لا توجد ترجمة عربية
ϯϩⲟⲣⲁⲥⲓⲥ ⲙ̀ⲙⲁϩⲓ̅ⲇ̅
لا توجد ترجمة عربية
(ⲁ︦) ⲛ̀ϩⲣⲏⲓ ⲇⲉ ϧⲉⲛ ϯⲙⲁϩⲅ̅ ⲛ̀ⲣⲟⲙⲡⲓ ⲛ̀ⲧⲉ ⲕⲩⲣⲟⲥ ⲡⲓⲡⲉⲣⲥⲓⲥ. ⲫⲏ ⲉⲧⲁϥϭⲓ ⲛ̀ϯⲙⲉⲧⲟⲩⲣⲟ ⲛ̀ⲧⲉ ⲃⲁⲃⲩⲗⲱⲛ. ⲁⲩϭⲱⲣⲡ ⲛ̀ⲟⲩⲥⲁϫⲓ ⲉ̀ⲃⲟⲗ ⲛ̀ⲇⲁⲛⲓⲏⲗ. ⲫⲏ ⲉⲧⲉ ⲡⲉϥⲣⲁⲛ ⲡⲉ ⲃⲁⲗⲇⲁⲥⲁⲣ. ⲟⲩⲙⲏⲓ ⲡⲉ ⲡⲓⲥⲁϫⲓ
لا توجد ترجمة عربية
(ⲃ︦) ⲁ̀ⲛⲟⲕ ⲇⲁⲛⲓⲏⲗ ⲛⲁⲓⲉⲣⲛⲏⲥⲧⲉⲩⲓⲛ ⲛ̀ⲕⲁ ⲛ̀ⲉϩⲟⲟⲩ ϣⲁ ⲣⲟⲩϩⲓ ⲙ̀ⲙⲏⲛⲓ. ⲙ̀ⲡⲓⲟⲩⲱⲙ ⲛ̀ⲟⲩⲁϥ. ⲟⲩⲇⲉ ⲙ̀ⲡⲓⲥⲱ ⲛ̀ⲟⲩⲏⲣⲡ. ⲙ̀ⲡⲓⲑⲱϩⲥ ⲙ̀ⲙⲟⲓ ⲛ̀ⲟⲩⲛⲉϩ.
لا توجد ترجمة عربية
(ⲅ︦) ⲁⲥϣⲱⲡⲓ ⲙ̀ⲙⲟⲓ ⲉⲓⲟϩⲓ ⲉⲣⲁⲧ ⲉ̀ϫⲉⲛ ⲫⲓⲁⲣⲟ ⲡⲓⲧⲓⲅⲣⲟⲥ. ⲁ ⲟⲩϩⲱⲃ ϭⲱⲣⲡ ⲛⲏⲓ ⲉ̀ⲃⲟⲗ
لا توجد ترجمة عربية
(ⲇ︦) ⲛⲁⲓⲛⲁⲩ ϩⲏⲡⲡⲉ ⲓⲥ ⲡⲓϥⲧⲟⲩ ⲑⲏⲟⲩ ⲛ̀ⲧⲉ ⲧⲫⲉ. ⲛⲁⲩϩⲓⲟⲩⲓ ⲉ̀ϧⲣⲏⲓ ⲉ̀ⲫⲓⲟⲙ ⲛ̀ⲛⲓϣϯ
لا توجد ترجمة عربية
(ⲉ︦) ⲁⲓⲛⲁⲩ ⲉ̀ⲇ̅ ⲛ̀ⲑⲏⲣⲓⲟⲛ ⲁⲩⲓ ⲉ̀ϩⲣⲏⲓ ϧⲉⲛ ⲫⲓⲁⲣⲟ ⲉⲩⲟⲓ ⲛ̀ϩⲟϯ ⲉ̀ⲙⲁϣⲱ
لا توجد ترجمة عربية
(ⲋ︦) ⲡⲓϩⲟⲩⲓⲧ ⲛ̀ⲑⲏⲣⲓⲟⲛ ⲉϥⲟⲛⲓ ⲛ̀ⲟⲩⲗⲁⲃⲟⲓ. ⲉⲣⲉ ⲟⲩⲟⲛ ϩⲁⲛⲧⲉⲛϩ ⲉ̀ⲣⲟϥ ⲙ̀ⲫⲣⲏϯ ⲛ̀ⲟⲩⲁⲏⲧⲟⲥ. ⲛⲁⲓⲛⲁⲩ ⲡⲉ ϣⲁⲛⲧⲟⲩϧⲱⲗ ⲛ̀ⲛⲉϥⲧⲉⲛϩ. ⲟⲩⲟϩ ⲁⲩϯ ⲛⲁϥ ⲛ̀ⲟⲩϩⲏⲧ ⲛ̀ⲣⲱⲙⲓ. ⲁϥⲟϩⲓ ⲉ̀ⲣⲁⲧϥ ⲉ̀ϫⲉⲛ ⲛⲉϥϭⲁⲗⲁⲩϫ.
لا توجد ترجمة عربية
(ⲍ︦) ⲡⲓⲙⲁϩⲃ̅ ⲛⲑⲏⲣⲓⲟⲛ ⲉϥⲟⲓ ⲟⲩⲥⲁⲣⲝ ⲛ̀ⲣⲱⲙⲓ. ⲛⲁϥⲟⲓ ⲛ̀ϩⲟϯ ⲉ̀ⲙⲁϣⲱ. ⲟⲩⲟϩ ⲛⲁϥⲟϩⲓ ⲉ̀ⲣⲁⲧϥ ⲉ̀ϫⲉⲛ ⲡⲉϥⲥⲫⲓⲣ ⲛⲁⲓⲛⲁⲩ ⲉ̀ⲣⲟϥ ⲡⲉ. ϣⲁⲛⲧⲟⲩⲕⲱϣ ⲛ̀ⲅ̅ ⲙ̀ⲙⲉⲣⲟⲥ ⲛ̀ⲧⲉ ⲣⲱϥ ⲟⲩⲟϩ ⲡⲓⲙⲁϩⲇ̅ ⲙ̀ⲙⲉⲣⲟⲥ ⲛ̀ⲧⲉ ⲣⲱϥ. ⲛⲁϥⲧⲁϫⲣⲏⲟⲩⲧ ⲡⲉ. ⲛⲁⲓⲛⲁⲩ ⲡⲉ ϣⲁⲛⲧⲟⲩⲫⲱⲣⲕ ⲛ̀ⲛⲉϥⲛⲁϫϩⲓ ⲉ̀ⲃⲟⲗ ϧⲉⲛ ⲣⲱϥ.
لا توجد ترجمة عربية
(ⲏ︦) ⲡⲓⲙⲁϩⲅ̅ ⲛ̀ⲑⲏⲣⲓⲟⲛ ⲉϥⲟⲓ ⲙ̀ⲫⲣⲏϯ ⲛ̀ⲟⲩⲡⲁⲣⲁⲇⲁⲗⲓⲥ ⲉⲣⲉ ϩⲁⲛⲧⲉⲛϩ ⲉ̀ⲣⲟϥ. ⲉⲣⲉ ⲇ̅ ⲛ̀ⲁⲫⲉ ⲉ̀ⲣⲟϥ ⲉϥⲟⲩⲱⲙ ⲛ̀ⲭⲱⲗⲉⲙ. ⲉϥϫⲱⲣ ⲉ̀ⲃⲟⲗ ⲙ̀ⲡⲕⲉⲥⲉⲡⲓ.
لا توجد ترجمة عربية
(ⲑ︦) ⲡⲓⲙⲁϩⲇ̅ ⲛ̀ⲑⲏⲣⲓⲟⲛ. ⲛⲁⲓⲛⲁⲩ ⲉ̀ⲣⲟϥ ⲉϥⲟⲓ ⲙ̀ⲫⲣⲏϯ ⲛ̀ⲟⲩⲙⲟⲩⲓ. ⲉϥⲟⲓ ⲛ̀ϩⲟϯ ⲉ̀ⲃⲟⲗ ⲟⲩⲧⲉ ⲛⲓⲑⲏⲣⲓⲟⲛ ⲧⲏⲣⲟⲩ. ⲉⲧⲁⲩϣⲱⲡⲓ ϧⲁϫⲱϥ.
لا توجد ترجمة عربية
(ⲓ︦) ⲁⲩϯ ⲛⲁϥ ⲛ̀ⲟⲩⲉⲝⲟⲩⲥⲓⲁ ⲛⲉⲙ ⲟⲩⲛⲓϣϯ ⲛ̀ϫⲟⲙ. ⲛⲉϥϫⲓϫ ϩⲁⲛⲃⲉⲛⲓⲡⲓ ⲛⲉ. ⲛⲉϥⲓⲉⲃ ϩⲁⲛϩⲟⲙⲧ ⲛⲉ. ⲉϥⲟⲩⲱⲙ ⲉϥⲟⲩⲟϫⲃⲉϫ. ⲉϥϧⲟⲙϧⲉⲙ ⲙ̀ⲡⲕⲉⲥⲉⲡⲓ ϧⲁⲣⲁⲧⲟⲩ ⲛ̀ⲛⲉϥϭⲁⲗⲁⲩϫ.
لا توجد ترجمة عربية
(ⲓ︦ⲁ︦) ⲁⲓⲛⲁⲩ ⲉ̀ⲓ̀ ⲛ̀ⲧⲁⲡ ⲉⲧⲁⲩⲓ̀ ⲉ̀ⲡϣⲱⲓ ϧⲉⲛ ⲧⲉϥⲁⲫⲉ. ⲟⲩⲟϩ ⲁⲓⲛⲁⲩ ⲉ̀ⲕⲉⲕⲟⲩϫⲓ ⲛ̀ⲧⲁⲡ ⲁϥⲓ̀ ⲉ̀ⲡϣⲱⲓ ϧⲁⲧⲉⲛ ⲡⲓⲓ̅ ⲛ̀ⲧⲁⲡ ⲁⲩϯ ⲛⲁϥ ⲛ̀ⲟⲩⲛⲓϣϯ ⲛ̀ⲉⲝⲟⲩⲥⲓⲁ. ⲛⲉⲙ ⲟⲩϫⲟⲙ ⲉⲥϫⲟⲣ.
لا توجد ترجمة عربية
(ⲓ︦ⲃ︦) ⲁⲓⲛⲁⲩ ⲉ̀ⲕⲉⲇ̅ ⲉⲧⲁⲩⲓ̀ ⲉ̀ⲡϣⲱⲓ ⲥⲁϫⲁϭⲏ ⲙ̀ⲙⲟϥ. ⲟⲩⲟϩ ⲁⲓⲛⲁⲩ ⲉ̀ⲕⲉⲇ̅ ⲉⲧⲁⲩⲓ̀ ⲉ̀ⲡϣⲱⲓ ⲙⲉⲛⲉⲛⲥⲱⲟⲩ ⲧⲏⲣⲟⲩ. ⲉⲣⲉ ⲡⲓⲟⲩⲁⲓ ⲡⲓⲟⲩⲁⲓ ϣⲉⲃⲓⲏⲟⲩⲧ. ⲟⲩⲟϩ ⲛⲁⲓ ⲇⲉ ⲧⲏⲣⲟⲩ ⲥⲉⲓⲣⲓ ⲙ̀ⲓ̅ⲑ̅
لا توجد ترجمة عربية
(ⲓ︦ⲅ︦) ⲁⲓⲥⲱⲧⲉⲙ ⲉ̀ⲟⲩⲥⲙⲏ ⲉϥϫⲱ ⲙ̀ⲙⲟⲥ ⲛⲏⲓ. ϫⲉ ⲇⲁⲛⲓⲏⲗ ⲫⲣⲱⲙⲓ ⲛ̀ⲛⲓⲉⲡⲓⲑⲩⲙⲓⲁ. ⲁⲣⲓⲉⲙⲓ ⲉ̀ⲛⲏ ⲉⲧⲁⲕⲛⲁⲩ ⲉ̀ⲣⲱⲟⲩ. ⲁ̀ⲛⲟⲕ ⲇⲉ ⲡⲉϫⲏⲓ ⲛⲁϥ ϫⲉ ⲡⲱⲥ ⲟⲩⲟⲛ ϣ̀ϫⲟⲙ ⲙ̀ⲙⲟⲓ ϣⲁ ⲉⲛⲉϩ ⲉ̀ⲉⲙⲓ. ⲁⲣⲉϣ̀ⲧⲉⲙ ⲟⲩⲁⲓ ϭⲓⲙⲱⲓⲧ ⲛⲏⲓ.
لا توجد ترجمة عربية
(ⲓ︦ⲇ︦) ⲁⲓϫⲟⲩϣⲧ ⲁⲓⲛⲁⲩ ⲉ̀ⲟⲩⲁⲅⲅⲉⲗⲟⲥ ⲛ̀ⲧⲉ ⲫϯ. ⲉϥⲟϩⲓ ⲉ̀ⲣⲁⲧϥ ⲥⲁⲟⲩⲓⲛⲁⲙ ⲙ̀ⲙⲟⲓ. ⲉⲣⲉ ⲛⲉϥⲧⲉⲛϩ ⲟⲓ ⲛ̀ⲟⲩⲱⲓⲛⲓ ⲉ̀ⲙⲁϣⲱ. ⲁⲓⲉⲣϩⲟϯ. ⲁⲓϩⲉⲓ ⲉ̀ϧⲣⲏⲓ ϩⲓϫⲉⲛ ⲡⲓⲕⲁϩⲓ.
لا توجد ترجمة عربية
(ⲓ︦ⲉ︦) ⲁϥⲁⲙⲟⲛⲓ ⲙ̀ⲙⲟⲓ ⲛ̀ϫⲉ ⲡⲓⲁⲅⲅⲉⲗⲟⲥ ⲁϥⲧⲁϩⲟⲓ ⲉⲣⲁⲧ. ⲡⲉϫⲁϥ ⲛⲏⲓ. ϫⲉ ⲟϩⲓ ⲉ̀ⲣⲁⲧⲕ ⲉ̀ϫⲉⲛ ⲛⲉⲕϭⲁⲗⲁⲩϫ. ⲛ̀ⲧⲁⲧⲁⲙⲟⲕ ⲉ̀ⲛⲏ ⲉⲑⲛⲁϣⲱⲡⲓ. ϧⲉⲛ ⲧϧⲁⲏ ⲛ̀ⲧⲉ ⲛⲓⲥⲏⲟⲩ.
لا توجد ترجمة عربية
(ⲓ︦ⲋ︦) ⲡⲓⲇ̅ ⲛ̀ⲑⲏⲣⲓⲟⲛ ⲉⲧⲁⲕⲛⲁⲩ ⲉ̀ⲣⲱⲟⲩ ⲇ̅ ⲙ̀ⲙⲉⲧⲟⲩⲣⲟ ⲛⲉ. ⲟⲩⲟϩ ⲡⲓⲑⲏⲣⲓⲟⲛ ⲉⲧⲁⲕⲛⲁⲩ ⲉ̀ⲣⲟϥ ⲉϥⲟⲓ ⲙ̀ⲫⲣⲏϯ ⲛ̀ⲟⲩⲗⲁⲃⲟⲓ. ⲫⲁⲓ ⲡⲉ ⲡⲟⲩⲣⲟ ⲛ̀ⲧⲉ ⲛⲓⲡⲉⲣⲥⲓⲥ. ϥⲛⲁⲁⲙⲟⲛⲓ ⲙ̀ⲡⲓⲕⲁϩⲓ. ⲛ̀ⲫ̅ⲛ̅ⲉ̅ ⲛ̀ⲣⲟⲙⲡⲓ ⲙⲉⲛⲉⲛⲥⲁ ⲛⲁⲓ ϥⲛⲁⲧⲁⲕⲟ ⲛⲉⲙ ⲧⲉϥⲙⲉⲧⲟⲩⲣⲟ ϥⲛⲁϫⲉⲙϫⲟⲙ ⲁⲛ. ϣⲁ ⲉⲛⲉϩ
لا توجد ترجمة عربية
(ⲓ︦ⲍ︦) ⲡⲓⲙⲁϩⲃ̅ ⲛ̀ⲑⲏⲣⲓⲟⲛ ⲉⲧⲁⲕⲛⲁⲩ ⲉ̀ⲣⲟϥ. ⲉϥⲟⲛⲓ ⲛ̀ⲟⲩⲥⲁⲣⲝ ⲛ̀ⲣⲱⲙⲓ. ⲫⲁⲓ ⲡⲉ ⲡⲟⲩⲣⲟ ⲛ̀ⲧⲉ ⲛⲓⲣⲱⲙⲉⲟⲥ. ϥⲛⲁⲁⲙⲟⲛⲓ ⲙ̀ⲡⲓⲕⲁϩⲓ. ⲙ̀ⲫⲣⲏϯ ⲛ̀ⲟⲩⲃⲉⲛⲓⲡⲓ. ϥⲛⲁⲫⲱⲣϣ ⲉ̀ⲃⲟⲗ ϩⲓϫⲱϥ. ϥⲛⲁϣⲱⲡⲓ ϧⲉⲛ ⲟⲩϫⲟⲙ. ϣⲁ ⲡⲓⲕⲁϩⲓ ⲛ̀ⲛⲓⲉⲑⲁⲩϣ. ⲟⲩⲟϩ ϥⲛⲁⲉⲣⲟⲩⲣⲟ ϩⲓϫⲉⲛ ⲡⲕⲁϩⲓ ⲙ̅ⲑ̅ ⲛ̀ϣⲉ ⲓ̅ⲁ̅ ⲛ̀ⲣⲟⲙⲡⲓ
لا توجد ترجمة عربية
(ⲓ︦ⲏ︦) ⲁⲗⲗⲁ ϯⲡⲟⲗⲓⲥ ⲛ̀ⲧⲉ ϯⲙⲉⲧⲟⲩⲣⲟ. ϥⲛⲁϫⲉⲙϫⲟⲙ ⲉ̀ⲣⲟⲥ ⲁⲛ ϣⲁⲛⲧⲟⲩϫⲱⲕ ⲉ̀ⲃⲟⲗ ⲛ̀ϫⲉ ϩⲁⲛⲉϩⲟⲟⲩ ⲉⲩⲟϣ.
لا توجد ترجمة عربية
(ⲓ︦ⲑ︦) ⲡⲓⲙⲁϩⲅ̅ ⲛ̀ⲑⲏⲣⲓⲟⲛ ⲉⲧⲁⲕⲛⲁⲩ ⲉ̀ⲣⲟϥ. ⲉϥⲟⲓ ⲙ̀ⲫⲣⲏϯ ⲛ̀ⲟⲩⲡⲁⲣⲇⲁⲗⲓⲥ. ⲫⲁⲓ ⲡⲉ ⲡⲟⲩⲣⲟ ⲛ̀ⲛⲓϩⲉⲗⲏⲛⲟⲥ. ϥⲛⲁⲉⲣⲟⲩⲣⲟ ϩⲓϫⲉⲛ ⲡⲕⲁϩⲓ ⲛ̀ⲟⲩϣⲟ ⲛ̀ⲣⲟⲙⲡⲓ. ⲛⲉⲙ ⲗ̅ ⲛ̀ⲉϩⲟⲟⲩ ⲟⲩⲟϩ ⲧⲉϥⲙⲉⲧⲟⲩⲣⲟ ⲛⲁⲙⲟⲩⲛ ⲉ̀ⲃⲟⲗ ⲁⲛ ϣⲁ ⲉ̀ⲃⲟⲗ.
لا توجد ترجمة عربية
(ⲕ︦) ⲡⲓⲙⲁϩⲇ̅ ⲛ̀ⲑⲏⲏⲣⲓⲟⲛ ⲉⲧⲁⲕⲛⲁⲩ ⲉ̀ⲣⲟϥ. ⲉϥⲟⲓ ⲙ̀ⲫⲣⲏϯ ⲛ̀ⲟⲩⲙⲟⲩⲓ. ⲫⲁⲓ ⲡⲉ ⲡⲟⲩⲣⲟ ⲛ̀ⲧⲉ ⲛⲉⲛϣⲏⲣⲓ ⲉ̀ⲛⲓⲥⲙⲁⲏⲗ.
لا توجد ترجمة عربية
(ⲕ︦ⲁ︦) ⲧⲉϥⲙⲉⲧⲟⲩⲣⲟ ⲛⲁϣⲱⲡⲓ ϩⲓϫⲉⲛ ⲡⲕⲁϩⲓ ⲉⲥϫⲟⲣ ⲉ̀ⲙⲁϣⲱ. ⲉ̀ϩⲁⲛⲙⲏϣ ⲛ̀ⲉϩⲟⲟⲩ.
لا توجد ترجمة عربية
(ⲕ︦ⲃ︦) ϯⲙⲉⲧⲟⲩⲣⲟ ⲉⲧⲉⲙ̀ⲙⲁⲩ. ⲁⲥⲛⲁϣⲱⲡⲓ ⲉ̀ⲃⲟⲗ ϧⲉⲛ ⲡⲅⲉⲛⲟⲥ ⲛ̀ⲁⲃⲣⲁⲁⲙ. ⲉ̀ⲃⲟⲗ ϧⲉⲛ ⲑⲃⲱⲕⲓ ⲛ̀ⲥⲁⲣⲣⲁ. ⲧⲥϩⲓⲙⲓ ⲛ̀ⲁⲃⲣⲁⲁⲙ.
لا توجد ترجمة عربية
(ⲕ︦ⲅ︦) ⲥⲛⲁⲧⲁⲕⲟ ⲛ̀ⲛⲓⲡⲟⲗⲓⲥ ⲧⲏⲣⲟⲩ ⲛ̀ⲧⲉ ⲛⲓⲡⲉⲣⲥⲓⲥ. ⲛⲉⲙ ⲛⲓⲣⲱⲙⲉⲟⲥ. ⲛⲉⲙ ⲛⲓϩⲉⲗⲏⲛⲟⲥ. ⲟⲩⲟϩ ⲓ̅ⲑ̅ ⲛ̀ⲟⲩⲣⲟ ⲛⲁϣⲱⲡⲓ ϩⲓϫⲉⲛ ⲡⲕⲁϩⲓ. ⲉ̀ⲃⲟⲗ ϧⲉⲛ ⲡⲓⲅⲉⲛⲟⲥ ⲉⲧⲉⲙ̀ⲙⲁⲩ. ⲉ̀ⲃⲟⲗ ϧⲉⲛ ⲛⲉⲛϣⲏⲣⲓ ⲛ̀ⲛⲓⲥⲙⲁⲏⲗ. ϣⲁ ⲡϫⲱⲕ ⲛ̀ⲧⲟⲩϧⲁⲏ ⲉⲑⲛⲁϣⲱⲡⲓ.
لا توجد ترجمة عربية
(ⲕ︦ⲇ︦) ⲡⲓⲙⲁϩⲓ ⲛ̀ⲟⲩⲣⲟ ⲉⲑⲛⲁϣⲱⲡⲓ ⲉ̀ⲃⲟⲗ ⲛ̀ϧⲏⲧⲟⲩ ϥⲛⲁϣⲱⲡⲓ ⲙ̀ⲫⲣⲏϯ ⲛ̀ⲟⲩⲡⲣⲟⲫⲏⲧⲏⲥ. ⲧⲏⲡⲓ ⲛ̀ⲧⲉ ⲡⲉϥⲣⲁⲛ ⲧ̅ϥ̅ⲑ̅. ϥⲛⲁⲓⲣⲓ ⲛⲟⲩⲇⲓⲕⲉⲟⲥⲩⲛⲏ. ϥⲛⲁϯ ⲛ̀ⲟⲩⲱⲓⲕ ⲛ̀ⲛⲏ ⲉⲧϩⲟⲕⲉⲣ. ⲟⲩϩⲉⲃⲥⲱ ⲛ̀ⲛⲏ ⲉⲑⲃⲏϣ. ⲟⲩⲟϩ ϥⲛⲁⲓⲣⲓ ⲛ̀ⲟⲩⲥⲱϯ ⲛ̀ⲛⲏ ⲉⲧⲟⲓ ⲙ̀ⲃⲱⲕ. ⲧⲉϥⲙⲉⲧⲛⲁⲏⲧ ⲛⲁⲫⲱⲣϣ ⲉ̀ⲃⲟⲗ. ϩⲓϫⲉⲛ ⲡⲕⲁϩⲓ ⲧⲏⲣϥ. ⲛⲉⲙ ⲟⲩⲇⲓⲕⲉⲟⲥⲩⲛⲏ ϣⲁ ⲉ̀ϩⲣⲏⲓ ⲉ̀ⲟⲩϭⲓⲥⲓ ⲛ̀ⲧⲫⲉ
لا توجد ترجمة عربية
(ⲕ︦ⲉ︦) ⲡⲓⲙⲁϩⲓⲁ ⲛ̀ⲟⲩⲣⲟ ⲉⲑⲛⲁϣⲱⲡⲓ ⲉ̀ⲃⲟⲗ ⲛ̀ϧⲏⲧⲟⲩ. ϥⲛⲁⲓⲣⲓ ⲛ̀ⲟⲩϭⲓⲛϫⲟⲛⲥ ϩⲓϫⲉⲛ ⲡⲕⲁϩⲓ ⲧⲏⲣϥ. ϥⲛⲁⲧⲁⲕⲟ ⲛ̀ϩⲁⲛⲙⲟⲩⲛⲕ ⲛ̀ϫⲓϫ. ⲛ̀ⲁⲣⲭⲉⲟⲥ
لا توجد ترجمة عربية
(ⲕ︦ⲋ︦) ϥⲛⲁϩⲟϫϩⲉϫ ⲛ̀ⲛⲏ ⲉⲧϣⲟⲡ ϩⲓϫⲉⲛ ⲡⲕⲁϩⲓ. ⲛ̀ⲧⲉⲕϣ̀ⲧⲉⲙϫⲉⲙ ⲫⲏ ⲉⲧϣⲟⲡ ⲟⲩⲇⲉ ⲡⲉⲧϯ ⲉ̀ⲃⲟⲗ. ⲉⲩϥⲓⲁϩⲟⲙ ⲧⲏⲣⲟⲩ ⲛ̀ⲙ̅ⲃ̅ ⲛ̀ⲁⲃⲟⲧ ⲉ̀ϣⲱⲡ ⲁⲣⲉϣⲁⲛ ⲫϯ ⲛ̀ⲧⲉ ⲧⲫⲉ ⲱⲟⲩ ⲛ̀ϩⲏⲧ ⲉ̀ϩⲣⲏⲓ ⲉ̀ϫⲱϥ. ⲧⲉϥⲙⲉⲧⲟⲩⲣⲟ ⲛⲁⲙⲟⲩⲛ ⲉ̀ⲃⲟⲗ ⲛ̀ⲙ̅ ⲛ̀ⲁⲃⲟⲧ.
لا توجد ترجمة عربية
(ⲕ︦ⲍ︦) ⲡⲓⲙⲁϩ ⲓ̅ⲃ̅ ⲛ̀ⲟⲩⲣⲟ ⲉⲑⲛⲁϣⲱⲡⲓ ⲉ̀ⲃⲟⲗ ⲛ̀ϧⲏⲧⲟⲩ. ⲧⲉϥⲙⲉⲧⲟⲩⲣⲟ ⲛⲁϣⲱⲡⲓ ⲉⲥϫⲟⲣ ⲕⲁⲧⲁ ⲛⲓϩⲁⲡ ⲛ̀ⲧⲉ ⲣⲱϥ.
لا توجد ترجمة عربية
(ⲕ︦ⲏ︦) ϥⲛⲁⲓⲣⲓ ϩⲓϫⲉⲛ ⲡⲕⲁϩⲓ ⲛ̀ϩⲁⲛϩⲱⲃ ⲉⲩⲫⲟⲛϩ ϧⲉⲛ ⲧⲉϥⲙⲉⲧⲟⲩⲣⲟ. ϣⲁⲧⲟⲩⲉⲣϣⲫⲏⲣⲓ ⲛ̀ⲛⲏ ⲉⲧⲉϥⲛⲁⲁⲓⲧⲟⲩ.
لا توجد ترجمة عربية
(ⲕ︦ⲑ︦) ⲟⲩⲟⲛ ⲟⲩⲙⲏϣ ⲙ̀ⲡⲟⲗⲉⲙⲟⲥ ⲛⲁϣⲱⲡⲓ ϧⲉⲛ ⲧⲉϥⲙⲉⲧⲟⲩⲣⲟ. ϧⲉⲛ ⲧϧⲁⲏ ⲛ̀ⲧⲉ ⲛⲓⲥⲏⲟⲩ. ⲟⲩⲟⲛ ⲟⲩⲟⲩⲣⲟ ⲛⲁϣⲑⲟⲣⲧⲉⲣ ⲛ̀ⲑⲙⲉⲧⲟⲩⲣⲟ ⲧⲏⲣⲥ ⲛ̀ⲛⲉⲛϣⲏⲣⲓ ⲛ̀ⲛⲓⲥⲙⲁⲏⲗ ⲛ̀ⲣ̅ⲙ̅ⲍ̅ ⲛ̀ⲣⲟⲙⲡⲓ.
لا توجد ترجمة عربية
(ⲗ︦) ⲟⲩⲟϩ ϧⲉⲛ ϯⲙⲁϩⲣ̅ⲓ̅ ⲛ̀ⲣⲟⲙⲡⲓ ⲛ̀ⲧⲉ ⲧⲉϥⲙⲉⲧⲟⲩⲣⲟ. ⲟⲩⲟⲛ ⲟⲩⲡⲟⲗⲉⲙⲟⲥ ⲛⲁϣⲱⲡⲓ ϧⲉⲛ ⲧⲉϥⲙⲏϯ ⲛⲉⲙ ⲛⲓⲉⲑⲁⲩϣ.
لا توجد ترجمة عربية
(ⲗ︦ⲁ︦) ⲛⲉⲛϣⲏⲣⲓ ⲉ̀ⲛⲓⲥⲙⲁⲏⲗ ⲛⲁⲉⲣϭ̅ⲥ̅ ⲉ̀ⲣⲱⲟⲩ ϣⲁⲛⲧⲟⲩϩⲱⲗ ⲉ̀ϯⲡⲟⲗⲓⲥ ⲛ̀ⲧⲉ ϯⲙⲉⲧⲟⲩⲣⲟ ⲉⲧⲉ ⲥⲟⲩⲃⲁⲛ ⲧⲉ.
لا توجد ترجمة عربية
(ⲗ︦ⲃ︦) ⲥⲉⲛⲁⲟⲩⲱⲣⲡ ⲛⲱⲟⲩ ⲉⲩⲕⲱϯ ⲛ̀ⲥⲁ ⲟⲩϩⲓⲣⲏⲛⲏ. ⲥⲉⲛⲁϯ ⲛⲱⲟⲩ ⲛ̀ⲟⲩϩⲁⲧ. ⲛⲉⲙ ⲟⲩⲛⲟⲩⲃ ⲉϥⲟϣ. ⲥⲉⲛⲁϣⲱⲡⲓ ⲉⲩϯϩⲱϯ ⲛⲱⲟⲩ. ϧⲉⲛ ⲛⲓⲉⲑⲁⲩϣ.
لا توجد ترجمة عربية
(ⲗ︦ⲅ︦) ⲡⲓⲙⲁϩⲓ̅ⲅ̅ ⲛ̀ⲟⲩⲣⲟ ⲉⲑⲛⲁϣⲱⲡⲓ ⲉ̀ⲃⲟⲗ ⲛ̀ϧⲏⲧⲟⲩ. ⲙ̀ⲙⲟⲛ ⲛⲁⲓϣⲟⲡ ⲛ̀ϧⲏⲧϥ ⲁⲛ ⲉ̀ⲡⲧⲏⲣϥ. ⲟⲩⲇⲉ ϩⲟϯ ⲙ̀ⲡⲉϥⲙ̀ⲑⲟ ⲉ̀ⲃⲟⲗ. ⲧⲉϥⲙⲉⲧⲟⲩⲣⲟ ⲛⲁⲙⲟⲩⲛ ⲉ̀ⲃⲟⲗ ⲉ̀ϩⲁⲛⲕⲟⲩϫⲓ ⲛ̀ⲉϩⲟⲟⲩ ⲇⲉⲟⲥ.
لا توجد ترجمة عربية
(ⲗ︦ⲇ︦) ⲡⲓⲙⲁϩⲓ̅ⲇ̅ ⲛ̀ⲟⲩⲣⲟ ⲉⲑⲛⲁϣⲱⲡⲓ ⲉ̀ⲃⲟⲗ ⲛ̀ϧⲏⲧⲟⲩ. ϥⲛⲁϭⲓ ⲛ̀ⲟⲩⲛⲟⲩⲃ. ⲛⲉⲙ ⲟⲩϩⲁⲧ ⲉϥⲟϣ. ϥⲛⲁϯϩⲁⲡ ⲉ̀ⲡⲕⲁϩⲓ ϧⲉⲛ ⲟⲩⲇⲓⲕⲉⲟⲥⲩⲛⲏ.
لا توجد ترجمة عربية
(ⲗ︦ⲉ︦) ϥⲛⲁⲑⲱⲟⲩϯ ⲛ̀ⲟⲩⲡⲟⲗⲉⲙⲟⲥ ϧⲉⲛ ⲭⲏⲙⲓ. ⲛ̀ⲧⲉ ⲭⲏⲙⲓ ⲙⲧⲟⲛ ⲙ̀ⲙⲟϥ ϧⲉⲛ ⲛⲟⲩϧⲓⲥⲓ ⲛⲉⲙ ⲛⲟⲩϥⲓⲁϩⲟⲙ
لا توجد ترجمة عربية
(ⲗ︦ⲋ︦) ⲛⲓⲉⲑⲁⲩϣ ⲛⲁϭⲛⲉϫⲱⲟⲩ ⲛⲁϥ ⲁⲛ ⲉ̀ⲡⲧⲏⲣϥ. ⲟⲩⲇⲉ ⲥⲉⲛⲁϯϩⲱϯ ⲛⲁϥ ⲁⲛ. ⲟⲩⲟⲛ ⲟⲩⲡⲟⲗⲉⲙⲟⲥ ⲛⲁϣⲱⲡⲓ ϧⲉⲛ ⲡⲓⲕⲁϩⲓ ⲛ̀ⲛⲓⲣⲱⲙⲉⲟⲥ. ϧⲉⲛ ⲛⲓⲉϩⲟⲟⲩ ⲉⲧⲉⲙ̀ⲙⲁⲩ.
لا توجد ترجمة عربية
(ⲗ︦ⲍ︦) ⲛⲏ ⲉⲑⲁⲩϣ ⲥⲉⲛⲁⲉⲣⲡⲟⲗⲉⲙⲓⲛ ⲛⲉⲙ ⲛⲓⲥⲁ ⲛ̀ⲣⲏⲥ. ⲥⲉⲛⲁϣⲱⲗ ⲛ̀ⲛⲓϯⲙⲓ. ⲛⲉⲙ ⲛⲓⲃⲁⲕⲓ ⲧⲏⲣⲟⲩ ⲛ̀ⲧⲉ ⲭⲏⲙⲓ. ϣⲁⲛⲧⲟⲩⲫⲟϩ ⲉ̀ϯⲃⲁⲕⲓ ⲉⲧⲁ ⲕⲗⲉⲟⲡⲁⲧⲣⲁ ⲕⲟⲧⲥ ϧⲉⲛ ⲫⲙⲁⲣⲏⲥ ⲉⲧⲉ ϣⲙⲟⲩⲛ ⲧⲉ.
لا توجد ترجمة عربية
(ⲗ︦ⲏ︦) ⲙⲉⲛⲉⲛⲥⲁ ⲛⲁⲓ ⲡⲟⲩⲣⲟ ⲛ̀ⲧⲉ ϯⲥⲩⲣⲓⲁ ⲛⲁⲥⲱⲧⲉⲙ. ϥⲛⲁⲉⲣϩⲟϯ ⲉ̀ⲡϧⲁⲉ. ϫⲉ ⲁ ⲡⲓⲡⲟⲗⲉⲙⲟⲥ ϧⲱⲛⲧ ⲉ̀ⲣⲟϥ.
لا توجد ترجمة عربية
(ⲗ︦ⲑ︦) ⲟⲩⲟϩ ⲉ̀ⲡϧⲁⲉ̀ ϥⲛⲁⲥⲉⲙⲛⲓ ⲧⲉϥⲙⲉⲧⲟⲩⲣⲟ ⲛⲁⲟϩⲓ ⲉ̀ⲣⲁⲧⲥ ⲛ̀ⲕⲁⲗⲱⲥ.
لا توجد ترجمة عربية
(ⲙ︦) ⲙⲉⲛⲉⲛⲥⲁ ⲛⲁⲓ ϥⲛⲁⲧⲱⲛϥ ⲛ̀ϫⲉ ⲟⲩⲁⲗⲟⲩ ⲉ̀ⲃⲟⲗ ϧⲉⲛ ⲛⲉⲛϣⲏⲣⲓ ⲉ̀ⲛⲓⲥⲙⲁⲏⲗ. ⲉⲧⲉ ⲫⲁⲓ ⲡⲉ ⲡⲓⲙⲁϩⲓ̅ⲉ̅ ⲉⲛⲟⲩⲣⲟ ⲉⲑⲛⲁϣⲱⲡⲓ ⲉ̀ⲃⲟⲗ ⲛ̀ϧⲏⲧⲟⲩ
لا توجد ترجمة عربية
(ⲙ︦ⲁ︦) ϥⲛⲁϣⲱⲡⲓ ⲉϥⲛⲁϣⲧ ϧⲉⲛ ⲧⲉϥⲯⲩⲭⲏ. ⲙ̀ⲫⲣⲏϯ ⲙ̀ⲡⲓⲃⲉⲛⲓⲡⲓ. ϥⲛⲁⲭⲱ ⲛ̀ⲧⲉϥⲥⲏϥⲓ. ϣⲁ ⲛⲓⲣⲱⲙⲉⲟⲥ. ⲧⲉϥϫⲓϫ ⲛ̀ⲟⲩⲓⲛⲁⲙ ⲉ̀ϫⲉⲛ ⲛⲓⲉⲑⲁⲩϣ. ϥⲛⲁϣⲱⲡⲓ ⲛ̀ϩⲟ ⲃ̅ ⲛⲉⲙ ⲗⲁⲥ ⲃ̅.
لا توجد ترجمة عربية
(ⲙ︦ⲃ︦) ⲉϩⲣⲏⲓ ϧⲉⲛ ⲛⲓⲉϩⲟⲟⲩ ⲛ̀ⲧⲉ ⲧⲉϥⲙⲉⲧⲟⲩⲣⲟ. ⲟⲩⲟⲛ ⲟⲩⲛⲓϣϯ ⲛ̀ϣⲑⲟⲣⲧⲉⲣ ⲛⲁϣⲱⲡⲓ ϩⲓϫⲉⲛ ⲡⲕⲁϩⲓ ⲧⲏⲣϥ. ⲟⲩⲟϩ ϥⲛⲁϣⲱⲡⲓ ⲛ̀ϫⲉ ⲡⲉϥⲥⲁϫⲓ ⲉϥⲛⲁϣⲧ ⲙ̀ⲫⲣⲏϯ ⲛ̀ⲟⲩⲭⲣⲱⲙ.
لا توجد ترجمة عربية
(ⲙ︦ⲅ︦) ⲛⲓⲉⲑⲁⲩϣ ⲛⲁⲓⲛⲓ ⲛⲁϥ ⲛ̀ϩⲁⲛⲇⲱⲣⲟⲛ. ⲟⲩⲛⲟⲩⲃ ⲛⲉⲙ ⲟⲩϩⲁⲧ. ⲛⲉⲙ ⲙⲁⲣⲅⲁⲣⲓⲧⲏⲥ. ⲟⲩⲟϩ ϥⲛⲁⲭⲱ ⲉ̀ⲃⲟⲗ ⲙ̀ⲡⲉϥϧⲓⲥⲓ ⲉ̀ϫⲉⲛ ⲟⲩⲟⲛ ⲛⲓⲃⲉⲛ.
لا توجد ترجمة عربية
(ⲙ︦ⲇ︦) ϥⲛⲁⲉⲣⲉⲭⲙⲁⲗⲱⲧⲉⲩⲓⲛ ⲛ̀ⲟⲩⲙⲏϣ ⲛ̀ⲕⲁϩⲓ. ⲛ̀ⲧⲉϥϩⲉϫϩⲱϫⲟⲩ. ⲟⲩⲟϩ ⲛ̀ⲛⲟⲩⲥⲓ ⲛ̀ⲱⲓⲕ ⲛ̀ⲛⲓⲉϩⲟⲟⲩ ⲧⲏⲣⲟⲩ ⲛ̀ⲧⲉ ⲧⲉϥⲙⲉⲧⲟⲩⲣⲟ. ⲟⲩⲇⲉ ⲛ̀ⲛⲉ ϩⲓⲣⲏⲛⲏ ϣⲱⲡⲓ. ⲛ̀ⲛⲓⲉϩⲟⲟⲩ ⲛ̀ⲧⲉ ⲧⲉϥⲙⲉⲧⲟⲩⲣⲟ. ⲟⲩⲟϩ ⲟⲩⲙⲏϣ ⲛ̀ϣⲱⲗ ⲛⲁϣⲱⲡⲓ ϧⲉⲛ ⲛⲉϥⲉϩⲟⲟⲩ.
لا توجد ترجمة عربية
(ⲙ︦ⲉ︦) ⲡⲓⲙⲁϩⲓⲋ̅ ⲛ̀ⲟⲩⲣⲟ ⲉⲑⲛⲁϣⲱⲡⲓ ⲉ̀ⲃⲟⲗ ⲛ̀ϧⲏⲧⲟⲩ. ⲙ̀ⲙⲟⲛ ⲡⲟⲗⲉⲙⲟⲥ ⲛⲁϣⲱⲡⲓ ϧⲉⲛ ⲧⲉϥⲙⲉⲧⲟⲩⲣⲟ. ⲟⲩⲇⲉ ⲛ̀ⲑⲟϥ ϩⲱϥ. ϥⲛⲁⲉⲣⲡⲟⲗⲉⲙⲓⲛ ⲛⲉⲙ ϩⲗⲓ ⲁⲛ.
لا توجد ترجمة عربية
(ⲙ︦ⲋ︦) ⲥⲉⲛⲁϯ ⲛⲁϥ ⲛ̀ⲟⲩⲛⲓϣϯ ⲛ̀ⲥⲏⲟⲩ ⲛ̀ϩⲓⲣⲏⲛⲓⲕⲟⲛ. ⲟⲩⲟϩ ⲧⲉϥⲙⲉⲧⲟⲩⲣⲟ ⲛⲁⲟϩⲓ ⲉ̀ⲣⲁⲧⲥ. ϧⲉⲛ ⲟⲩⲥⲱⲟⲩⲧⲉⲛ.
لا توجد ترجمة عربية
(ⲙ︦ⲍ︦) ⲡⲓⲙⲁϩⲓ̅ⲍ̅ ⲛ̀ⲟⲩⲣⲟ ⲉⲑⲛⲁϣⲱⲡⲓ ⲉ̀ⲃⲟⲗ ⲛ̀ϧⲏⲧⲟⲩ ⲟⲩⲟⲛ ⲟⲩⲡⲟⲗⲉⲙⲟⲥ ⲛⲁϣⲱⲡⲓ ⲟⲩⲧⲱϥ ⲛⲉⲙ ⲡⲉϥⲅⲉⲛⲟⲥ. ⲫⲁⲓ ⲉⲧⲉ ⲡⲉϥⲣⲁⲛ ⲛⲁⲓⲣⲓ ⲛ̀ⲭ̅ⲝ̅ⲋ̅ ⲛ̀ⲏⲡⲓ.
لا توجد ترجمة عربية
(ⲙ︦ⲏ︦) ϥⲛⲁⲧⲱⲛϥ ⲛ̀ϫⲉ ⲟⲩⲁⲓ ⲉ̀ⲃⲟⲗ ϧⲉⲛ ⲡⲉϥⲅⲉⲛⲟⲥ. ⲛ̀ⲧⲉϥⲉⲣⲡⲟⲗⲉⲙⲓⲛ ⲛⲉⲙⲁϥ. ϥⲛⲁϭⲟϫⲓ ⲛ̀ⲥⲱϥ ϣⲁ ⲉ̀ϧⲣⲏⲓ ⲉ̀ⲭⲏⲙⲓ. ⲛⲉⲙ ⲛⲓⲭⲣⲏⲙⲁ ⲛ̀ⲧⲉ ⲧⲉϥⲙⲉⲧⲟⲩⲣⲟ.
لا توجد ترجمة عربية
(ⲙ︦ⲑ︦) ⲟⲩⲟϩ ϥⲛⲁⲭⲱ ⲙ̀ⲡⲉϥⲅⲉⲛⲟⲥ ⲛ̀ⲥⲱϥ. ⲛⲉⲙ ⲡⲉϥⲙⲏϣ. ⲟⲩⲟϩ ϥⲛⲁⲥⲓϯ ⲛ̀ⲛⲓⲭⲣⲏⲙⲁ ⲉ̀ⲃⲟⲗ ϧⲉⲛ ⲛⲓϧⲓⲣ. ⲛⲉⲙ ⲛⲓⲙⲁⲛ̀ⲙⲟϣⲓ.
لا توجد ترجمة عربية
(ⲛ︦) ⲉϥⲛⲏⲟⲩ ⲇⲉ ⲉ̀ϧⲣⲏⲓ ⲉ̀ⲭⲏⲙⲓ ⲛⲉⲙ ⲛⲓⲭⲣⲏⲙⲁ. ⲟⲩⲟϩ ϥⲛⲁⲓ ⲉ̀ⲫⲙⲁⲣⲏⲥ ϧⲉⲛ ⲭⲏⲙⲓ. ⲉϥⲟⲩⲱϣ ⲉ̀ϩⲱⲗ ⲉⲥⲟⲩⲃⲁⲛ. ⲧⲡⲟⲗⲓⲥ ⲛ̀ⲛⲓⲉⲑⲁⲩϣ. ⲛⲉⲙ ⲡⲥⲉⲡⲓ ⲛ̀ⲛⲓⲭⲣⲏⲙⲁ.
لا توجد ترجمة عربية
(ⲛ︦ⲁ︦) ⲟⲩⲟϩ ϥⲛⲁϧⲟⲑⲃⲉϥ ⲛ̀ϫⲉ ⲟⲩⲁⲓ ⲉ̀ⲃⲟⲗ ϧⲉⲛ ⲡⲉϥⲅⲉⲛⲟⲥ ϧⲉⲛ ⲛⲓⲥⲁ ⲛ̀ⲧⲉ ⲫⲙⲁⲣⲏⲥ ⲛ̀ⲭⲏⲙⲓ. ϥⲛⲁⲱⲗⲓ ⲙ̀ⲡⲥⲏⲡⲓ ⲛ̀ⲧⲉ ⲛⲓⲭⲣⲏⲙⲁ.
لا توجد ترجمة عربية
(ⲛ︦ⲃ︦) ⲡⲓⲙⲁϩⲓ̅ⲏ̅ ⲛ̀ⲟⲩⲣⲟ ⲉⲑⲛⲁϣⲱⲡⲓ ⲉ̀ⲃⲟⲗ ⲛ̀ϧⲏⲧⲟⲩ. ϧⲉⲛ ⲧⲁⲣⲭⲏ ⲛ̀ⲧⲉ ⲧⲉϥⲙⲉⲧⲟⲩⲣⲟ. ⲟⲩⲟϩ ϥⲛⲁⲓⲣⲓ ⲛ̀ϩⲁⲛⲛⲓϣϯ ⲙ̀ⲡⲉⲧϩⲱⲟⲩ. ⲛ̀ⲟⲩϣⲟ ⲛⲉⲙ ⲥ̅. ⲛⲉⲙ ⲝ̅ ⲛ̀ⲉϩⲟⲟⲩ.
لا توجد ترجمة عربية
(ⲛ︦ⲅ︦) ⲟⲩⲟϩ ⲟⲩⲡⲟⲗⲉⲙⲟⲥ ⲛⲁϣⲱⲡⲓ ϩⲓϫⲱϥ ϧⲉⲛ ⲛⲓⲥⲁ ⲉⲧⲥⲁⲡⲉⲙⲉⲛⲧ. ϥⲛⲁϭⲓ ⲙ̀ⲡⲓϭⲣⲟ. ϣⲁ ⲡⲓⲉϩⲟⲟⲩ ⲛ̀ⲧⲉ ⲡⲉϥⲙⲟⲩ.
لا توجد ترجمة عربية
(ⲛ︦ⲇ︦) ⲙⲉⲛⲉⲛⲥⲱⲥ ϥⲛⲁⲧⲱⲛϥ ⲛ̀ϫⲉ ⲟⲩⲁⲗⲟⲩ ⲉ̀ⲃⲟⲗ ⲛ̀ϧⲏⲧⲟⲩ. ⲉⲧⲉ ⲡⲉϥϣⲏⲣⲓ ⲡⲉ ⲉⲧⲉ ⲫⲁⲓ ⲡⲉ ⲡⲓⲙⲁϩⲓ̅ⲑ̅ ⲛ̀ⲟⲩⲣⲟ ⲉⲑⲛⲁϣⲱⲡⲓ ⲉ̀ⲃⲟⲗ ⲛ̀ϧⲏⲧⲟⲩ. ⲉⲩⲛⲁϫⲫⲟϥ ⲅⲁⲣ ⲉ̀ⲃⲟⲗ ϧⲉⲛ ⲅⲉⲛⲟⲥ ⲃ̅ ⲡⲉϥⲓⲱⲧ ⲇⲉ ⲟⲩⲉ̀ⲃⲟⲗ ⲡⲉ ϧⲉⲛ ⲛⲉⲛϣⲏⲣⲓ ⲛ̀ⲓⲥⲙⲁⲏⲗ. ⲧⲉϥⲙⲁⲩ ⲟⲩⲣⲱⲙⲉⲟⲥ ⲧⲉ.
لا توجد ترجمة عربية
(ⲛ︦ⲉ︦) ⲟⲩⲟⲛ ⲟⲩⲡⲟⲗⲉⲙⲟⲥ ⲛⲁϣⲱⲡⲓ ϧⲉⲛ ⲭⲏⲙⲓ. ⲛⲉⲙ ϯⲥⲩⲣⲓⲁ ⲛ̀ⲕ̅ⲁ̅ ⲛ̀ⲁⲃⲟⲧ.
لا توجد ترجمة عربية
(ⲛ︦ⲋ︦) ⲧⲟⲩⲥⲏϥⲓ ⲅⲁⲣ ⲛⲁϩⲓ ⲛ̀ϧⲏⲧⲟⲩ ⲙ̀ⲙⲓⲛ ⲙ̀ⲙⲱⲟⲩ. ϧⲉⲛ ⲡⲓⲡⲟⲗⲉⲙⲟⲥ. ⲡⲓⲟⲩⲣⲟ ⲉⲧⲉⲙ̀ⲙⲁⲩ ⲫⲁⲓ ⲉⲧⲉ ⲡⲉϥⲣⲁⲛ ⲓⲣⲓ ⲛ̀ⲭ̅ⲝ̅ⲋ̅ ⲉⲛⲏⲡⲓ ⲉϥⲙⲟⲩϯ ⲉⲧⲉ ⲅ̅ ⲛ̀ⲣⲁⲛ ⲉⲧⲉ ⲛⲁⲓ ⲛⲉ. ⲙⲁⲙⲉⲧⲓⲟⲥ. ⲛⲉⲙ ⲭⲁⲗⲗⲉ. ⲛⲉⲙ ⲥⲁⲣⲁⲡⲓⲇⲟⲥ.
لا توجد ترجمة عربية
(ⲛ︦ⲍ︦) ϥⲛⲁⲉⲣⲟⲩⲣⲟ ⲅⲁⲣ ⲉϥⲟⲓ ⲛ̀ⲁⲗⲟⲩ. ⲛ̀ⲧⲉϥⲓⲣⲓ ⲛ̀ϩⲁⲛⲛⲓϣϯ ⲙ̀ⲡⲉⲧϩⲱⲟⲩ. ϥⲛⲁⲟⲩⲁϩⲥⲁϩⲛⲓ ⲛ̀ⲛⲓⲓⲟⲩⲇⲁⲓ ⲧⲏⲣⲟⲩ ⲉⲧϧⲉⲛ ⲙⲁⲓ ⲛⲓⲃⲉⲛ. ⲛ̀ⲥⲉⲧⲁⲥⲑⲱⲟⲩ ⲉ̀ⲓⲗ̅ⲏ̅ⲙ̅. ⲡⲕⲁϩⲓ ⲧⲏⲣϥ ⲛⲁϣⲑⲟⲣⲧⲉⲣ ϧⲉⲛ ⲛⲓⲉϩⲟⲟⲩ ⲛ̀ⲧⲉ ⲧⲉϥⲙⲉⲧⲟⲩⲣⲟ. ϣⲁⲛⲧⲟⲩϯ ⲛ̀ⲟⲩⲣⲱⲙⲓ ⲉ̀ⲃⲟⲗ ϧⲁ ⲟⲩⲕⲟⲕⲓⲙⲓⲥⲙⲁ ⲛ̀ⲟⲩⲱⲧ.
لا توجد ترجمة عربية
(ⲛ︦ⲏ︦) ⲟⲩⲟϩ ⲛⲁⲧϣⲓⲡⲓ ⲉⲧⲉ ⲙ̀ⲙⲟϥ ⲟⲩⲟϩ ϥⲛⲁⲉⲣⲡⲱⲃϣ ⲛ̀ϯϩⲟϯ ⲛ̀ⲧⲉ ⲫϯ.
لا توجد ترجمة عربية
(ⲛ︦ⲑ︦) ϥⲛⲁⲉⲣⲫⲙⲉⲩⲓ ⲁⲛ ⲙ̀ⲫⲛⲟⲙⲟⲥ ⲛ̀ⲓⲥⲙⲁⲏⲗ ⲡⲉϥⲓⲱⲧ. ⲟⲩⲇⲉ ⲧⲉϥⲙⲁⲩ ϫⲉ ⲟⲩⲣⲱⲙⲉⲟⲥ ⲧⲉ. ϥⲛⲁϣⲱⲡⲓ ⲉϥⲟⲓ ⲛ̀ⲉⲩⲑⲁⲧⲏⲥ. ⲟⲩⲟϩ ⲛ̀ⲣⲉϥⲑⲓϧⲓ ⲛ̀ⲛⲁⲩ ⲛⲓⲃⲉⲛ.
لا توجد ترجمة عربية
(ⲝ︦) ϥⲛⲁϧⲱⲧⲉⲃ ⲛ̀ⲟⲩⲙⲏϣ ⲉⲩⲟⲩⲱⲙ ⲛⲉⲙⲁϥ. ϩⲓϫⲉⲛ ϯⲧⲣⲁⲡⲉⲍⲁ. ϧⲉⲛ ϩⲁⲛⲧⲥⲟ ⲛ̀ⲧⲉ ϩⲁⲛⲫⲁϧⲣⲓ ⲙ̀ⲙⲁⲅⲓⲁ. ⲟⲩⲟⲛ ϩⲁⲛⲛⲓϣϯ ⲛ̀ϣⲱϥ. ⲛⲁϣⲱⲡⲓ ϧⲉⲛ ⲛⲓⲉϩⲟⲟⲩ ⲉⲧⲉⲙ̀ⲙⲁⲩ.
لا توجد ترجمة عربية
(ⲝ︦ⲁ︦) ϯⲥⲩⲣⲓⲁ ⲛⲉⲙ ⲡⲕⲁϩⲓ ⲛ̀ⲛⲓⲓⲟⲩⲇⲁⲓ. ϥⲛⲁⲁⲓⲧⲟⲩ ⲛ̀ⲣⲉⲙϩⲉ ⲟⲩⲟϩ ϯⲁⲛⲁⲧⲟⲗⲏ ⲛⲉⲙ ⲭⲏⲙⲓ. ϥⲛⲁϯϧⲓⲥⲓ ⲛⲱⲟⲩ. ϥⲛⲁⲑⲱϣ ⲛ̀ϩⲁⲛⲉⲡⲓⲥⲧⲟⲗⲁⲣⲓⲟⲥ ϧⲉⲛ ⲭⲏⲙⲓ.
لا توجد ترجمة عربية
(ⲝ︦ⲃ︦) ϯⲁⲛⲁⲧⲟⲗⲏ ⲃ̅ ⲛⲉⲙ ⲅ̅ ⲉ̀ϫⲉⲛ ⲛⲟⲩⲉⲣⲏⲟⲩ. ϧⲉⲛ ⲟⲩⲣⲟⲙⲡⲓ ⲛ̀ⲟⲩⲱⲧ ⲛ̀ϩⲣⲏⲓ ϧⲉⲛ ⲑⲙⲉⲧⲟⲩⲣⲟ ⲙ̀ⲫⲁⲓ ⲉⲧⲉ ⲡⲓⲙⲁϩⲓ̅ⲑ̅ ⲡⲉ. ϥⲛⲁϣⲓⲛⲓ ⲛ̀ⲥⲁ ⲟⲩϩⲁⲡ ⲁⲛ ⲟⲩⲇⲉ ⲟⲩⲙⲉⲑⲙⲏⲓ. ⲁⲗⲗⲁ ϥⲛⲁϣⲓⲛⲓ ⲛ̀ⲥⲁ ⲟⲩⲛⲟⲩⲃ ⲛ̀ⲛⲁⲩ ⲛⲓⲃⲉⲛ.
لا توجد ترجمة عربية
(ⲝ︦ⲅ︦) ⲟⲩⲟϩ ϥⲛⲁⲑⲱϣ ⲛ̀ⲟⲩⲉⲡⲓⲇⲣⲟⲡⲟⲥ. ϧⲉⲛ ⲛⲓⲥⲁ ⲛ̀ⲧⲉ ϯⲁⲫⲣⲓⲕⲓⲁ. ⲛⲉⲙ ⲟⲩⲛⲓϣϯ ⲙ̀ⲙⲏϣ. ⲟⲩⲟϩ ϥⲛⲁϣⲱⲡⲓ ⲛ̀ϫⲉ ⲟⲩⲡⲟⲗⲉⲙⲟⲥ ϧⲉⲛ ⲧⲉϥⲙⲏϯ ⲛ̀ⲉⲙⲱⲟⲩ.
لا توجد ترجمة عربية
(ⲝ︦ⲇ︦) ⲥⲉⲛⲁϥⲱϯ ⲉ̀ⲃⲟⲗ ⲙ̀ⲡⲓⲙⲏϣ ⲉⲑⲛⲉⲙⲁϥ. ϥⲛⲁϩⲉⲙⲥⲓ ϧⲉⲛ ⲛⲓⲥⲁ ⲛ̀ⲧⲉ ϯⲁⲫⲣⲓⲕⲏ. ⲛⲉⲙ ⲛⲏ ⲉⲑⲛⲁⲥⲉⲡⲓ ϧⲉⲛ ⲡⲓⲙⲏϣ ⲉⲑⲛⲉⲙⲁϥ ⲛ̀ⲟⲩⲙⲏϣ ⲛ̀ⲣⲟⲙⲡⲓ. ⲟⲩⲟϩ ϥⲛⲁϭⲣⲟ ⲉ̀ⲣⲟⲥ ⲁⲛ.
لا توجد ترجمة عربية
(ⲝ︦ⲉ︦) ⲙⲉⲛⲉⲛⲥⲱⲥ ϥⲛⲁⲧⲱⲛϥ ⲉ̀ϩⲣⲏⲓ ⲉ̀ϫⲱϥ ⲛ̀ϫⲉ ⲟⲩⲉⲑⲛⲟⲥ ⲛ̀ϣⲉⲙⲙⲟ. ⲉⲩⲙⲟⲩϯ ⲉ̀ⲣⲟϥ ⲛ̀ϫⲉ ⲡⲓⲧⲟⲩⲣⲅⲟⲥ. ϥⲛⲁⲉⲣⲡⲟⲗⲉⲙⲓⲛ ⲛⲉⲙⲁϥ.
لا توجد ترجمة عربية
(ⲝ︦ⲋ︦) ⲟⲩⲟϩ ⲥⲁⲣⲁⲡⲓⲇⲟⲥ ⲛⲁⲉⲣϭ̅ⲥ̅ ⲉ̀ϩⲁⲛⲙⲏϣ ⲛ̀ⲣⲱⲙⲉⲟⲥ. ⲛⲉⲙ ϯⲡⲉⲛⲧⲁⲡⲟⲗⲓⲥ. ⲛⲉⲙ ⲛⲓⲙⲏⲧⲟⲥ. ⲟⲩⲟϩ ϥⲛⲁⲱⲗⲓ ⲛ̀ⲛⲟⲩϣⲱⲗ ⲧⲏⲣⲟⲩ. ⲛ̀ⲧⲉϥⲉⲣϭ̅ⲥ̅ ⲉ̀ⲛⲟⲩⲡⲟⲗⲓⲥ. ⲛ̀ⲧⲉϥϩⲱⲗ ⲉ̀ϯⲃⲁⲕⲓ ⲉⲧⲁϥⲕⲟⲧⲥ. ⲛⲉⲙ ⲛⲓⲭⲱⲣⲁ ⲉⲧⲁϥⲑⲟⲩⲱⲧⲟⲩ ⲉ̀ϧⲟⲩⲛ ⲛ̀ϫⲉ ⲡⲉϥⲓⲱⲧ
لا توجد ترجمة عربية
(ⲝ︦ⲍ︦) ⲡⲓⲧⲟⲩⲣⲅⲟⲥ ⲛⲁⲑⲱⲟⲩϯ ⲉ̀ⲣⲟϥ ⲉ̀ⲛⲟⲩⲡⲟⲗⲉⲙⲟⲥ. ⲉϥⲟⲩⲱϣ ⲉ̀ⲱⲗⲓ ⲛ̀ϯⲙⲉⲧⲟⲩⲣⲟ ⲛ̀ⲧⲟⲧϥ ⲙ̀ⲡⲓⲥⲁⲣⲁⲡⲓⲇⲟⲥ.
لا توجد ترجمة عربية
(ⲝ︦ⲏ︦) ⲉⲧⲓ ⲉϥϩⲉⲙⲥⲓ ϧⲉⲛ ⲡⲉϥⲏⲓ ⲛ̀ϫⲉ ⲡⲓⲥⲁⲣⲁⲡⲓⲇⲟⲥ. ⲉⲣⲉ ⲛⲓϣⲱⲗ ⲭⲏ ⲙ̀ⲡⲉϥⲙ̀ⲑⲟ ⲉϥⲉⲣⲑⲉⲱⲣⲓⲛ ⲛ̀ϯⲛⲓϣϯ ⲙ̀ⲙⲉⲧⲣⲁⲙⲁⲟ. ⲡⲓⲛⲟⲩⲃ ⲛⲉⲙ ⲡⲓϩⲁⲧ. ⲛⲉⲙ ⲱⲛⲓ ⲛⲓⲃⲉⲛ ⲉⲧⲧⲁⲓⲏⲟⲩⲧ. ⲛⲉⲙ ⲥⲕⲉⲩ>ⲟⲥ ⲛⲓⲃⲉⲛ ⲛ̀ϣⲟⲩⲉⲣⲉⲡⲓⲑⲩⲙⲓⲛ ⲉ̀ⲣⲟϥ.
لا توجد ترجمة عربية
(ⲝ︦ⲑ︦) ⲥⲉⲛⲁⲉⲛ ⲡⲓϣⲓⲛⲓ ⲛⲁϥ. ϫⲉ ⲁ ⲡⲓⲧⲟⲩⲣⲅⲟⲥ ⲉⲣϭ̅ⲥ̅ ⲉ̀ϯⲥⲩⲣⲓⲁ ⲧⲏⲣⲥ ⲛⲉⲙ ⲛⲉⲥⲑⲟϣ. ϥⲛⲁⲓ̀ ⲉ̀ⲃⲟⲗ ϧⲉⲛ ⲟⲩⲛⲓϣϯ ⲛ̀ϣⲑⲟⲣⲧⲉⲣ. ⲛⲉⲙ ⲡⲉϥⲙⲏϣ ⲧⲏⲣϥ. ⲟⲩⲟϩ ⲛⲓϣⲱⲗ ⲧⲏⲣⲟⲩ. ϥⲛⲁⲭⲁⲩ ⲛⲥⲱϥ. ϥⲛⲁⲱⲗⲓ ⲛ̀ϩⲗⲓ ⲛ̀ϧⲏⲧⲟⲩ ⲛⲉⲙⲁϥ ⲁⲛ.
لا توجد ترجمة عربية
(ⲟ︦) ⲁⲗⲗⲁ ϥⲛⲁϣⲱⲡⲓ ϧⲉⲛ ⲟⲩϩⲏⲧ ⲛ̀ⲑⲏⲣⲓⲟⲛ. ⲉϥⲙⲉⲩⲓ ⲉ̀ⲃⲟⲗ ⲉϥⲉⲙⲓ ⲁⲛ ϫⲉ ϥⲛⲁⲉⲣ ⲟⲩ.
لا توجد ترجمة عربية
(ⲟ︦ⲁ︦) ⲁϥϣⲁⲛⲫⲱⲧ ⲇⲉ ϫⲉ ϥⲛⲏⲟⲩ ⲉ̀ϧⲣⲏⲓ ⲉ̀ⲭⲏⲙⲓ. ⲡⲓⲧⲟⲩⲣⲅⲟⲥ ⲛⲁⲉⲣϣⲟⲣⲡ ⲉ̀ⲣⲟϥ ⲛⲉⲙ ⲡⲉϥⲙⲏϣ.
لا توجد ترجمة عربية
(ⲟ︦ⲃ︦) ⲟⲩⲟϩ ⲥⲉⲛⲁⲉⲣⲁⲡⲁⲛⲧⲁⲛ ⲉ̀ⲛⲟⲩⲉⲣⲏⲟⲩ ⲛⲉⲙ ⲡⲟⲩⲙⲏϣ. ⲥⲉⲛⲁϯ ⲛⲉⲙ ⲛⲟⲩⲉⲣⲏⲟⲩ ϣⲁⲧⲉ ⲡⲓⲥⲛⲟϥ ϧⲁϯ ⲉ̀ⲃⲟⲗ ⲉ̀ⲙⲁϣⲱ ⲟⲩⲟϩ ⲡⲓⲧⲟⲩⲣⲅⲟⲥ. ⲟⲩⲉ̀ⲃⲟⲗ ⲡⲉ ϧⲉⲛ ⲡⲅⲉⲛⲟⲥ ⲛ̀ⲛⲓⲣⲱⲙⲉⲟⲥ.
لا توجد ترجمة عربية
(ⲟ︦ⲅ︦) ⲡⲓⲡⲟⲗⲉⲙⲟⲥ ⲛⲁϣⲱⲡⲓ ϧⲉⲛ ϣⲙⲟⲩⲛ ϯⲃⲁⲕⲓ. ϣⲁⲧⲉ ⲡⲓⲙⲱⲟⲩ ⲛ̀ⲧⲉ ⲫⲓⲁⲣⲟ ⲉⲣⲥⲛⲟϥ. ϩⲓⲧⲉⲛ ⲡⲁϣⲁⲓ ⲛ̀ⲛⲓϧⲱⲧⲉⲃ. ⲛ̀ⲛⲟⲩϣⲧⲉⲙⲥⲉ ⲙⲱⲟⲩ ⲉ̀ⲃⲟⲗ ⲛ̀ϧⲏⲧϥ.
لا توجد ترجمة عربية
(ⲟ︦ⲇ︦) ⲟⲩⲟⲛ ⲟⲩⲙⲏϣ ⲛ̀ⲣⲱⲙⲓ ⲛⲁⲙⲟⲩ ⲛ̀ⲧⲥⲏϥⲓ ⲛ̀ⲁⲧϭⲓⲏⲡⲓ ⲙ̀ⲙⲱⲟⲩ. ⲫⲏ ⲉⲑⲛⲁⲥⲉⲡⲓ ⲛ̀ⲧⲱⲟⲩ. ⲥⲉⲛⲁϩⲱⲗ ⲉ̀ⲧⲟⲩⲭⲱⲣⲁ. ⲡⲓⲙⲁ ⲉⲧⲁⲩⲓ̀ ⲉ̀ⲃⲟⲗ ⲛ̀ϧⲏⲧϥ.
لا توجد ترجمة عربية
(ⲟ︦ⲉ︦) ⲡⲓⲧⲟⲩⲣⲅⲟⲥ ⲛⲁϧⲱⲧⲉⲃ ⲙ̀ⲡⲓⲥⲁⲥⲁⲣⲁⲡⲓⲇⲟⲥ. ⲛ̀ⲧⲉϥⲱⲗⲓ ⲛ̀ⲧⲉϥⲙⲉⲧⲟⲩⲣⲟ ⲛ̀ⲧⲟⲧϥ. ⲙ̀ⲙⲟⲛ ⲥⲉⲙⲛⲓ ⲛ̀ⲧⲉ ⲛⲉⲛϣⲏⲣⲓ ⲛ̀ⲓⲥⲙⲁⲏⲗ ⲁⲛ ϫⲉ. ⲁⲗⲗⲁ ⲫⲁⲓ ⲡⲉ ⲡϫⲱⲕ ⲙ̀ⲡⲟⲩⲁⲣⲓⲑⲙⲟⲥ.
لا توجد ترجمة عربية
(ⲟ︦ⲋ︦) ⲙⲉⲛⲉⲛⲥⲁ ⲛⲁⲓ ϥⲛⲁⲧⲱⲛϥ ⲉ̀ϫⲱⲟⲩ ⲛ̀ϫⲉ ⲡⲟⲩⲣⲟ ⲛ̀ⲧⲉ ⲛⲓⲣⲱⲙⲉⲟⲥ. ϥⲛⲁϯ ⲛ̀ⲟⲩϥⲱϯ ⲉ̀ⲃⲟⲗ ⲛⲱⲟⲩ. ϧⲉⲛ ⲣⲱⲥ ⲛ̀ⲧⲥⲏϥⲓ. ϧⲉⲛ ⲛⲉⲛϣⲏⲣⲓ ⲛ̀ⲓⲥⲙⲁⲏⲗ. ϧⲉⲛ ⲡϣⲁϥⲉ ⲛ̀ⲧⲉ ⲑⲣⲓⲃⲱⲛ ⲡⲕⲁϩⲓ ⲛ̀ⲛⲟⲩⲓⲟϯ.
لا توجد ترجمة عربية
(ⲟ︦ⲍ︦) ⲛⲉⲛϣⲏⲣⲓ ⲛ̀ⲛⲓⲥⲙⲁⲏⲗ ⲛⲁⲉⲣⲃⲱⲕ ⲛ̀ⲛⲓⲣⲱⲙⲉⲟⲥ ⲙ̀ⲡⲟⲩⲥⲏⲟⲩ ⲧⲏⲣϥ. ⲛⲓⲣⲱⲙⲉⲟⲥ ⲛⲁⲉⲣϭ̅ⲥ̅ ⲉ̀ⲭⲏⲙⲓ ⲛ̀ⲙ̅ ⲛ̀ⲣⲟⲙⲡⲓ.
لا توجد ترجمة عربية
(ⲟ︦ⲏ︦) ⲙⲉⲛⲉⲛⲥⲁ ⲛⲁⲓ ⲉⲩⲉ̀ⲓ̀ ⲉ̀ⲃⲟⲗ ⲛ̀ϫⲉ ⲡⲓⲉⲑⲛⲟⲥ ⲃ̅. ⲉⲧⲉ ⲛⲁⲓ ⲛⲉ ⲛⲟⲩⲣⲁⲛ. ⲅⲱⲅ ⲛⲉⲙ ⲁⲅⲱⲅ. ⲉⲩⲉ̀ⲕⲓⲙ ⲉ̀ⲡⲕⲁϩⲓ ⲉ̀ϩⲁⲛⲙⲏϣ ⲛ̀ⲉϩⲟⲟⲩ.
لا توجد ترجمة عربية
(ⲟ︦ⲑ︦) ⲛⲁⲓ ⲉⲣⲉ ⲧⲟⲩⲏⲡⲓ ⲟϣ ⲙ̀ⲫⲣⲏϯ ⲙ̀ⲡⲓϣⲱ. ⲟⲩⲟϩ ⲉϥⲉ̀ⲟⲩⲟⲛϩϥ ⲛ̀ϫⲉ ⲡⲁⲛⲧⲓⲭⲣⲥ ⲉϥⲉ̀ⲉⲣϩⲁⲗ ⲛ̀ⲟⲩⲙⲏϣ. ϩⲱⲥⲇⲉ ⲁϥϣⲁⲛϣ̀ϫⲉⲙϫⲟⲙ. ⲛ̀ⲧⲉϥⲥⲱⲣⲉⲙ ⲛ̀ⲛⲓⲕⲉⲥⲱⲧⲡ.
لا توجد ترجمة عربية
(ⲡ︦) ⲟⲩⲟϩ ϥⲛⲁϧⲱⲧⲉⲃ ⲛ̀ⲡⲓⲡⲣⲟⲫⲏⲧⲏⲥ ⲃ̅ ⲉⲛⲱⲭ ⲛⲉⲙ ⲏⲗⲓⲁⲥ ⲛ̀ⲥⲉⲉⲣ ⲅ̅ ⲛ̀ⲉϩⲟⲟⲩ ⲉⲩϫⲟⲥ ⲉⲩⲙⲱⲟⲩⲧ. ϧⲉⲛ ⲡϣⲑⲉϩ ⲛ̀ϯⲛⲓϣϯ ⲙ̀ⲡⲟⲗⲓⲥ ⲓⲗ̅ⲏ̅ⲙ̅.
لا توجد ترجمة عربية
(ⲡ︦ⲁ︦) ⲙⲉⲛⲉⲛⲥⲱⲥ ⲛ̀ⲧⲉ ⲡⲓⲁⲡⲁⲥ ⲛ̀ⲧⲉ ⲛⲓⲉϩⲟⲟⲩ ⲧⲟⲩⲛⲟⲥⲟⲩ ⲉ̀ⲃⲟⲗ ϧⲉⲛ ⲛⲏ ⲉⲑⲙⲱⲟⲩⲧ.
لا توجد ترجمة عربية
(ⲡ︦ⲃ︦) ⲉⲧⲉ ⲫⲁⲓ ⲡⲉ ⲫⲏ ⲉⲧⲁⲓⲛⲁⲩ ⲉ̀ⲣⲟϥ ⲉϥⲛⲏⲟⲩ ⲛⲉⲙ ⲛⲓϭⲏⲡⲓ ⲛ̀ⲧⲉ ⲧⲫⲉ. ⲙ̀ⲫⲣⲏϯ ⲛ̀ⲟⲩϣⲏⲣⲓ ⲛ̀ⲣⲱⲙⲓ. ⲡⲉϥⲉⲣϣⲓϣⲓ. ⲟⲩⲉⲣϣⲓϣⲓ ⲛ̀ⲉⲛⲉϩ. ⲟⲩⲟϩ ⲧⲉϥⲙⲉⲧⲟⲩⲣⲟ ⲙ̀ⲡⲁⲥⲙⲟⲩⲛⲕ.
لا توجد ترجمة عربية
(ⲡ︦ⲅ︦) ⲟⲩⲟϩ ⲛ̀ⲑⲟϥ ⲉⲑⲛⲁϧⲱⲧⲉⲃ ⲙ̀ⲡⲓⲁⲛⲧⲓⲭⲣ̅ⲥ̅ ⲛⲉⲙ ⲡⲉϥⲙⲏϣ ⲧⲏⲣϥ ⲉⲑⲛⲉⲙⲁϥ.
لا توجد ترجمة عربية
(ⲡ︦ⲇ︦) ⲁⲗⲏⲑⲱⲥ ⲟⲩⲟⲓ ⲙ̀ⲯⲩⲭⲏ ⲛⲓⲃⲉⲛ ⲉⲧϣⲟⲡ ϩⲓϫⲉⲛ ⲡⲕⲁϩⲓ ⲙ̀ⲡⲓⲥⲏⲟⲩ ⲉⲧⲉⲙ̀ⲙⲁⲩ. ϫⲉ ⲟⲩⲏⲓ ϥⲛⲁϣⲱⲡⲓ ⲛ̀ϫⲉ ⲟⲩϭⲓⲛ̀ϫⲟⲛⲥ ⲛⲉⲙ ⲟⲩⲛⲓϣϯ ⲛ̀ϧⲟⲙϧⲉⲙ ⲛⲉⲙ ⲟⲩⲣⲓⲙⲓ. ⲟⲩⲟϩ ⲉⲣⲉ ⲡⲟⲩϫⲁⲓ ⲛ̀ⲛⲓⲣⲱⲙⲓ. ϧⲉⲛ ⲛⲉⲛϫⲓϫ ⲙ̀ⲫϯ ⲛ̀ⲧⲉ ⲧⲫⲉ ⲟⲩⲟϩ ⲫⲁⲓ ⲡⲉ ⲡϫⲱⲕ ⲙ̀ⲡⲓⲥⲁϫⲓ.
لا توجد ترجمة عربية
(ⲡ︦ⲉ︦) ⲡⲉϫⲉ ⲡⲓⲁⲅⲅⲉⲗⲟⲥ ⲛⲏⲓ. ϫⲉ ⲇⲁⲛⲓⲏⲗ ⲇⲁⲛⲓⲏⲗ ⲙⲁϣⲑⲁⲙ ⲛ̀ⲛⲁⲓⲥⲁϫⲓ. ⲁⲣⲓⲥⲫⲣⲁⲅⲓⲍⲓⲛ ⲙ̀ⲙⲱⲟⲩ ϣⲁ ⲡⲓⲥⲏⲟⲩ ⲉⲧⲟⲩⲛⲁϫⲱⲕ ⲉ̀ⲃⲟⲗ. ϫⲉ ⲫⲁⲓ ⲡⲉ ⲡϫⲱⲕ ⲛ̀ϩⲱⲃ ⲛⲓⲃⲉⲛ.
لا توجد ترجمة عربية
(ⲡ︦ⲋ︦) ⲁ̀ⲛⲟⲕ ⲇⲁⲛⲓⲏⲗ ⲁⲓⲧⲱⲛⲧ ⲁⲓⲧⲱⲡ ⲛ̀ⲛⲓⲥⲁϫⲓ. ⲟⲩⲟϩ ⲁⲓⲉⲣⲥⲫⲣⲁⲅⲓⲍⲓⲛ ⲙ̀ⲙⲱⲟⲩ.
لا توجد ترجمة عربية
(ⲡ︦ⲍ︦) ⲁⲓϯⲱⲟⲩ ⲙ̀ⲫϯ ⲫⲓⲱⲧ ⲛ̀ⲧⲉ ⲟⲩⲟⲛ ⲛⲓⲃⲉⲛ. ⲟⲩⲟϩ ⲫⲛⲏⲃ ⲛ̀ⲧⲉ ⲡⲓⲉⲡⲧⲏⲣϥ. ⲟⲩⲟϩ ⲉⲧⲥⲱⲟⲩⲛ ⲛ̀ⲛⲓⲥⲏⲟⲩ ⲛⲉⲙ ⲛⲓⲭⲣⲟⲛⲟⲥ.
لا توجد ترجمة عربية
(ⲡ︦ⲏ︦) ⲫⲁⲓ ⲉⲧⲉ ⲫⲱϥ ⲡⲉ ⲡⲓⲱⲟⲩ ⲛⲉⲙ ⲡⲓⲁⲙⲁϩⲓ ϣⲁ ⲉⲛⲉϩ ⲁⲙⲏⲛ.
لا توجد ترجمة عربية
ⲥⲙⲟⲩ ⲉ̀ⲣⲟⲓ ⲭⲱ ⲛⲏⲓ ⲉ̀ⲃⲟⲗ. ⲡⲉⲧⲣⲟⲩ ⲡⲣⲉⲥⲃⲩⲧⲉⲣⲟⲩ. ⲧⲟⲛ ⲙⲟⲛⲁⲭ. ⲉ̀ⲗⲁⲭⲓⲥⲧⲟⲇⲟⲗ. ⲛ̀ⲧⲉ ⲡϭ̅ⲥ̅ ϯⲙⲧⲟⲛ ⲛ̀ⲧⲁⲧⲁⲗⲉⲡⲱⲣⲟⲥ ⲙ̀ⲯⲩⲭⲏ ⲁⲙⲏⲛ. ⲥⲟⲩⲑ̅ ⲙ̀ⲡⲓⲁⲃⲟⲧ ⲁⲑⲱⲣ ⲭⲣⲟⲛⲟⲩ. ⲙⲁⲣⲧⲩⲣⲟⲩ ⲁ̅ϥ̅.