لا توجد ترجمة عربية
(ⲁ︦) ⲉ̀ϣⲱⲡ ⲇⲉ ⲁⲩϣⲁⲛϫⲉⲙ ⲟⲩⲁⲓ ⲉϥⲙⲁϣⲓ ϧⲉⲛ ⲡⲓⲕⲁϩⲓ ⲫⲏ ⲉⲧⲉ ⲡϭ̅ⲥ̅ ⲡⲉⲕⲛⲟⲩϯ ⲛⲁⲧⲏⲓϥ ⲛⲁⲕ ⲉ̀ⲉⲣⲕⲗⲏⲣⲟⲛⲟⲙⲓⲛ ⲙ̀ⲙⲟϥ ⲉ̀ⲁϥϩⲉⲓ ϧⲉⲛ ⲧⲕⲟⲓ ⲛ̀ⲥⲉⲥⲱⲟⲩⲛ ⲁⲛ ⲙ̀ⲫⲏ ⲉⲧⲁϥⲙⲁϣϥ
لا توجد ترجمة عربية
(ⲃ︦) ⲉⲩⲉ̀ⲓ̀ ⲛ̀ϫⲉ ⲛⲉⲕϧⲉⲗⲗⲟⲓ ⲛⲉⲙ ⲛⲉⲕⲣⲉϥϯϩⲁⲡ ⲟⲩⲟϩ ⲉⲩⲉ̀ⲣⲱϣ ⲉ̀ϫⲉⲛ ⲛⲓⲃⲁⲕⲓ ⲉⲧⲕⲱϯ ⲉ̀ⲡⲉⲧⲙⲁϣⲓ
لا توجد ترجمة عربية
(ⲅ︦) ⲟⲩⲟϩ ⲉⲥⲉ̀ϣⲱⲡⲓ ⲛ̀ϫⲉ ϯⲃⲁⲕⲓ ⲉⲧϧⲉⲛⲧ ⲉ̀ⲡⲉⲧⲙⲁϣⲓ ⲟⲩⲟϩ ⲛⲓϧⲉⲗⲗⲟⲓ ⲛ̀ⲧⲉ ⲧⲃⲁⲕⲓ ⲉⲧⲉⲙ̀ⲙⲁⲩ ⲉⲩⲉ̀ϭⲓ ⲛ̀ⲟⲩⲃⲁϩⲥⲓ ⲉ̀ⲃⲟⲗ ϧⲉⲛ ϩⲁⲛⲉϩⲱⲟⲩ ⲑⲁⲓ ⲉⲧⲉ ⲙ̀ⲡⲉⲥⲉⲣϩⲱⲃ ⲟⲩⲇⲉ ⲙ̀ⲡⲉⲥⲥⲉⲕⲛⲁϩⲃⲉϥ
لا توجد ترجمة عربية
(ⲇ︦) ⲟⲩⲟϩ ⲛⲓϧⲉⲗⲗⲟⲓ ⲛ̀ⲧⲉ ϯⲃⲁⲕⲓ ⲉⲧⲉⲙ̀ⲙⲁⲩ ⲉⲩⲉ̀ⲓⲛⲓ ⲛ̀ϯⲃⲁϩⲥⲓ ⲉ̀ⲟⲩϧⲉⲗⲗⲟⲧ ⲉⲥⲛⲁϣⲧ ⲙ̀ⲡⲟⲩⲉⲣϩⲱⲃ ⲉ̀ⲣⲟⲥ ⲟⲩⲇⲉ ⲙ̀ⲡⲟⲩⲥⲁⲧⲥ ⲉⲩⲉ̀ϫⲱϫⲓ ⲛ̀ⲛⲉⲛⲕⲟⲃϩ ⲛ̀ϯⲃⲁϩⲥⲓ ϧⲉⲛ ϯϧⲉⲗⲗⲟⲧ
لا توجد ترجمة عربية
(ⲉ︦) ⲟⲩⲟϩ ⲉⲩⲉ̀ⲓ̀ ⲛ̀ϫⲉ ⲛⲓⲟⲩⲏⲃ ⲛⲓⲗⲉⲩⲓⲧⲏⲥ ϫⲉ ⲛ̀ⲑⲱⲟⲩ ⲡⲉ ⲉⲧⲁϥⲥⲟⲧⲡⲟⲩ ⲛ̀ϫⲉ ⲡϭ̅ⲥ̅ ⲡⲉⲕⲛⲟⲩϯ ⲉ̀ⲟϩⲓ ⲉ̀ⲣⲁⲧⲟⲩ ⲙ̀ⲡⲉϥⲙ̀ⲑⲟ ⲟⲩⲟϩ ⲉ̀ⲥⲙⲟⲩ ϧⲉⲛ ⲡⲉϥⲣⲁⲛ ⲟⲩⲟϩ ⲉⲩⲉ̀ϣⲱⲡⲓ ϧⲉⲛ ⲣⲱⲟⲩ ⲛ̀ϫⲉ ⲭⲱ ⲉ̀ⲃⲟⲗ ⲛⲓⲃⲉⲛ ⲛⲉⲙ ⲁⲛⲧⲓⲗⲟⲅⲓⲁ ⲛⲓⲃⲉⲛ
لا توجد ترجمة عربية
(ⲋ︦) ⲟⲩⲟϩ ⲛⲓϧⲉⲗⲗⲟⲓ ⲛ̀ⲧⲉ ϯⲃⲁⲕⲓ ⲉⲧⲉⲙ̀ⲙⲁⲩ ⲑⲏ ⲉⲧϧⲉⲛⲧ ⲉ̀ⲫⲏ ⲉⲧⲁⲩⲙⲁϣϥ ⲉⲩⲉ̀ⲭⲱ ⲛ̀ⲛⲟⲩϫⲓϫ ⲉ̀ϩⲣⲏⲓ ⲉ̀ϫⲉⲛ ⲧⲁⲫⲉ ⲛ̀ϯⲃⲁϩⲥⲓ ⲑⲏ ⲉⲧⲁⲩϫⲉϫ ⲛⲉⲥⲕⲟⲃϩ ϧⲉⲛ ϯϧⲉⲗⲗⲟⲧ
لا توجد ترجمة عربية
(ⲍ︦) ⲟⲩⲟϩ ⲉⲩⲉ̀ⲉⲣⲟⲩⲱ ⲉⲩϫⲱ ⲙ̀ⲙⲟⲥ ϫⲉ ⲛⲉⲛϫⲓϫ ⲙ̀ⲡⲟⲩⲫⲱⲛ ⲙ̀ⲡⲁⲓⲥⲛⲟϥ ⲉ̀ⲃⲟⲗ ⲟⲩⲟϩ ⲛⲉⲛⲃⲁⲗ ⲙ̀ⲡⲟⲩⲛⲁⲩ
لا توجد ترجمة عربية
(ⲏ︦) ⲭⲱ ⲉ̀ⲃⲟⲗ ⲙ̀ⲡⲉⲕⲗⲁⲟⲥ ⲡⲓⲥ̅ⲗ̅ ⲛⲏ ⲉⲧⲁⲕⲥⲟⲧⲟⲩ ⲡϭ̅ⲥ̅ ϧⲉⲛ ⲡⲕⲁϩⲓ ⲛ̀ⲭⲏⲙⲓ ϩⲓⲛⲁ ⲛ̀ⲧⲉϣ̀ⲧⲉⲙ ⲟⲩⲥⲛⲟϥ ⲛ̀ⲁⲑⲛⲟⲃⲓ ϣⲱⲡⲓ ϧⲉⲛ ⲡⲉⲕⲗⲁⲟⲥ ⲡⲓⲥ̅ⲗ̅ ⲟⲩⲟϩ ⲉⲩⲉ̀ⲛⲁⲓ ⲛⲱⲟⲩ ⲉ̀ⲃⲟⲗ ϩⲁ ⲡⲓⲥⲛⲟϥ
لا توجد ترجمة عربية
(ⲑ︦) ⲛ̀ⲑⲟⲕ ⲇⲉ ⲉⲕⲉ̀ⲱⲗⲓ ⲙ̀ⲡⲓⲥⲛⲟϥ ⲛ̀ⲁⲑⲛⲟⲃⲓ ⲉ̀ⲃⲟⲗ ϧⲉⲛ ⲑⲏⲛⲟⲩ ⲟⲩⲟϩ ⲉⲣⲉ ⲡⲓⲡⲉⲑⲛⲁⲛⲉϥ ϣⲱⲡⲓ ⲛⲁⲕ ⲁⲕϣⲁⲛⲓⲣⲓ ⲙ̀ⲡⲓⲡⲉⲑⲛⲁⲛⲉϥ ⲛⲉⲙ ⲡⲉⲑⲣⲁⲛⲁϥ ⲙ̀ⲡⲉⲙ̀ⲑⲟ ⲙ̀ⲡϭ̅ⲥ̅ ⲡⲉⲕⲛⲟⲩϯ
لا توجد ترجمة عربية
(ⲓ︦) ⲉ̀ϣⲱⲡ ⲇⲉ ⲁⲕϣⲁⲛϣⲉ ⲛⲁⲕ ⲉ̀ⲡⲓⲡⲟⲗⲉⲙⲟⲥ ⲉ̀ϫⲉⲛ ⲛⲉⲕϫⲁϫⲓ ⲛ̀ⲧⲉϥⲧⲏⲓⲧⲟⲩ ⲛ̀ϫⲉ ⲡϭ̅ⲥ̅ ⲡⲉⲕⲛⲟⲩϯ ⲉ̀ϧⲣⲏⲓ ⲉ̀ⲛⲉⲕϫⲓϫ ⲟⲩⲟϩ ⲛ̀ⲧⲉⲕϣⲉⲗ ⲛ̀ⲟⲩϣⲱⲗ
لا توجد ترجمة عربية
(ⲓ︦ⲁ︦) ⲟⲩⲟϩ ⲛ̀ⲧⲉⲕⲛⲁⲩ ϧⲉⲛ ⲛⲓϣⲱⲗ ⲉ̀ⲟⲩⲥϩⲓⲙⲓ ⲉ̀ⲛⲁⲛⲉⲥ ϧⲉⲛ ⲡⲉⲥⲥⲁⲓ ⲛ̀ⲧⲉⲕⲉⲣⲉⲡⲓⲑⲩⲙⲓⲛ ⲉ̀ⲣⲟⲥ ⲟⲩⲟϩ ⲛ̀ⲧⲉⲕϭⲓⲧⲥ ⲛⲁⲕ ⲉⲩⲥϩⲓⲙⲓ
لا توجد ترجمة عربية
(ⲓ︦ⲃ︦) ⲉⲕⲟⲗⲥ ⲉ̀ϧⲟⲩⲛ ⲉ̀ⲡⲉⲕⲏⲓ ⲉⲕⲉ̀ϧⲉⲕ ϩϫⲱⲥ ⲟⲩⲟϩ ⲉⲕⲉ̀ⲱⲗⲓ ⲛ̀ⲛⲉⲥⲓⲏⲃ
لا توجد ترجمة عربية
(ⲓ︦ⲅ︦) ⲟⲩⲟϩ ⲉⲕⲉ̀ⲱⲗⲓ ⲉ̀ⲃⲟⲗ ϩⲓⲱⲧⲥ ⲛ̀ⲛⲓϩⲃⲱⲥ ⲛ̀ⲧⲉ ⲧⲉⲥⲉⲭⲙⲁⲗⲱⲥⲓⲁ ⲟⲩⲟϩ ⲉⲥⲉ̀ϩⲉⲙⲥⲓ ϧⲉⲛ ⲡⲉⲕⲏⲓ ⲉⲥⲉ̀ⲣⲓⲙⲓ ⲉ̀ⲡⲉⲥⲓⲱⲧ ⲛⲉⲙ ⲧⲉⲥⲙⲁⲩ ⲛ̀ⲟⲩⲁⲃⲟⲧ ⲛ̀ⲉϩⲟⲟⲩ ⲟⲩⲟϩ ⲙⲉⲛⲉⲛⲥⲁ ⲛⲁⲓ ⲉⲕⲉ̀ϣⲉ ⲛⲁⲕ ⲉ̀ϧⲟⲩⲛ ϩⲁⲣⲟⲥ ⲉⲕⲉ̀ϣⲱⲡⲓ ⲛⲉⲙⲁⲥ ⲟⲩⲟϩ ⲉⲥⲉ̀ⲉⲣⲥϩⲓⲙⲓ ⲛⲁⲕ
لا توجد ترجمة عربية
(ⲓ︦ⲇ︦) ⲟⲩⲟϩ ⲉⲥⲉ̀ϣⲱⲡⲓ ⲁⲕϣⲁⲛϣ̀ⲧⲉⲙⲟⲩⲁϣⲥ ⲉⲕⲉ̀ⲭⲁⲥ ⲉ̀ⲃⲟⲗ ⲉⲥⲟⲓ ⲛ̀ⲣⲉⲙϩⲉ ⲛ̀ⲛⲉⲕⲧⲏⲓⲥ ⲉ̀ⲃⲟⲗ ϧⲁ ϩⲁⲧ ⲟⲩⲟϩ ⲛ̀ⲛⲉⲕⲉⲣⲁⲑⲉⲧⲓⲛ ⲙ̀ⲙⲟⲥ ϫⲉ ⲟⲩⲏⲓ ⲁⲕⲑⲉⲃⲓⲟⲥ
لا توجد ترجمة عربية
(ⲓ︦ⲉ︦) ⲉ̀ϣⲱⲡ ⲇⲉ ⲁⲣⲉϣⲁⲛ ⲥϩⲓⲙⲓ ⲥⲛⲟⲩϯ ϣⲱⲡⲓ ⲛ̀ⲟⲩⲣⲱⲙⲓ ⲟⲩⲓ ⲙ̀ⲙⲱⲟⲩ ⲉϥⲙⲉⲓ ⲙ̀ⲙⲟⲥ ⲟⲩⲟϩ ⲟⲩⲓ ⲙ̀ⲙⲱⲟⲩ ⲉϥⲙⲟⲥϯ ⲙ̀ⲙⲟⲥ ⲛ̀ⲧⲟⲩⲙⲓⲥⲓ ⲛⲁϥ ⲛ̀ϫⲉ ⲑⲏ ⲉⲧⲉϥⲙⲉⲓ ⲙ̀ⲙⲟⲥ ⲛⲉⲙ ⲑⲏ ⲉⲧⲉϥⲙⲟⲥϯ ⲙ̀ⲙⲟⲥ ⲟⲩⲟϩ ⲛ̀ⲧⲉ ⲟⲩϣⲏⲣⲓ ⲛ̀ϣⲁⲙⲓⲥⲓ ϣⲱⲡⲓ ⲛ̀ⲑⲏ ⲉⲧⲉϥⲙⲟⲥϯ ⲙ̀ⲙⲟⲥ
لا توجد ترجمة عربية
(ⲓ︦ⲋ︦) ⲟⲩⲟϩ ⲉⲥⲉ̀ϣⲱⲡⲓ ϧⲉⲛ ⲡⲓⲉϩⲟⲟⲩ ⲉⲧⲉϥⲛⲁϯ ⲛ̀ⲛⲉϥϩⲩⲡⲁⲣⲭⲟⲛⲧⲁ ⲛ̀ⲕⲗⲏⲣⲟⲛⲟⲙⲓⲁ ⲛ̀ⲛⲉϥϣⲏⲣⲓ ⲛ̀ⲛⲉϥϣ̀ϫⲉⲙϫⲟⲙ ⲛϯ ⲛ̀ϯⲙⲉⲧϣⲟⲣⲡ ⲙ̀ⲙⲓⲥⲓ ⲙ̀ⲡϣⲏⲣⲓ ⲛ̀ⲑⲏ ⲉⲧⲉϥⲙⲉⲓ ⲙ̀ⲙⲟⲥ ⲉ̀ⲁϥⲭⲱ ⲛ̀ⲥⲱϥ ⲙ̀ⲡⲓϣⲁⲙⲓⲥⲓ ⲛ̀ⲧⲉ ⲑⲏ ⲉⲧⲉϥⲙⲟⲥϯ ⲙ̀ⲙⲟⲥ
لا توجد ترجمة عربية
(ⲓ︦ⲍ︦) ⲁⲗⲗⲁ ⲡⲓϣⲟⲣⲡ ⲙ̀ⲙⲓⲥⲓ ⲛ̀ⲧⲉ ⲑⲏ ⲉⲧⲉϥⲙⲟⲥϯ ⲙ̀ⲙⲟⲥ ⲉϥⲉ̀ⲥⲟⲩⲱⲛϥ ⲉ̀ϯ ⲛⲁϥ ⲛ̀ⲇⲓⲡⲗⲟⲩⲛ ⲉ̀ⲃⲟⲗ ϧⲉⲛ ϩⲱⲃ ⲛⲓⲃⲉⲛ ⲉⲧⲟⲩⲛⲁϫⲉⲙⲟⲩ ⲛ̀ⲧⲁϥ ϫⲉ ⲫⲁⲓ ⲧⲁⲣⲭⲏ ⲛ̀ⲧⲉ ⲛⲉϥϣⲏⲣⲓ ⲡⲉ ⲟⲩⲟϩ ⲉⲧⲉⲥϣⲉ ⲛⲁϥ ⲉ̀ϭⲓ ⲛ̀ϯⲙⲉⲧϣⲟⲣⲡ ⲙ̀ⲙⲓⲥⲓ
لا توجد ترجمة عربية
(ⲓ︦ⲏ︦) ⲉ̀ϣⲱⲡ ⲇⲉ ⲉ̀ⲟⲩⲟⲛ ⲟⲩϣⲏⲣⲓ ⲛ̀ⲧⲉ ⲟⲩⲁⲓ ⲉϥⲟⲓ ⲛ̀ⲁⲧⲥⲱⲧⲉⲙ ⲟⲩⲟϩ ⲛ̀ⲣⲉϥϣϭⲛⲏⲛ ⲛ̀ϥⲥⲱⲧⲉⲙ ⲁⲛ ⲛ̀ⲥⲁ ⲧⲥⲙⲏ ⲙ̀ⲡⲉϥⲓⲱⲧ ⲛⲉⲙ ⲧⲥⲙⲏ ⲛ̀ⲧⲉϥⲙⲁⲩ ⲛ̀ⲧⲟⲩϯⲥⲃⲱ ⲛⲁϥ ⲟⲩⲟϩ ⲛ̀ⲧⲉϥϣ̀ⲧⲉⲙⲥⲱⲧⲉⲙ ⲛ̀ⲥⲱⲟⲩ
لا توجد ترجمة عربية
(ⲓ︦ⲑ︦) ⲉⲩⲉ̀ⲁⲙⲟⲛⲓ ⲙ̀ⲙⲟϥ ⲛ̀ϫⲉ ⲡⲉϥⲓⲱⲧ ⲛⲉⲙ ⲧⲉϥⲙⲁⲩ ⲉⲩⲉ̀ⲉⲛϥ ⲉ̀ⲃⲟⲗ ϩⲁ ⲛⲓϧⲉⲗⲗⲟⲓ ⲛ̀ⲧⲉ ⲧⲟⲩⲃⲁⲕⲓ ⲛⲉⲙ ϩⲁ ϯⲡⲩⲗⲏ ⲛ̀ⲧⲉ ⲡⲟⲩⲧⲟⲡⲟⲥ
لا توجد ترجمة عربية
(ⲕ︦) ⲟⲩⲟϩ ⲉⲩⲉ̀ϫⲟⲥ ⲛ̀ⲛⲓⲣⲱⲙⲓ ⲛ̀ⲧⲉ ⲧⲟⲩⲃⲁⲕⲓ ⲉⲩϫⲱ ⲙ̀ⲙⲟⲥ ϫⲉ ⲡⲉⲛϣⲏⲣⲓ ⲡⲉ ⲫⲁⲓ ϥⲟⲓ ⲛ̀ⲁⲧϯⲙⲁϯ ⲟⲩⲟϩ ⲟⲩⲣⲉϥϣϭⲛⲏⲛ ⲡⲉ ϥⲟⲓ ⲛⲁⲧⲥⲱⲧⲉⲙ ⲛ̀ⲥⲁ ⲧⲉⲛⲥⲃⲱ ⲉϥϯⲥⲩⲙⲃⲟⲩⲗⲏ ϥⲑⲁϧⲓ ϧⲉⲛ ⲡⲏⲣⲡ
لا توجد ترجمة عربية
(ⲕ︦ⲁ︦) ⲟⲩⲟϩ ⲉⲩⲉ̀ϩⲓⲱⲛⲓ ⲉ̀ϫⲱϥ ϧⲉⲛ ⲡⲱⲛⲓ ⲛ̀ϫⲉ ⲛⲓⲣⲱⲙⲓ ⲛ̀ⲧⲉ ⲧⲉϥⲃⲁⲕⲓ ⲟⲩⲟϩ ⲉϥⲉ̀ⲙⲟⲩ ⲉⲕⲉ̀ⲱⲗⲓ ⲙ̀ⲡⲓⲡⲉⲧϩⲱⲟⲩ ⲉ̀ⲃⲟⲗ ϧⲉⲛ ⲑⲏⲛⲟⲩ ⲟⲩⲟϩ ⲡⲓⲥ̅ⲗ̅ ⲧⲏⲣϥ ⲁϥϣⲁⲛⲥⲱⲧⲉⲙ ⲉϥⲉ̀ⲉⲣϩⲟϯ
لا توجد ترجمة عربية
(ⲕ︦ⲃ︦) ⲉ̀ϣⲱⲡ ⲇⲉ ⲁⲣⲉϣⲁⲛ ⲟⲩⲛⲟⲃⲓ ϣⲱⲡⲓ ϧⲉⲛ ⲟⲩⲁⲓ ⲟⲩϩⲁⲡ ⲛ̀ⲧⲉ ⲫⲙⲟⲩ ⲟⲩⲟϩ ⲛ̀ⲧⲉϥⲙⲟⲩ ⲛ̀ⲧⲉⲧⲉⲛⲁϣϥ ⲉ̀ϫⲉⲛ ⲟⲩϣⲉ
لا توجد ترجمة عربية
(ⲕ︦ⲅ︦) ⲛ̀ⲛⲉ ⲡⲉϥⲥⲱⲙⲁ ⲉⲛⲕⲟⲧ ⲉ̀ϫⲉⲛ ⲡⲓϣⲉ ⲁⲗⲗⲁ ϧⲉⲛ ⲟⲩⲕⲱⲥ ⲉⲣⲉⲧⲉⲛⲉ̀ⲕⲟⲥϥ ϧⲉⲛ ⲡⲓⲉϩⲟⲟⲩ ⲉⲧⲉⲙ̀ⲙⲁⲩ ϫⲉ ϥⲥϩⲟⲩⲟⲣⲧ ⲛ̀ⲧⲉⲛ ⲫϯ ⲛ̀ϫⲉ ⲟⲩⲟⲛ ⲛⲓⲃⲉⲛ ⲉⲧⲁϣⲓ ⲉ̀ⲡϣⲉ ⲛ̀ⲛⲉⲧⲉⲛⲥⲱϥ ⲙ̀ⲡⲓⲕⲁϩⲓ ⲫⲏ ⲉⲧⲉ ⲡϭ̅ⲥ̅ ⲡⲉⲕⲛⲟⲩϯ ⲛⲁⲧⲏⲓϥ ⲛⲁⲕ ϧⲉⲛ ⲟⲩⲕⲗⲏⲣⲟⲥ