲥⲫⲓⲣⲓ.
لا توجد ترجمة عربية
(ⲓ︦ⲋ︦) ⲧⲥⲏϥⲓ ⲙⲟϣⲓ ⲁⲣⲉⲓ̀ ⲉ̀ϩⲣⲉⲛ ⲛⲏ ⲉⲧⲥⲁⲟⲩⲓⲛⲁⲙ. ⲛⲉⲙ ⲥⲁϫⲁϭⲏ. ⲉ̀ⲡⲓⲙⲁ ⲉ̀ϣⲁϥⲥⲟⲙⲥ ⲉ̀ⲣⲟϥ ⲛ̀ϫⲉ ⲡⲉⲕϩⲟ.
لا توجد ترجمة عربية
(ⲓ︦ⲍ︦) ⲁ̀ⲛⲟⲕ ϩⲱ ⲉⲓⲉ̀ⲕⲱⲗϩ ⲛ̀ⲛⲁϫⲓϫ. ⲟⲩⲟϩ ⲉⲓⲉ̀ⲟⲩⲱⲣⲡ ⲙ̀ⲡⲁϫⲱⲛⲧ ⲛ̀ϧⲏⲧⲕ. ⲁ̀ⲛⲟⲕ ⲡϭ̅ⲥ̅ ⲁⲓⲥⲁϫⲓ.
لا توجد ترجمة عربية
(ⲓ︦ⲏ︦) ⲡⲥⲁϫⲓ ⲙ̀ⲡϭ̅ⲥ̅ ⲁϥϣⲱⲡⲓ ϩⲁⲣⲟⲓ ⲉϥϫⲱ ⲙ̀ⲙⲟⲥ.
لا توجد ترجمة عربية
(ⲓ︦ⲑ︦) ϫⲉ ⲛ̀ⲑⲟⲕ ϩⲱⲕ ⲡϣⲏⲣⲓ ⲙ̀ⲫⲣⲱⲙⲓ. ⲑⲟϣ ⲛⲁⲕ ⲙ̀ⲙⲱⲓⲧ ⲃ̅. ⲉ̀ⲑⲣⲉⲥⲓ ⲉ̀ϧⲟⲩⲛ ⲛ̀ϧⲏⲧⲟⲩ ⲛ̀ϫⲉ ⲧⲥⲏϥⲓ ⲙ̀ⲡⲟⲩⲣⲟ ⲛ̀ⲧⲉ ⲑⲃⲁⲃⲩⲗⲱⲛ. ⲉ̀ⲃⲟⲗ ϧⲉⲛ ⲟⲩⲭⲱⲣⲁ ⲛ̀ⲟⲩⲱⲧ. ⲉⲩⲉ̀ⲓ̀ ⲉ̀ⲃⲟⲗ ⲛ̀ϫⲉ ⲛⲓⲃ̅ ⲛ̀ⲁⲣⲭⲏ. ⲉⲩⲉ̀ⲥⲉⲙⲛⲏⲧⲟⲩ ϧⲉⲛ ⲧⲁⲣⲭⲏ ⲙ̀ⲫⲙⲱⲓⲧ ⲛ̀ϯⲃⲁⲕⲓ.
لا توجد ترجمة عربية
(ⲕ︦) ⲉⲣⲉ ϯⲥⲏϥⲓ ⲛⲏⲟⲩ ⲉ̀ϫⲉⲛ ⲣⲁⲃⲃⲁⲑ ⲛⲉⲙ ⲉ̀ϫⲉⲛ ⲛⲓϣⲏⲣⲓ ⲛ̀ⲁⲙⲙⲱⲛ. ⲛⲉⲙ ⲉ̀ϫⲉⲛ ϯⲓⲟⲩⲇⲉⲁ. ⲛⲉⲙ ⲓⲗ̅ⲏ̅ⲙ̅. ϧⲉⲛ ⲧⲉⲥⲙⲏϯ
لا توجد ترجمة عربية
(ⲕ︦ⲁ︦) ⲉⲑⲃⲉ ϫⲉ ⲡⲟⲩⲣⲟ ⲛ̀ⲑⲃⲁⲃⲩⲗⲱⲛ ⲛⲁⲟϩⲓ ⲉ̀ⲣⲁⲧϥ ⲉ̀ϫⲉⲛ ⲡⲓⲙⲱⲓⲧ ⲛ̀ϩⲟⲩⲓⲧ. ⲉ̀ϫⲉⲛ ⲡⲓⲙⲱⲓⲧ ⲛ̀ϯⲁⲣⲭⲏ ⲃ̅ϯ. ⲉ̀ϣⲓⲛⲓ ⲛ̀ⲟⲩϣⲓⲛⲓ ⲉ̀ⲑⲣⲉϥⲧⲁϩⲟ ⲉ̀ⲣⲁⲧϥ ⲛ̀ⲟⲩϣⲃⲱⲧ. ⲟⲩⲟϩ ⲉϥⲉ̀ϣⲓⲛⲓ ⲛⲛⲓⲙⲟⲩⲛⲕ ⲛ̀ϫⲓϫ.
لا توجد ترجمة عربية
(ⲕ︦ⲃ︦) ⲟⲩⲟϩ ⲉⲑⲣⲉϥϭⲓ ⲛ̀ⲟⲩⲙⲏⲓⲛⲓ ϧⲉⲛ ⲛⲓϩⲏⲡⲁⲣ ⲥⲁⲟⲩⲓⲛⲁⲙ ⲙ̀ⲙⲟϥ. ⲁ ⲡϣⲓⲛⲓ ϣⲱⲡⲓ ⲛⲁϥ ⲉ̀ϫⲉⲛ ⲓⲗ̅ⲏ̅ⲙ̅ ⲉ̀ⲑⲣⲉϥⲕⲱϯ ⲉ̀ⲣⲟⲥ ⲛ̀ϫⲉ ⲟⲩⲕⲱϯ. ⲉ̀ⲁⲟⲩⲱⲛ ⲛ̀ⲣⲱϥ ϧⲁϫⲱⲥ ϧⲉⲛ ⲟⲩⲱϣ ⲉ̀ⲃⲟⲗ. ⲉ̀ⲑⲣⲉϥϭⲓⲥⲓ ⲛ̀ⲧⲉϥⲥⲙⲏ ϧⲉⲛ ⲟⲩⲱϣ ⲉ̀ⲃⲟⲗ ⲉ̀ⲑⲣⲉϥⲕⲱϯ ϩⲓⲣⲱⲥ ⲛ̀ⲛⲉⲥⲡⲩⲗⲏ. ⲉ̀ⲑⲣⲟⲩⲕⲱⲗϩ ⲛ̀ⲛⲟⲩϫⲓϫ ϧⲁϫⲱⲥ. ⲙ̀ⲫⲣⲏϯ ⲛ̀ⲟⲩⲙⲁ ⲛ̀ⲭⲁ ⲥⲟⲑⲛⲉϥ.
لا توجد ترجمة عربية
(ⲕ︦ⲅ︦) ⲟⲩⲟϩ ⲛ̀ⲑⲟϥ ⲁϥϣⲓⲛⲓ ⲙ̀ⲫⲣⲏϯ ⲙ̀ⲫⲏ ⲉⲧϣⲓⲛⲓ ⲛ̀ⲟⲩϣⲓⲛⲓ ⲙ̀ⲡⲟⲩⲙ̀ⲑⲟ ⲉ̀ⲃⲟⲗ. ⲟⲩⲟϩ ⲛ̀ⲑⲟϥ ϧⲉⲛ ⲟⲩⲉⲣⲫⲙⲉⲩⲓ ⲉ̀ⲑⲣⲉϥⲉⲣⲫⲙⲉⲩⲓ ⲛ̀ⲛⲉϥϭⲓⲛ̀ϫⲟⲛⲥ.
لا توجد ترجمة عربية
(ⲕ︦ⲇ︦) ⲉⲑⲃⲉ ⲫⲁⲓ ⲛⲁⲓ ⲛⲉ ⲛⲏ ⲉⲧⲉϥϫⲱ ⲙ̀ⲙⲱⲟⲩ ⲛ̀ϫⲉ ⲡϭ̅ⲥ̅ ⲡϭ̅ⲥ̅ ⲫϯ. ⲉⲑⲃⲉ ϫⲉ ⲁⲣⲉⲧⲉⲛⲉⲣⲫⲙⲉⲩⲓ ⲛ̀ⲛⲉⲧⲉⲛϭⲓⲛ̀ϫⲟⲛⲥ. ⲟⲩⲟϩ ⲁⲣⲉⲧⲉⲛϭⲱⲣⲡ ⲉ̀ⲃⲟⲗ ⲛ̀ⲛⲉⲧⲉⲛⲁⲛⲟⲙⲓⲁ. ⲉⲑⲣⲉ ⲛⲉⲧⲉⲛⲛⲟⲃⲓ ⲟⲩⲱⲛϩ ⲉ̀ⲃⲟⲗ. ϧⲉⲛ ⲛⲉⲧⲉⲛⲙⲉⲧⲁⲥⲉⲃⲏⲥ ⲧⲏⲣⲟⲩ. ⲉⲑⲃⲉ ϫⲉ ⲁⲣⲉⲧⲉⲛⲉⲣⲫⲙⲉⲩⲓ ⲛ̀ⲛⲁⲓ. ⲥⲉⲛⲁⲧⲁϩⲉ ⲑⲏⲛⲟⲩ ⲛ̀ϧⲏⲧⲟⲩ.
لا توجد ترجمة عربية
(ⲕ︦ⲉ︦) ⲛ̀ⲑⲟⲕ ϩⲱⲕ ⲡⲓⲁⲛⲟⲙⲟⲥ ⲉⲧϭⲁϧⲉⲙ. ⲡⲓϩⲩⲅⲟⲩⲙⲉⲛⲟⲥ ⲛ̀ⲧⲉ ⲡⲓⲥ̅ⲗ̅. ⲫⲁⲓ ⲉⲧⲁ ⲡⲉϥϧⲣⲱⲟⲩⲓ ϧⲁⲧϩⲏ ⲙ̀ⲡⲓⲉϩⲟⲟⲩ. ⲙ̀ⲡϫⲱⲕ ⲉ̀ⲃⲟⲗ ⲛ̀ⲧⲉϥⲕⲁⲕⲓⲁ.
لا توجد ترجمة عربية
(ⲕ︦ⲋ︦) ⲛⲁⲓ ⲛⲉ ⲛⲏ ⲉⲧⲉϥϫⲱ ⲙ̀ⲙⲱⲟⲩ ⲛ̀ϫⲉ ⲡϭ̅ⲥ̅. ϫⲉ ⲱⲗⲓ ⲛ̀ϯⲕⲉⲇⲁⲣⲓⲥ ⲙⲙⲁⲩ. ⲟⲩⲟϩ ⲭⲱ ⲙ̀ⲡⲓⲭⲗⲟⲙ ⲉⲧϩⲓϫⲱϥ. ⲑⲁⲓ ⲛⲁⲥϣⲟⲡ ϩⲓⲛⲁⲓ. ⲁⲕⲑⲉⲃⲓⲟ ⲙ̀ⲫⲏ ⲉⲧϭⲟⲥⲓ. ⲟⲩⲟϩ ⲁⲕϭⲓⲥⲓ ⲙ̀ⲫⲏ ⲉⲧⲑⲉⲃⲓⲏⲟⲩⲧ.
لا توجد ترجمة عربية
(ⲕ︦ⲍ︦) ϯⲛⲁⲭⲁⲥ ⲉⲩⲁⲇⲓⲕⲓⲁ ⲉⲥⲕⲏⲃ ⲛ̀ⲑⲟϥ ϩⲱϥ ⲉϥⲉ̀ϣⲱⲡⲓ ⲟⲩⲛ ϩⲓ ⲛⲁⲓ. ϣⲁⲧⲉϥⲓ̀ ⲛ̀ϫⲉ ⲫⲏ ⲉⲧⲙⲡϣⲁ ⲉ̀ϭⲓⲧϥ. ⲉⲓⲉ̀ⲧⲏⲓⲥ ⲛⲁϥ.
لا توجد ترجمة عربية
(ⲕ︦ⲏ︦) ⲛ̀ⲑⲟⲕ ϩⲱⲕ ⲡϣⲏⲣⲓ ⲙ̀ⲫⲣⲱⲙⲓ ⲁⲣⲓⲡⲣⲟⲫⲏⲧⲉⲩⲓⲛ ⲟⲩⲟϩ ⲁϫⲟⲥ. ϫⲉ ⲛⲁⲓ ⲛⲉ ⲛⲏ ⲉⲧⲉϥϫⲱ ⲙ̀ⲙⲱⲟⲩ ⲛ̀ϫⲉ ⲡϭ̅ⲥ̅. ⲛⲁϩⲣⲉⲛ ⲛⲉⲛϣⲏⲣⲓ ⲛ̀ⲁⲙⲙⲱⲛ. ⲟⲩⲟϩ ⲛⲁϩⲣⲉⲛ ⲡⲟⲩϣⲱϣ. ⲟⲩⲟϩ ⲁϫⲟⲥ ϫⲉ ⲧⲥⲏϥⲓ ⲧⲥⲏϥⲓ ⲑⲟⲕⲉⲙ ⲙ̀ⲙⲟ ⲉ̀ϩⲁⲛϧⲟⲗϧⲉⲗ. ⲟⲩⲟϩ ⲛ̀ⲑⲟⲕ ⲙⲉⲩⲓ ⲉ̀ⲟⲩⲥⲩⲛⲧⲉⲗⲓⲁ. ⲧⲱⲟⲩⲛ ϩⲓⲛⲁ ⲉⲣⲉ̀ⲫⲓⲣⲓ
لا توجد ترجمة عربية
(ⲕ︦ⲑ︦) ϧⲉⲛ ⲧⲉϩⲟⲣⲁⲥⲓⲥ ⲉⲧⲉⲫⲗⲏⲟⲩ. ⲛⲉⲙ ⲡⲉϣⲓⲛⲓ ⲙ̀ⲙⲉⲑⲛⲟⲩϫ. ⲉ̀ⲑⲣⲟⲩⲧⲏⲓⲧⲟⲩ ⲉ̀ϫⲉⲛ ⲛⲓⲙⲟϯ ⲛ̀ⲛⲏ ⲉⲧϧⲱⲧⲉⲃ. ⲡⲓⲉϩⲟⲟⲩ ⲁϥⲓ̀ ϧⲉⲛ ⲡⲓⲥⲏⲟⲩ ϯϧⲁⲉ̀ ⲁⲥⲓ̀ ϧⲉⲛ ⲡⲥⲏⲟⲩ ⲙ̀ⲡⲓϭⲓⲛ̀ϫⲟⲛⲥ.
لا توجد ترجمة عربية
(ⲗ︦) ⲕⲟⲧϯ ⲉ̀ⲃⲟⲗ ⲙ̀ⲡⲉⲣϣⲱⲡⲓ ϧⲉⲛ ⲡⲓⲙⲁ ⲉⲧⲟⲩϫⲫⲟ ⲙ̀ⲙⲟ ⲛ̀ϧⲏⲧϥ. ⲉⲓⲉ̀ϯϩⲁⲡ ⲅⲁⲣ ⲉ̀ⲣⲟ ϧⲉⲛ ⲡⲉⲕⲁϩⲓ.
لا توجد ترجمة عربية
(ⲗ︦ⲁ︦) ⲟⲩⲟϩ ⲉⲓⲉ̀ϫⲱϣ ⲙ̀ⲡⲁϫⲱⲛⲧ ⲉ̀ϧⲣⲏⲓ ⲉ̀ϫⲱ ϧⲉⲛ ⲡⲁⲙⲃⲟⲛ. ⲉⲓⲉ̀ϯ ⲙ̀ⲙⲟ ⲉ̀ⲧϫⲓϫ ⲛ̀ϩⲁⲛⲣⲱⲙⲓ ⲙ̀ⲃⲁⲣⲃⲁⲣⲟⲥ ⲉⲩϫⲫⲟ ⲛ̀ⲟⲩⲧⲁⲕⲟ.
لا توجد ترجمة عربية
(ⲗ︦ⲃ︦) ⲉⲣⲉ̀ϣⲱⲡⲓ ⲛ̀ϧⲣⲉ ⲛ̀ⲭⲣⲱⲙ. ⲉⲣⲉ ⲡⲉⲥⲛⲟϥ ϣⲱⲡⲓ ϧⲉⲛ ⲑⲙⲏϯ ⲙ̀ⲡⲉⲕⲁϩⲓ. ⲉ̀ϣ̀ⲧⲉⲙϣⲱⲡⲓ ⲛⲉ ⲛ̀ⲟⲩⲉⲣⲫⲙⲉⲩⲓ ⲉ̀ⲃⲟⲗ. ϫⲉ ⲁ̀ⲛⲟⲕ ⲡⲉ ⲡϭ̅ⲥ̅ ⲁⲓⲥⲁϫⲓ.
لا توجد ترجمة عربية
لا توجد ترجمة قبطية
لا توجد ترجمة عربية
لا توجد ترجمة قبطية
لا توجد ترجمة عربية
لا توجد ترجمة قبطية
لا توجد ترجمة عربية
لا توجد ترجمة قبطية
لا توجد ترجمة عربية
لا توجد ترجمة قبطية