لا توجد ترجمة عربية
ⲓⲉⲣⲉⲙⲓⲟⲩ ⲉⲡⲓⲥⲧⲟⲗⲏ
لا توجد ترجمة عربية
(ⲁ︦) ⲡⲁⲛⲧⲓⲅⲣⲁⲫⲟⲛ ⲛ̀ⲧⲉ ϯⲉⲡⲓⲥⲧⲟⲗⲏ ⲑⲏ ⲉⲧⲁϥⲟⲩⲟⲣⲡⲥ ⲛ̀ϫⲉ ⲓⲉⲣⲉⲙⲓⲁⲥ ϩⲁ ⲛⲉⲉⲭⲙⲁⲗⲱⲧⲟⲥ ⲉⲧⲟⲩⲛⲁⲉⲛⲟⲩ ⲉ̀ⲃⲁⲃⲩⲗⲱⲛ ⲉ̀ⲃⲟⲗ ϩⲓⲧⲉⲛ ⲡⲟⲩⲣⲟ ⲙ̀ⲃⲁⲃⲩⲗⲱⲛ. ⲉ̀ⲧⲁⲙⲱⲟⲩ ⲕⲁⲧⲁ ⲫⲣⲏϯ ⲉⲧⲁⲩⲥⲁϩⲛⲏⲧϥ ⲉ̀ⲃⲟⲗ ϩⲓⲧⲉⲛ ⲫϯ.
لا توجد ترجمة عربية
(ⲃ︦) ϫⲉ ⲉⲑⲃⲉ ⲛⲉⲧⲉⲛⲛⲟⲃⲓ ⲛⲏ ⲉⲧⲁⲣⲉⲧⲉⲛⲁⲓⲧⲟⲩ ⲙ̀ⲡⲉⲙ̀ⲑⲟ ⲙ̀ⲫϯ. ⲉⲩⲉ̀ϭⲓ ⲑⲏⲛⲟⲩ ⲛ̀ⲉⲭⲙⲁⲗⲱⲧⲟⲥ ⲉ̀ⲃⲁⲃⲩⲗⲱⲛ. ⲉ̀ⲃⲟⲗ ϩⲓⲧⲉⲛ ⲛⲁⲃⲟⲩⲭⲟⲇⲟⲛⲟⲥⲟⲣ ⲡⲟⲩⲣⲟ ⲙ̀ⲃⲁⲃⲩⲗⲱⲛ.
لا توجد ترجمة عربية
(ⲅ︦) ⲁⲣⲉⲧⲉⲛϣⲁⲛϣⲉ ⲟⲩⲛ ⲉ̀ϧⲟⲩⲛ ⲉ̀ⲃⲁⲃⲩⲗⲱⲛ. ⲉⲣⲉⲧⲉⲛϣⲱⲡⲓ ⲙ̀ⲙⲁⲩ ⲛ̀ⲟⲩⲙⲏϣ ⲛ̀ⲣⲟⲙⲡⲓ ⲛⲉⲙ ⲟⲩⲛⲓϣϯ ⲛ̀ⲭⲣⲟⲛⲟⲥ ϣⲁ ⲍ̅ ⲛ̀ⲅⲉⲛⲉⲁ ⲙⲉⲛⲉⲛⲥⲁ ⲛⲁⲓ ⲇⲉ ⲉⲓⲉ̀ⲉⲛ ⲑⲏⲛⲟⲩ ⲉ̀ⲃⲟⲗ ⲙ̀ⲙⲁⲩ ϧⲉⲛ ⲟⲩϩⲓⲣⲏⲛⲏ.
لا توجد ترجمة عربية
(ⲇ︦) ϯⲛⲟⲩ ⲇⲉ ⲉⲣⲉⲧⲉⲛⲉ̀ⲛⲁⲩ ϧⲉⲛ ⲃⲁⲃⲩⲗⲱⲛ ⲉ̀ϩⲁⲛⲛⲟⲩϯ ⲛ̀ϩⲁⲧ. ⲛⲉⲙ ϩⲁⲛⲛⲟⲩⲃ ⲛⲉⲙ ϩⲁⲛϣⲉ ⲉⲩϥⲁⲓ ⲙ̀ⲙⲱⲟⲩ ϧⲉⲛ ⲧⲟⲩⲛⲁϩⲃⲓ ⲉⲩⲧⲁⲙⲟ ⲛ̀ⲟⲩϩⲟϯ ⲉ̀ⲛⲓⲉⲑⲛⲟⲥ.
لا توجد ترجمة عربية
(ⲉ︦) ⲁⲛⲁⲩ ⲟⲩⲛ ⲙⲏⲡⲱⲥ ϩⲱⲧⲉⲛ ⲛ̀ⲧⲉⲧⲉⲛⲓⲛⲓ ⲛ̀ⲛⲓⲁⲗⲗⲟⲫⲩⲗⲟⲥ. ⲟⲩⲟϩ ⲛ̀ⲧⲉ ⲟⲩϩⲟϯ ⲧⲁϩⲉ ⲑⲏⲛⲟⲩ ⲉ̀ϩⲣⲏⲓ ⲉ̀ϫⲱⲟⲩ. ⲁⲣⲉⲧⲉⲛϣⲁⲛⲛⲁⲩ ⲉ̀ⲟⲩⲙⲏϣ ϩⲓⲫⲁϩⲟⲩ ⲙ̀ⲙⲱⲟⲩ. ⲛⲉⲙ ϩⲓⲧϩⲏ. ⲉⲩⲟⲩⲱϣⲧ ⲙ̀ⲙⲱⲟⲩ.
لا توجد ترجمة عربية
(ⲋ︦) ⲁϫⲟⲥ ⲛ̀ⲑⲱⲧⲉⲛ ϧⲉⲛ ⲡⲉⲧⲉⲛϩⲏⲧ. ϫⲉ ⲛ̀ⲑⲟⲕ ⲉⲧⲉⲥϣⲉ ⲛ̀ⲟⲩⲱϣⲧ ⲛⲁⲕ ⲫⲛⲏⲃ.
لا توجد ترجمة عربية
(ⲍ︦) ⲡⲁⲁⲅⲅⲉⲗⲟⲥ ⲅⲁⲣ ⲭⲏ ⲛⲉⲙⲱⲧⲉⲛ. ⲛ̀ⲑⲟϥ ⲉⲑⲛⲁⲕⲱϯ ⲛ̀ⲥⲁ ⲛⲉⲧⲉⲛⲯⲩⲭⲏ.
لا توجد ترجمة عربية
(ⲏ︦) ⲡⲟⲩⲗⲁⲥ ⲅⲁⲣ ϥϧⲏϧ ⲉ̀ⲃⲟⲗ ϩⲓⲧⲉⲛ ⲟⲩϩⲁⲙϣⲉ. ⲛ̀ⲑⲱⲟⲩ ⲇⲉ ⲉⲩⲟⲓ ⲛ̀ⲓⲉⲡⲛ̀ⲛⲟⲩⲃ ⲛⲉⲙ ⲓⲉⲡⲛ̀ϩⲁⲧ. ϩⲁⲛⲙⲉⲑⲛⲟⲩϫ ⲛⲉ. ⲟⲩⲟϩ ⲙ̀ⲙⲟⲛ ϣ̀ϫⲟⲙ ⲙ̀ⲙⲱⲟⲩ ⲉ̀ⲥⲁϫⲓ.
لا توجد ترجمة عربية
(ⲑ︦) ⲟⲩⲟϩ ⲙ̀ⲫⲣⲏϯ ⲛ̀ⲟⲩⲡⲁⲣⲑⲉⲛⲟⲥ. ⲙ̀ⲙⲁⲓⲥⲟⲗⲥⲉⲗ ⲥⲉϭⲓ ⲛ̀ⲟⲩⲛⲟⲩⲃ. ⲓⲉ ⲟⲩϩⲁⲧ ⲉ̀ⲃⲟⲗ ⲥⲉⲑⲁⲙⲓⲟ ⲛ̀ϩⲁⲛⲭⲗⲟⲙ ⲉ̀ϫⲉⲛ ⲧⲁⲫⲉ ⲛ̀ⲛⲟⲩⲛⲟⲩϯ.
لا توجد ترجمة عربية
(ⲓ︦) ⲉ̀ϣⲱⲡ ⲇⲉ ⲟⲛ ⲁⲩϣⲁⲛⲱⲗⲓ ⲛ̀ϫⲉ ⲛⲓⲟⲩⲏⲃ ⲛ̀ⲟⲩⲛⲟⲩⲃ ⲓⲉ ⲟⲩϩⲁⲧ. ⲉ̀ⲃⲟⲗ ϩⲁ ⲛⲟⲩⲛⲟⲩϯ ⲥⲉϭⲟ ⲙ̀ⲙⲟϥ ⲉ̀ⲃⲟⲗ ⲉ̀ⲣⲱⲟⲩ.
لا توجد ترجمة عربية
(ⲓ︦ⲁ︦) ⲉⲩⲉ̀ϯ ⲇⲉ ⲉ̀ⲃⲟⲗ ⲙ̀ⲙⲟϥ ⲛ̀ⲛⲓⲕⲉⲡⲟⲣⲛⲏ ⲉⲧⲟϩⲓ ⲉ̀ⲣⲁⲧⲟⲩ. ⲥⲉⲥⲟⲗⲥⲉⲗ ⲇⲉ ⲙ̀ⲙⲱⲟⲩ ϧⲉⲛ ⲛⲓϩⲉⲃⲥⲱ ⲙ̀ⲫⲣⲏϯ ⲛ̀ⲛⲓⲣⲱⲙⲓ. ϩⲁⲛⲛⲟⲩϯ ⲛ̀ⲛⲟⲩⲃ. ⲛⲉⲙ ϩⲁⲛⲛⲟⲩϯ ⲛ̀ϩⲁⲧ. ⲛⲉⲙ ϩⲁⲛϣⲉ
لا توجد ترجمة عربية
(ⲓ︦ⲃ︦) ⲛⲁⲓ ⲇⲉ ⲙ̀ⲡⲁϣ̀ⲛⲟϩⲉⲙ ⲉ̀ⲃⲟⲗ ϩⲁ ⲟⲩϣⲏⲓⲃⲓ ⲛⲉⲙ ϩⲁⲛϩⲟⲗⲓ. ⲉⲩϫⲏⲗ ⲛ̀ⲟⲩϩⲃⲱⲥ ⲛ̀ϭⲏϫⲓ
لا توجد ترجمة عربية
(ⲓ︦ⲅ︦) ⲉⲩϥⲱϯ ⲙ̀ⲡⲟⲩϩⲟ ⲉ̀ⲃⲟⲗ ϩⲁ ⲡⲓϣⲱⲓϣ ⲛ̀ⲧⲉ ⲡⲓⲏⲓ. ⲫⲏ ⲉⲑⲟⲩⲉϩ ϩⲓϫⲱⲟⲩ ⲛ̀ϩⲟⲩⲟ.
لا توجد ترجمة عربية
(ⲓ︦ⲇ︦) ⲟⲩⲟϩ ⲟⲩⲟⲛ ϣⲃⲱⲧ ⲛ̀ⲧⲟⲧϥ. ⲙ̀ⲫⲣⲏϯ ⲛⲟⲩⲣⲱⲙⲓ ⲛ̀ⲣⲉϥϯϩⲁⲡ ⲛ̀ⲧⲉ ⲟⲩⲭⲱⲣⲁ. ⲫⲁⲓ ⲉⲧⲉ ⲁⲣⲉϣⲁⲛ ⲟⲩⲁⲓ ⲉⲣⲛⲟⲃⲓ ⲉ̀ⲣⲟϥ ⲙ̀ⲡⲁϥϧⲟⲑⲃⲉϥ.
لا توجد ترجمة عربية
(ⲓ︦ⲉ︦) ⲟⲩⲟⲛ ⲟⲩⲥⲏϥⲓ ⲇⲉ ϧⲉⲛ ⲧⲉϥⲟⲩⲓⲛⲁⲙ ⲛⲉⲙ ⲟⲩⲕⲉⲗⲉⲃⲓⲛ. ⲛ̀ⲑⲟϥ ⲇⲉ ⲙ̀ⲡⲁϥϣ̀ⲛⲁϩⲙⲉϥ ⲉ̀ⲃⲟⲗ ϧⲉⲛ ⲟⲩⲡⲟⲗⲉⲙⲟⲥ. ⲛⲉⲙ ϩⲁⲛⲥⲟⲛⲓ.
لا توجد ترجمة عربية
(ⲓ︦ⲋ︦) ϧⲉⲛ ⲫⲁⲓ ⲥⲉⲟⲩⲱⲛϩ ϫⲉ ϩⲁⲛⲛⲟⲩϯ ⲁⲛ ⲛⲉ. ⲙ̀ⲡⲉⲣⲉⲣϩⲟϯ ⲁⲛ ϧⲁⲧⲟⲩϩⲏ
لا توجد ترجمة عربية
(ⲓ︦ⲍ︦) ⲙ̀ⲫⲣⲏϯ ⲅⲁⲣ ⲛ̀ⲟⲩⲥⲕⲉⲩⲟⲥ ⲛ̀ⲧⲉ ⲟⲩⲣⲱⲙⲓ ⲉ̀ϣⲁϥϧⲟⲙϧⲉⲙ ϣⲁϥⲉⲣⲁⲧϣⲁⲩ. ⲡⲁⲓⲣⲏϯ ⲁⲩⲟⲓ ⲙⲙⲟϥ ⲛ̀ϫⲉ ⲛⲟⲩⲛⲟⲩϯ ⲉⲩⲧⲁϫⲣⲏⲟⲩⲧ ϧⲉⲛ ⲛⲓⲏⲓ ⲛⲟⲩⲃⲁⲗ ⲥⲉⲙⲉϩ ⲛ̀ϣⲱⲓϣ ⲉ̀ⲃⲟⲗ ϧⲉⲛ ⲛⲉⲛϭⲁⲗⲁⲩϫ ⲛ̀ⲧⲉ ⲛⲏ ⲉⲑⲛⲁ ⲉ̀ϧⲟⲩⲛ.
لا توجد ترجمة عربية
(ⲓ︦ⲏ︦) ⲟⲩⲟϩ ⲙ̀ⲫⲣⲏϯ ⲛ̀ⲟⲩⲁⲓ ⲉ̀ⲁϥϭⲓ ⲛ̀ⲟⲩⲟⲩⲣⲟ ⲛ̀ϫⲟⲛⲥ. ⲥⲉⲧⲁϫⲣⲏⲟⲩⲧ ⲛ̀ϫⲉ ⲛⲉϥⲁⲩⲗⲏ ⲉ̀ϣⲧⲉⲙⲧⲏⲓϥ ⲉ̀ⲫⲙⲟⲩ. ⲥⲉⲧⲁϫⲣⲟ ⲛ̀ⲛⲟⲩⲏⲓ ⲛ̀ϫⲉ ⲛⲓⲟⲩⲏⲃ. ϧⲉⲛ ϩⲁⲛⲣⲟ ⲛⲉⲙ ϩⲁⲛⲕⲉⲗⲓ. ⲛⲉⲙ ϩⲁⲛⲙⲟⲭⲗⲟⲩⲥ. ϩⲟⲡⲱⲥ ⲛ̀ⲧⲟⲩϣ̀ⲧⲉⲙⲕⲟⲗⲡⲟⲩ ⲛ̀ϫⲉ ⲛⲓⲥⲟⲛⲓ.
لا توجد ترجمة عربية
(ⲓ︦ⲑ︦) ⲥⲉϭⲉⲣⲟ ⲛ̀ϩⲁⲛⲙⲏϣ ⲛ̀ϧⲏⲃⲥ ⲉ̀ⲣⲱⲟⲩ ⲛⲁⲓ ⲉⲧⲉ ⲙ̀ⲙⲟⲛ ϣ̀ϫⲟⲙ ⲙ̀ⲙⲱⲟⲩ ⲉ̀ⲛⲁⲩ ⲉϩⲗⲓ.
لا توجد ترجمة عربية
(ⲕ︦) ⲉⲩϣⲟⲡ ⲙ̀ⲫⲣⲏϯ ⲛ̀ⲛⲓⲥⲟⲓ ⲉⲧϧⲉⲛ ⲛⲓⲏⲓ. ⲛⲟⲩϩⲏⲧ ⲇⲉ ⲡⲉϫⲱⲟⲩ ⲥⲉⲗⲱϫϩ ⲙ̀ⲙⲱⲟⲩ ⲛ̀ϫⲉ ⲛⲓϭⲁⲧϥⲓ ⲛ̀ⲧⲉ ⲡⲕⲁϩⲓ. ⲉⲩⲟⲩⲱⲙ ⲙ̀ⲙⲱⲟⲩ ⲛⲉⲙ ⲡⲟⲩϭⲓϩⲃⲟⲥ ⲛ̀ⲥⲉⲉⲙⲓ ⲁⲛ
لا توجد ترجمة عربية
(ⲕ︦ⲁ︦) ⲉ̀ⲁϥⲭⲙⲟⲙ ⲛ̀ϫⲉ ⲡⲟⲩϩⲟ ⲉ̀ⲃⲟⲗ ϧⲉⲛ ⲡⲓⲭⲣⲉⲙⲧⲥ ⲉⲧϧⲉⲛ ⲡⲓⲏⲓ.
لا توجد ترجمة عربية
(ⲕ︦ⲃ︦) ⲉ̀ⲁϥϣⲱⲡⲓ ϩⲓϫⲉⲛ ⲛⲟⲩⲥⲱⲙⲁ. ⲟⲩⲟϩ ϣⲁⲩⲟⲩⲟϩ ϩⲓϫⲉⲛ ⲧⲟⲩⲁⲫⲉ ⲛ̀ϫⲉ ⲛⲓϫⲉⲗϫⲟⲩ. ⲛⲉⲙ ⲛⲁⲃⲛⲏⲓ ⲛⲉⲙ ⲛⲓϩⲁⲗⲁϯ. ⲛⲉⲙ ⲛⲓⲕⲉⲉⲙⲱⲟⲩⲧ.
لا توجد ترجمة عربية
(ⲕ︦ⲅ︦) ϧⲉⲛ ⲫⲁⲓ ⲁⲣⲓⲉⲙⲓ ϫⲉ ϩⲁⲛⲛⲟⲩϯ ⲁⲛ ⲛⲉ. ⲙ̀ⲡⲉⲣⲉⲣϩⲟϯ ⲟⲩⲛ ϧⲁⲧⲟⲩϩⲏ
لا توجد ترجمة عربية
(ⲕ︦ⲇ︦) ⲡⲓⲛⲟⲩⲃ ⲉⲧⲭⲏ ϩⲓϫⲱⲟⲩ ⲉⲩⲙⲉⲧⲥⲁⲓⲉ ⲛⲱⲟⲩ. ⲁⲣⲉⲧⲉⲛϣⲧⲉⲙ ⲟⲩⲁⲓ ϥⲉⲧ ⲡⲟⲩϣⲏⲓⲃⲓ. ⲙ̀ⲡⲁⲩϣ̀ϯⲙⲟⲩⲉ. ⲟⲩⲇⲉ ⲅⲁⲣ ⲛⲁⲩⲉⲙⲓ ⲁⲛ ⲡⲉ ϩⲟⲧⲉ ⲉⲩⲟⲩⲱⲧϩ ⲙ̀ⲙⲱⲟⲩ.
لا توجد ترجمة عربية
(ⲕ︦ⲉ︦) ⲉⲧⲁⲩϣⲟⲡⲟⲩ ⲉ̀ⲃⲟⲗ ϧⲉⲛ ⲧⲓⲙⲏ ⲛⲓⲃⲉⲛ. ⲛⲁⲓ ⲉⲧⲉ ⲙ̀ⲙⲟⲛ ⲡⲛ̅ⲁ̅ ⲛ̀ϧⲏⲧⲟⲩ
لا توجد ترجمة عربية
(ⲕ︦ⲋ︦) ⲉⲩϥⲁⲓ ⲙ̀ⲙⲱⲟⲩ ϩⲓ ⲧⲟⲩⲛⲁϩⲃⲓ. ⲉⲩⲧⲁⲙⲟ ⲙ̀ⲡⲟⲩϣⲱϣ ⲉ̀ⲛⲓⲣⲱⲙⲓ.
لا توجد ترجمة عربية
(ⲕ︦ⲍ︦) ⲥⲉϣⲓⲡⲓ ⲇⲉ ⲛ̀ϫⲉ ⲛⲏ ⲉⲧϣⲉⲙϣⲓ ⲙ̀ⲙⲱⲟⲩ. ⲙⲏⲡⲟⲧⲉ ⲛ̀ⲥⲉϩⲉⲓ ⲁⲛ. ⲥⲉⲛⲁϣ̀ⲧⲱⲟⲩⲛⲟⲩ ⲙ̀ⲙⲁⲩⲁⲧⲟⲩ. ⲟⲩⲇⲉ ⲁⲣⲉϣⲁⲛ ⲟⲩⲁⲓ ⲧⲁϩⲟϥ ⲉ̀ⲣⲁⲧϥ ⲛ̀ⲛⲉϥⲕⲓⲙ ⲉ̀ⲃⲟⲗ ϩⲓⲧⲟⲧϥ ⲙ̀ⲙⲁⲩⲁⲧϥ. ⲟⲩⲇⲉ ⲁϥϣⲁⲛⲣⲓⲕⲓ ⲛ̀ⲛⲉϥⲟϩⲓ ⲉ̀ⲣⲁⲧϥ. ⲁⲗⲗⲁ ⲙ̀ⲫⲣⲏϯ ⲛ̀ⲛⲓⲇⲱⲣⲟⲛ. ⲉⲩⲓⲛⲓ ⲙ̀ⲙⲱⲟⲩ ⲛ̀ⲛⲓⲣⲉϥⲙⲱⲟⲩⲧ.
لا توجد ترجمة عربية
(ⲕ︦ⲏ︦) ⲡⲁⲓⲣⲏϯ ⲥⲉⲓⲛⲓ ⲛⲱⲟⲩ. ⲛⲓϣⲟⲩϣⲱⲟⲩϣⲓ ⲇⲉ. ⲁⲩϣⲁⲛⲉⲛⲟⲩ ⲛⲱⲟⲩ. ⲛⲓⲟⲩⲏⲃ ⲉⲧⲉⲣⲭⲣⲁⲥⲑⲉ ⲙ̀ⲙⲱⲟⲩ. ⲡⲁⲓⲣⲏϯ ⲛ̀ⲟⲩⲕⲉϩⲓⲟⲙⲓ ⲥⲉⲙⲟⲩⲗϩ ⲉ̀ⲃⲟⲗ ⲛ̀ϧⲏⲧⲟⲩ. ⲟⲩⲇⲉ ⲟⲩϩⲏⲕⲓ. ⲟⲩⲇⲉ ⲟⲩⲁⲧϫⲟⲙ
لا توجد ترجمة عربية
(ⲕ︦ⲑ︦) ⲥⲉⲛⲁϯ ⲛⲁϥ ⲁⲛ ⲉ̀ⲃⲟⲗ ϧⲉⲛ ⲛⲟⲩϣⲟⲩϣⲱⲟⲩϣⲓ. ⲉⲩϭⲟϩ ⲉ̀ⲛⲏ ⲉⲧⲟⲓ ⲛ̀ⲕⲉⲙⲁ ⲛⲉⲙ ⲛⲓⲙⲏⲥⲓ. ⲉ̀ⲃⲟⲗ ϧⲉⲛ ⲛⲁⲓ ⲟⲩⲛ ⲉ̀ⲁⲣⲉⲧⲉⲛⲉⲙⲓ ϫⲉ ϩⲁⲛⲛⲟⲩϯ ⲁⲛ ⲛⲉ ⲙ̀ⲡⲉⲣⲉⲣϩⲟϯ ϧⲁⲧⲟⲩϩⲏ.
لا توجد ترجمة عربية
(ⲗ︦) ⲡⲱⲥ ⲅⲁⲣ ⲥⲉⲛⲁⲙⲟⲩϯ ⲉ̀ⲣⲱⲟⲩ ϫⲉ ⲛⲟⲩϯ ϫⲉ ϩⲁⲛϩⲓⲟⲙⲓ ⲉⲧⲭⲱ ϧⲁⲣⲱⲟⲩ ⲛ̀ϩⲁⲛⲛⲟⲩϯ ⲛ̀ϣⲉ. ⲛⲉⲙ ϩⲁⲛⲛⲟⲩⲃ ⲛⲉⲙ ϩⲁⲛϩⲁⲧ.
لا توجد ترجمة عربية
(ⲗ︦ⲁ︦) ⲟⲩⲟϩ ⲛⲓⲟⲩⲏⲃ ϧⲉⲛ ⲛⲟⲩⲏⲓ ⲥⲉⲙⲟⲩⲛⲕ ⲙ̀ⲙⲱⲟⲩ. ⲉⲣⲉ ⲛⲟⲩϩⲃⲱⲥ ⲫⲏϧ ⲟⲩⲟϩ ⲛⲟⲩⲁⲫⲉ ⲛⲉⲙ ⲛⲟⲩⲙⲟⲣⲧ ⲉⲩϧⲏⲕ. ⲉⲣⲉ ⲛⲟⲩⲁⲫⲉ ϭⲟⲣⲡ ⲉ̀ⲃⲟⲗ.
لا توجد ترجمة عربية
(ⲗ︦ⲃ︦) ⲛⲁⲩϩⲉⲙϩⲉⲙ ⲇⲉ ⲉⲩⲱϣ ⲉ̀ⲃⲟⲗ ⲙ̀ⲡⲉⲙ̀ⲑⲟ ⲛ̀ⲛⲟⲩⲛⲟⲩϯ. ⲙ̀ⲫⲣⲏϯ ⲛ̀ϩⲁⲛⲟⲩⲟⲛ ⲉⲩϧⲉⲛ ⲟⲩⲇⲓⲡⲛⲟⲛ.
لا توجد ترجمة عربية
(ⲗ︦ⲅ︦) ϣⲁⲩⲱⲗⲓ ⲉ̀ⲃⲟⲗ ϧⲉⲛ ⲛⲟⲩϩⲃⲱⲥ ⲛ̀ϫⲉ ⲛⲓⲟⲩⲏⲃ. ⲛ̀ⲥⲉⲧⲏⲓⲧⲟⲩ ϩⲓ ⲛⲟⲩϩⲓⲟⲙⲓ ⲛⲉⲙ ⲛⲟⲩⲁⲗⲱⲟⲩⲓ.
لا توجد ترجمة عربية
(ⲗ︦ⲇ︦) ⲟⲩⲇⲉ ⲁⲩϣⲁⲛⲉⲣⲡⲉⲧϩⲱⲟⲩ ⲛⲱⲟⲩ ⲛ̀ϫⲉ ϩⲗⲓ ⲟⲩⲇⲉ ⲁⲩϣⲁⲛⲉⲣⲡⲉⲑⲛⲁⲛⲉϥ. ⲙ̀ⲙⲟⲛ ϣ̀ϫⲟⲙ ⲙ̀ⲙⲱⲟⲩ ⲉ̀ϯϣⲉⲃⲓⲱ. ⲟⲩⲇⲉ ⲙ̀ⲙⲟⲛ ϣ̀ϫⲟⲙ ⲙ̀ⲙⲱⲟⲩ ⲉⲑⲁⲙⲓⲉ ⲟⲩⲣⲟ. ⲟⲩⲇⲉ ⲡⲁⲗⲓⲛ ⲉ̀ⲉⲗϥ.
لا توجد ترجمة عربية
(ⲗ︦ⲉ︦) ⲟⲩⲇⲉ ⲟⲩⲙⲉⲧⲣⲁⲙⲁⲟ ⲟⲩⲇⲉ ⲟⲩϩⲙⲟⲧ. ⲙ̀ⲙⲟⲛ ϣ̀ϫⲟⲙ ⲙ̀ⲙⲱⲟⲩ ⲉ̀ⲧⲏⲓⲧⲟⲩ. ⲉ̀ϣⲱⲡ ⲁⲣⲉϣⲁⲛ ⲟⲩⲁⲓ ⲱϣ ⲛⲱⲟⲩ ⲛ̀ⲟⲩⲉⲩⲭⲏ. ⲟⲩⲟϩ ⲛ̀ⲧⲉϥϣ̀ⲧⲉⲙⲧⲏⲓⲥ ⲛ̀ⲛⲟⲩⲕⲱϯ ⲛ̀ⲥⲱⲥ.
لا توجد ترجمة عربية
(ⲗ︦ⲋ︦) ⲛ̀ⲛⲟⲩϣⲛⲟϩⲉⲙ ⲛ̀ⲟⲩⲣⲱⲙⲓ ⲉ̀ⲃⲟⲗ ϧⲉⲛ ⲫⲙⲟⲩ. ⲟⲩⲇⲉ ⲟⲩϫⲱⲃ ⲛ̀ⲛⲟⲩϣ̀ⲛⲁϩⲙⲉϥ ⲛ̀ⲧⲉ ⲡⲉⲧϫⲟⲣ ⲉ̀ⲣⲟϥ.
لا توجد ترجمة عربية
(ⲗ︦ⲍ︦) ⲟⲩⲣⲱⲙⲓ ⲙ̀ⲃⲉⲗⲗⲉ ⲛ̀ⲛⲟⲩϣ̀ⲑⲣⲉϥⲛⲁⲓ ⲙ̀ⲃⲟⲗ. ⲟⲩⲣⲱⲙⲓ ⲉϥϧⲉⲛ ⲟⲩⲁⲛⲁⲅⲕⲏ ⲛ̀ⲛⲟⲩϣ̀ⲛⲁϩⲙⲉϥ.
لا توجد ترجمة عربية
(ⲗ︦ⲏ︦) ⲟⲩⲇⲉ ⲟⲩⲭⲏⲣⲁ ⲛ̀ⲛⲟⲩⲛⲁⲓ ⲛⲁⲥ. ⲟⲩⲟⲣⲫⲁⲛⲟⲥ ⲛ̀ⲛⲟⲩⲉⲣⲡⲉⲑⲛⲁⲛⲉϥ ⲛⲁϥ.
لا توجد ترجمة عربية
(ⲗ︦ⲑ︦) ⲉⲩⲟⲛⲓ ⲛ̀ⲛⲓⲱⲛⲓ ⲛ̀ⲧⲉ ⲡⲧⲱⲟⲩ. ⲛⲓⲛⲟⲩϯ ⲛ̀ϣⲉ ⲛⲉⲙ ⲛⲓⲓⲉⲡⲛ̀ⲛⲟⲩⲃ. ⲛⲉⲙ ⲛⲓⲓⲉⲡⲛ̀ϩⲁⲧ. ⲛⲏ ⲇⲉ ⲉⲧⲙⲟⲛⲕ ⲙ̀ⲙⲱⲟⲩ ⲉⲩⲉ̀ϭⲓϣⲓⲡⲓ
لا توجد ترجمة عربية
(ⲙ︦) ⲡⲱⲥ ⲟⲩⲛ ⲥϣⲉ ⲉ̀ⲙⲉⲩⲓ ⲉ̀ⲣⲱⲟⲩ ⲓⲉ ⲉ̀ⲙⲟⲩϯ ϫⲉ ⲛⲟⲩϯ ⲉⲧⲓ ⲇⲉ ⲛⲉⲙ ⲛ̀ⲑⲱⲟⲩ ϩⲱⲟⲩ ⲛⲓⲭⲁⲗⲇⲉⲟⲥ ⲉⲩϯϣⲱϣ ⲛⲱⲟⲩ.
لا توجد ترجمة عربية
(ⲙ︦ⲁ︦) ⲉ̀ϣⲱⲡ ⲁⲩϣⲁⲛⲛⲁⲩ ⲉ̀ⲣⲱⲟⲩ ⲉⲩⲟⲓ ⲛ̀ϣⲉ. ⲙ̀ⲙⲟⲛ ϣ̀ϫⲟⲙ ⲙ̀ⲙⲱⲟⲩ ⲉ̀ⲥⲁϫⲓ. ϣⲁ ⲡⲉⲛⲃⲏⲗ. ⲛ̀ⲥⲉⲉⲣⲁⲝⲓⲟⲓⲛ ⲙ̀ⲙⲟϥ ⲉ̀ⲑⲣⲟⲩⲙⲟⲩϯ.
لا توجد ترجمة عربية
(ⲙ︦ⲃ︦) ϩⲱⲥ ⲉ̀ⲟⲩⲟⲛ ϣ̀ϫⲟⲙ ⲙ̀ⲙⲱⲟⲩ ⲛ̀ⲑⲱⲟⲩ ⲉ̀ⲁⲩⲉⲙⲓ ⲉ̀ⲣⲱⲟⲩ ⲉ̀ⲭⲁⲩ ⲛ̀ⲥⲱⲟⲩ. ⲙ̀ⲙⲟⲛ ⲉⲙⲓ ⲅⲁⲣ ⲛϧⲏⲧⲟⲩ.
لا توجد ترجمة عربية
(ⲙ︦ⲅ︦) ⲛⲓϩⲓⲟⲙⲓ ⲇⲉ ⲥⲉⲙⲟⲩⲣ ⲛ̀ϩⲁⲛⲛⲟϩ ⲉ̀ⲣⲱⲟⲩ. ⲥⲉϩⲉⲙⲥⲓ ϩⲓ ⲛⲓⲙⲱⲓⲧ. ⲥⲉⲉⲣϣⲟⲩϣⲱⲟⲩϣⲓ ⲉ̀ⲃⲟⲗ ϧⲉⲛ ⲛⲓϣⲟ. ⲉ̀ϣⲱⲡ ⲇⲉ ⲁⲩϣⲁⲛⲥⲉⲕ ⲟⲩⲓ ⲙ̀ⲙⲱⲟⲩ. ⲛ̀ϫⲉ ⲟⲩⲁⲓ ⲉ̀ⲃⲟⲗ ϧⲉⲛ ⲛⲉⲧⲥⲓⲛⲓ. ⲛ̀ⲧⲉϥⲛⲕⲟⲧ ⲛⲉⲙⲁⲥ. ϣⲁⲥϯⲭⲟϩ ⲛ̀ⲧⲉϣ̀ⲫⲉⲣⲓ ϫⲉ ⲙ̀ⲡⲟⲩⲧⲁⲓⲟⲥ ⲛ̀ⲑⲟⲥ ⲙ̀ⲡⲉⲥⲣⲏϯ ⲟⲩⲇⲉ ⲡⲉⲥⲛⲟϩ ⲙ̀ⲡⲉϥⲥⲱⲗⲡ.
لا توجد ترجمة عربية
(ⲙ︦ⲇ︦) ϩⲱⲃ ⲛⲓⲃⲉⲛ ⲉⲧϣⲟⲡ ⲛ̀ϧⲏⲧⲟⲩ ϩⲁⲛⲙⲉⲑⲛⲟⲩϫ ⲛⲉ. ⲡⲱⲥ ⲟⲛ ⲛ̀ⲥϣⲉ ⲉ̀ⲙⲉⲩⲓ. ⲓⲉ ⲉ̀ⲙⲟⲩϯ ⲉ̀ⲣⲱⲟⲩ ϫⲉ ⲛⲟⲩϯ.
لا توجد ترجمة عربية
(ⲙ︦ⲉ︦) ⲉⲩⲙⲟⲛⲕ ⲉ̀ⲃⲟⲗ ϩⲓⲧⲉⲛ ϩⲁⲛⲁⲙϣⲏⲟⲩⲓ ⲛⲉⲙ ϩⲁⲛϩⲁⲙⲛⲟⲩⲃ. ⲙ̀ⲡⲁⲩϣⲱⲡⲓ ⲛ̀ϩⲗⲓ ⲉ̀ⲃⲏⲗ ⲉ̀ⲫⲏ ⲉ̀ϣⲁⲣⲉ ⲡⲓⲧⲉⲭⲛⲓⲧⲏⲥ. ⲟⲩⲱϣ ⲉ̀ⲑⲁⲙⲓⲟϥ
لا توجد ترجمة عربية
(ⲙ︦ⲋ︦) ⲛ̀ⲑⲱⲟⲩ ⲇⲉ ⲛⲏ ⲉⲧⲙⲟⲛⲕ ⲙ̀ⲙⲱⲟⲩ. ⲙ̀ⲡⲁⲩϣⲉⲣ ⲟⲩⲙⲏϣ ⲛ̀ⲥⲏⲟⲩ. ⲡⲱⲥ ⲟⲩⲟⲛ ϣ̀ϫⲟⲙ ⲛ̀ⲧⲉ ⲛⲏ ⲉⲧⲁⲩϣⲱⲡⲓ ⲉ̀ⲃⲟⲗ ϩⲓⲧⲟⲧⲟⲩ ⲉⲣⲛⲟⲩϯ
لا توجد ترجمة عربية
(ⲙ︦ⲍ︦) ⲁⲩⲥⲱϫⲡ ⲅⲁⲣ ⲛ̀ϫⲉ ϩⲁⲛⲙⲉⲑⲛⲟⲩϫ. ⲛⲉⲙ ϩⲁⲛϣⲱϣ ⲛ̀ⲛⲏ ⲉⲧⲁⲩⲥⲟⲩⲱⲛⲟⲩ.
لا توجد ترجمة عربية
(ⲙ︦ⲏ︦) ⲉ̀ϣⲱⲡ ⲅⲁⲣ ⲁϥϣⲁⲛⲓ̀ ⲉ̀ϫⲱⲟⲩ ⲛ̀ϫⲉ ⲟⲩⲡⲟⲗⲉⲙⲟⲥ. ⲛⲉⲙ ϩⲁⲛⲡⲉⲧϩⲱⲟⲩ ϣⲁⲩⲥⲟϭⲛⲓ ⲛⲉⲙ ⲛⲟⲩⲉⲣⲏⲟⲩ ⲛ̀ϫⲉ ⲛⲓⲟⲩⲏⲃ. ϫⲉ ⲁⲩⲛⲁⲭⲱⲡ ⲑⲱⲛ ⲛⲉⲙ ⲛⲟⲩⲛⲟⲩϯ.
لا توجد ترجمة عربية
(ⲙ︦ⲑ︦) ⲡⲱⲥ ⲟⲩⲛ ⲛ̀ⲧⲉⲧⲉⲛⲉⲙⲓ ⲁⲛ ϫⲉ ϩⲁⲛⲛⲟⲩϯ ⲁⲛ ⲛⲉ. ⲛⲏ ⲉⲧⲉ ⲙ̀ⲡⲁⲩϣ̀ⲛⲁϩⲙⲟⲩ ⲉ̀ⲃⲟⲗ ϧⲉⲛ ⲡⲓⲡⲟⲗⲉⲙⲟⲥ. ⲟⲩⲇⲉ ⲉ̀ⲃⲟⲗ ϧⲉⲛ ϩⲁⲛⲡⲉⲧϩⲱⲟⲩ.
لا توجد ترجمة عربية
(ⲛ︦) ⲉⲩⲟⲓ ⲅⲁⲣ ⲛ̀ϣⲉ ⲛⲉⲙ ϩⲁⲛⲓⲉⲡⲛ̀ϩⲁⲧ. ⲛⲉⲙ ϩⲁⲛⲓⲉⲡⲛ̀ⲛⲟⲩⲃ ⲉⲣⲉⲧⲉⲛⲉⲙⲓ ⲙⲉⲛⲉⲛⲥⲁ ⲛⲁⲓ. ϫⲉ ϩⲁⲛⲙⲉⲑⲛⲟⲩϫ ⲛⲉ.
لا توجد ترجمة عربية
(ⲛ︦ⲁ︦) ⲛⲓⲉⲑⲛⲟⲥ ⲅⲁⲣ. ⲛⲉⲙ ⲛⲓⲕⲉⲟⲩⲣⲱⲟⲩ ⲥⲉⲟⲩⲟⲛϩ ⲛⲱⲟⲩ ϫⲉ ϩⲁⲛⲛⲟⲩϯ ⲁⲛ ⲛⲉ. ⲁⲗⲗⲁ ϩⲁⲛϩⲃⲏⲟⲩⲓ ⲛ̀ϫⲓϫ ⲛ̀ⲣⲱⲙⲓ ⲛⲉ. ⲟⲩⲟϩ ⲙ̀ⲙⲟⲛ ϩⲗⲓ ⲛ̀ϩⲱⲃ ⲛ̀ⲧⲉ ⲫϯ ⲛ̀ϧⲏⲧⲟⲩ
لا توجد ترجمة عربية
(ⲛ︦ⲃ︦) ⲛⲓⲙ ⲟⲩⲛ ⲉⲧⲉ ⲛ̀ϥⲥⲱⲟⲩⲛ ⲁⲛ ϫⲉ ϩⲁⲛⲛⲟⲩϯ ⲁⲛ ⲛⲉ.
لا توجد ترجمة عربية
(ⲛ︦ⲅ︦) ⲟⲩⲟⲩⲣⲟ ⲅⲁⲣ ⲛ̀ⲧⲉ ⲟⲩⲭⲱⲣⲁ ⲛ̀ⲛⲟⲩϣⲧⲁϩⲟϥ ⲉ̀ⲣⲁⲧϥ. ⲟⲩⲇⲉ ⲟⲩⲙⲟⲩⲛϩⲱⲟⲩ ⲛ̀ⲛⲟⲩϣ̀ⲧⲏⲓϥ ⲛⲛⲓⲣⲱⲙⲓ.
لا توجد ترجمة عربية
(ⲛ︦ⲇ︦) ⲟⲩϩⲁⲡ ⲇⲉ ⲛ̀ⲛⲟⲩϣ̀ⲧⲏⲓϥ. ⲟⲩⲇⲉ ⲛ̀ⲛⲟⲩϣ̀ⲥⲱϯ ⲛ̀ⲛⲟⲩϭⲓⲛ̀ϫⲟⲛⲥ. ⲉⲩⲟⲓ ⲛ̀ⲁⲧϫⲟⲙ ⲙ̀ⲫⲣⲏϯ ⲛ̀ⲛⲓⲁⲃⲟⲕ. ⲉⲩⲟⲩⲧⲉ ⲧⲫⲉ ⲛⲉⲙ ⲡⲓⲕⲁϩⲓ.
لا توجد ترجمة عربية
(ⲛ︦ⲉ︦) ⲕⲉ ⲅⲁⲣ ⲉ̀ϣⲱⲡ ⲁϥϣⲁⲛϩⲉⲓ ⲛ̀ϫⲉ ⲟⲩⲭⲣⲱⲙ ϧⲉⲛ ⲡⲏⲓ ⲛ̀ⲛⲓⲛⲟⲩϯ ⲛ̀ϣⲉ. ⲉ̀ⲓ̀ ⲛ̀ⲛⲓⲓⲉⲃⲛ̀ⲛⲟⲩⲃ. ⲓⲉ ⲛⲓⲓⲉⲡⲛ̀ϩⲁⲧ. ⲛⲟⲩⲟⲩⲏⲃ. ⲙⲉⲛ ⲉⲩⲉ̀ⲫⲱⲧ ⲟⲩⲟϩ ⲉⲩⲉ̀ⲛⲟϩⲉⲙ. ⲛ̀ⲑⲱⲟⲩ ⲇⲉ ⲉⲩⲉ̀ⲣⲱⲕϩ ϧⲉⲛ ⲑⲙⲏϯ ⲙ̀ⲫⲣⲏϯ ⲛ̀ϩⲁⲛⲥⲟⲓ.
لا توجد ترجمة عربية
(ⲛ︦ⲋ︦) ⲟⲩⲟⲩⲣⲟ ⲇⲉ ⲛⲉⲙ ϩⲁⲛⲡⲟⲗⲉⲙⲟⲥ ⲛ̀ⲛⲟⲩϣⲟϩⲓ ⲉ̀ϧⲟⲩⲛ ⲉ̀ϫⲱⲟⲩ. ⲡⲱⲥ ⲟⲩⲛ ⲥϣⲉ ⲉ̀ⲙⲉⲩⲓ. ⲓⲉ ⲉ̀ⲙⲟⲩϯ ⲉ̀ⲣⲱⲟⲩ ϫⲉ ⲛⲟⲩϯ.
لا توجد ترجمة عربية
(ⲛ︦ⲍ︦) ⲛ̀ⲛⲟⲩⲛⲟϩⲉⲙ ⲉ̀ⲃⲟⲗ ϩⲁ ⲡⲥⲟⲛⲓ. ⲓⲉ ⲉ̀ⲃⲟⲗ ϩⲁ ⲛⲓⲣⲉϥϭⲓⲟⲩⲓ ϩⲁⲛⲛⲟⲩϯ ⲛ̀ϣⲉ ⲛⲉⲙ ϩⲁⲛⲓⲉⲡⲛ̀ⲛⲟⲩⲃ ⲛⲉⲙ ϩⲁⲛⲓⲉⲡⲛ̀ϩⲁⲧ
لا توجد ترجمة عربية
(ⲛ︦ⲏ︦) ⲛⲏ ⲉⲧⲉ ⲟⲩⲟⲛ ϣ̀ϫⲟⲙ ⲙ̀ⲙⲱⲟⲩ ϣⲁⲩⲱⲗⲓ ⲙ̀ⲡⲓⲛⲟⲩⲃ ⲉⲧϩⲓⲱⲧⲟⲩ ⲛⲉⲙ ⲡⲓϩⲁⲧ. ⲛⲉⲙ ⲡⲟⲩϩⲃⲱⲥ. ϣⲁⲩϭⲓⲧϥ ⲟⲩⲟϩ ⲉⲓϣⲉ ⲛⲱⲟⲩ. ⲟⲩⲇⲉ ⲛ̀ⲑⲱⲟⲩ ⲛ̀ⲛⲟⲩϣ̀ⲉⲣⲃⲟⲏⲑⲓⲛ ⲉ̀ⲣⲱⲟⲩ.
لا توجد ترجمة عربية
(ⲛ︦ⲑ︦) ϩⲱⲥ ⲧⲉϥⲥⲟⲧⲡ ⲛ̀ϫⲉ ⲟⲩⲟⲩⲣⲟ ⲉϥⲟⲩⲱⲛϩ ⲛ̀ⲧⲉϥϫⲟⲙ ⲉ̀ⲃⲟⲗ. ⲛⲉⲙ ⲟⲩⲥⲕⲉⲩⲟⲥ ϧⲉⲛ ⲟⲩⲏⲓ ⲉⲩⲉⲣⲭⲣⲓⲁ ⲙ̀ⲙⲟϥ ⲉ̀ϩⲟⲧⲉ ⲛⲓⲛⲟⲩϯ ⲙ̀ⲙⲉⲑⲛⲟⲩϫ.
لا توجد ترجمة عربية
(ⲝ︦) ⲡⲓⲣⲏ ⲙⲉⲛ ⲅⲁⲣ ⲛⲉⲙ ⲡⲓⲓⲟϩ ⲛⲉⲙ ⲛⲓⲥⲓⲟⲩ ⲉⲩⲟⲓ ⲛ̀ⲟⲩⲱⲓⲛⲓ. ⲟⲩⲟϩ ⲉⲩⲟⲩⲱⲣⲡ ⲙ̀ⲙⲱⲟⲩ ⲛ̀ⲧⲟⲩⲭⲣⲓⲁ. ⲥⲉⲟⲓ ⲛ̀ⲣⲉϥⲥⲱⲧⲉⲙ.
لا توجد ترجمة عربية
(ⲝ︦ⲁ︦) ⲡⲁⲓⲣⲏϯ ⲟⲩⲛ ⲟⲩⲥⲉⲧⲉⲃⲣⲏϫ ⲁⲥϣⲁⲛⲟⲩⲱⲛϩ. ϣⲁⲥⲉⲣⲟⲩⲱⲓⲛⲓ. ⲡⲁⲓⲡⲛ̅ⲁ̅ ⲣⲱϥ ⲛⲓϥⲓ ϧⲉⲛ ⲭⲱⲣⲁ ⲛⲓⲃⲉⲛ.
لا توجد ترجمة عربية
(ⲝ︦ⲃ︦) ⲟⲩⲟϩ ⲟⲩϭⲏⲡⲓ ⲁⲩϣⲁⲛⲥⲁϩⲛⲏⲧⲥ ⲉ̀ⲃⲟⲗ ϩⲓⲧⲉⲛ ⲫϯ. ⲉ̀ⲙⲟϣⲓ ϩⲓϫⲉⲛ ϯⲟⲓⲕⲟⲩⲙⲉⲛⲏ ⲧⲏⲣⲥ ϣⲁⲩϫⲱⲕ ⲙ̀ⲫⲏ ⲉⲧⲁⲩⲥⲁϩⲛⲏⲧϥ ⲛⲱⲟⲩ.
لا توجد ترجمة عربية
(ⲝ︦ⲅ︦) ⲡⲓⲭⲣⲱⲙ ⲇⲉ ⲁⲩϣⲁⲛⲟⲩⲟⲣⲡϥ ⲉ̀ⲃⲟⲗ ⲙ̀ⲡϣⲱⲓ ⲉ̀ⲙⲟⲩⲛⲕ ⲛ̀ⲛⲓⲧⲱⲟⲩ. ⲛⲉⲙ ⲛⲓⲇⲣⲩⲙⲟⲥ. ϣⲁϥⲓⲣⲓ ⲙ̀ⲫⲏ ⲉⲧⲁⲩⲥⲁϩⲛⲏⲧϥ ⲛⲁϥ. ⲛⲁⲓ ⲇⲉ ⲟⲩⲇⲉ ϧⲉⲛ ⲟⲩⲥⲙⲟⲧ. ⲟⲩⲇⲉ ϧⲉⲛ ⲟⲩϫⲟⲙ ⲥⲉⲟⲛⲓ ⲁⲛ ⲛ̀ⲛⲟⲩϯ.
لا توجد ترجمة عربية
(ⲝ︦ⲇ︦) ϧⲉⲛ ⲫⲁⲓ ⲟⲩⲛ ⲥϣⲉ ⲁⲛ ⲉ̀ⲙⲉⲩⲓ ⲉ̀ⲣⲱⲟⲩ. ⲟⲩⲇⲉ ⲉ̀ⲙⲟⲩϯ ⲉ̀ⲣⲱⲟⲩ ϫⲉ ⲛⲟⲩϯ. ⲙ̀ⲙⲟⲛ ϣ̀ϫⲟⲙ ⲙ̀ⲙⲱⲟⲩ. ⲟⲩⲇⲉ ⲉ̀ϯϩⲁⲡ ⲉⲩϩⲁⲡ. ⲟⲩⲇⲉ ⲉ̀ⲉⲣⲡⲉⲑⲛⲁⲛⲉϥ ⲛ̀ⲛⲓⲣⲱⲙⲓ.
لا توجد ترجمة عربية
(ⲝ︦ⲉ︦) ⲉ̀ⲁⲣⲉⲧⲉⲛⲉⲙⲓ ⲟⲩⲛ ϫⲉ ϩⲁⲛⲛⲟⲩϯ ⲁⲛ ⲛⲉ. ⲙ̀ⲡⲉⲣⲉⲣϩⲟϯ ϧⲁⲧⲟⲩϩⲏ.
لا توجد ترجمة عربية
(ⲝ︦ⲋ︦) ⲟⲩⲇⲉ ⲅⲁⲣ ⲟⲩⲟⲩⲣⲟ ⲛ̀ⲛⲟⲩⲥⲁϩⲟⲩⲓ ⲉ̀ⲣⲟϥ. ⲟⲩⲇⲉ ⲛ̀ⲛⲟⲩⲥⲙⲟⲩ ⲉ̀ⲣⲟϥ.
لا توجد ترجمة عربية
(ⲝ︦ⲍ︦) ϩⲁⲛⲙⲏⲓⲛⲓ ⲛ̀ⲧⲉ ⲧⲫⲉ ⲛ̀ⲛⲟⲩⲧⲁⲙⲱⲟⲩ ⲉ̀ⲛⲓⲉⲑⲛⲟⲥ. ⲟⲩⲇⲉ ⲛ̀ⲛⲟⲩⲉⲣⲟⲩⲱⲓⲛⲓ ⲙ̀ⲫⲣⲏϯ ⲙ̀ⲡⲓⲣⲏ. ⲟⲩⲇⲉ ⲛ̀ⲛⲟⲩϯⲟⲩⲱⲓⲛⲓ ⲙⲫⲣⲏϯ ⲙ̀ⲡⲓⲓⲟϩ.
لا توجد ترجمة عربية
(ⲝ︦ⲏ︦) ⲛⲁⲓ ⲛⲉ ⲛⲓⲑⲏⲣⲓⲟⲛ ⲉ̀ϩⲟⲧⲉⲣⲱⲟⲩ. ⲛⲏ ⲉⲧⲉ ⲟⲩⲟⲛ ϣ̀ϫⲟⲙ ⲙ̀ⲙⲱⲟⲩ ⲉⲫⲱⲧ. ⲉ̀ⲟⲩⲥⲕⲏⲡⲓ ⲉ̀ϩⲏⲟⲩ ⲛⲱⲟⲩ ⲕⲁⲧⲁ ⲣⲏϯ ⲛⲓⲃⲉⲛ.
لا توجد ترجمة عربية
(ⲝ︦ⲑ︦) ⲟⲩⲟϩ ⲟⲩϩⲱⲃ ⲟⲩⲟⲛϩ ϫⲉ ϩⲁⲛⲛⲟⲩϯ ⲁⲛ ⲛⲉ. ⲉⲑⲃⲉ ⲫⲁⲓ ⲙ̀ⲡⲉⲣⲉⲣϩⲟϯ ⲟⲩⲛ ϧⲁⲧⲟⲩϩⲏ
لا توجد ترجمة عربية
(ⲟ︦) ⲙ̀ⲫⲣⲏϯ ⲅⲁⲣ ⲛ̀ⲟⲩⲛⲁϣⲡⲓⲓⲣⲓ ϧⲉⲛ ⲟⲩⲃⲟⲛϯ. ⲛ̀ϥⲁⲣⲉϩ ⲁⲛ ⲉ̀ϩⲗⲓ ⲡⲁⲓⲣⲏϯ ⲛⲉ ⲛⲟⲩϯ ϩⲁⲛϣⲉ ⲛⲉⲙ ϩⲁ ⲛⲓⲉⲡⲛ̀ϩⲁⲧ. ⲛⲉⲙ ϩⲁⲛⲓⲉⲡⲛ̀ⲛⲟⲩⲃ
لا توجد ترجمة عربية
(ⲟ︦ⲁ︦) ⲡⲁⲓⲣⲏϯ ⲟⲛ ⲛ̀ϯⲣⲁⲙⲛⲟⲥ ⲉⲧϧⲉⲛ ⲡⲓϭⲱⲙ. ϣⲁⲣⲉ ϩⲁⲗⲏⲧ ⲛⲓⲃⲉⲛ ⲟⲩⲟϩ ϩⲓϫⲱⲥ. ⲓⲉ ⲙ̀ⲫⲣⲏϯ ⲟⲓ ⲛ̀ⲟⲩⲣⲉϥⲙⲱⲟⲩⲧ. ⲉϥⲣⲟϫⲡ ϧⲉⲛ ⲡⲭⲁⲕⲓ ⲁⲩⲟⲛⲓ ⲙ̀ⲙⲱⲟⲩ ⲛ̀ϫⲉ ⲛ̀ⲟⲩⲛⲟⲩϯ ϩⲁⲛϣⲉ. ⲛⲉⲙ ϩⲁⲛⲓⲉⲡⲛ̀ϩⲁⲧ. ⲛⲉⲙ ϩⲁⲛⲓⲉⲡⲛ̀ⲛⲟⲩⲃ.
لا توجد ترجمة عربية
(ⲟ︦ⲃ︦) ⲉ̀ⲃⲟⲗ ϧⲉⲛ ϯⲡⲟⲣⲫⲩⲣⲁ ⲛⲉⲙ ⲡⲓⲙⲁⲣⲙⲁⲣⲟⲛ ⲛ̀ⲛⲉϥⲗⲟϥⲗⲉϥ ⲉ̀ⲃⲟⲗ ϩⲓⲱⲧⲟⲩ. ⲉⲣⲉⲧⲉⲛⲉ̀ⲉⲙⲓ ϫⲉ ϩⲁⲛⲛⲟⲩϯ ⲁⲛ ⲛⲉ. ⲛ̀ⲑⲱⲟⲩ ⲇⲉ ⲉ̀ⲡϧⲁⲉ̀ ⲉⲩⲉ̀ⲟⲩⲟⲙⲟⲩ ⲉ̀ⲃⲟⲗ ϩⲓⲧⲟⲧⲟⲩ ⲙ̀ⲙⲁⲩⲁⲧⲟⲩ. ⲟⲩⲟϩ ⲉⲩⲉ̀ϣⲱⲡⲓ ⲛ̀ⲟⲩϣⲱϣ ϧⲉⲛ ⲧⲭⲱⲣⲁ.
لا توجد ترجمة عربية
(ⲟ︦ⲅ︦) ⲟⲩⲁⲅⲁⲑⲟⲛ ⲛ̀ϫⲉ ⲟⲩⲣⲱⲙⲓ ⲛ̀ⲑⲙⲏⲓ. ⲙ̀ⲙⲟⲛ ⲓⲇⲱⲗⲟⲛ ⲛ̀ⲧⲁϥ. ⲉϥⲉϣⲱⲡⲓ ⲅⲁⲣ ⲉϥⲟⲩⲏⲟⲩ ⲉ̀ⲃⲟⲗ ϩⲁ ⲛⲓϣⲱϣ.